 |
ທ່ານ ຄຳສິ່ງ ໄຊດວງຕາ ຮອງຫົວໜ້າຂະແໜງພະນັກງານ-ລັດຖະກອນ, ຄະນະຈັດຕັ້ງແຂວງ ໄດ້ຂຶ້ນຜ່ານຂໍ້ຕົກລົງ ເລກທີ 979/ປຄປຂ ແລະ ເລກທີ 983/ປຄປຂ ວ່າດ້ວຍການອະນຸມັດໃຫ້ພະນັກງານ-ລັດຖະກອນອອກພັກການຮັບອຸດໜູນບຳນານ; ຈາກນັ້ນ, ທ່ານ ກົງຈັກ ສີສະຫວາດ ເປັນກຽດມອບຂໍ້ຕົກລົງ ພ້ອມເງິນນະໂຍບາຍໃຫ້ແກ່ພະນັກງານບໍານານຕາມລະບຽບການ.
ທ່ານ ຄຳສິ່ງ ໄຊດວງຕາ ຍັງໄດ້ຂຶ້ນຜ່ານລັດຖະດຳລັດປະທານປະເທດ ເລກທີ 315 ວ່າດ້ວຍການປະດັບຫຼຽນກາລະນຶກ 50 ປີ ວັນສະຖາປະນາ ສປປ ລາວ (2 ທັນວາ 1975 – 2 ທັນວາ 2025) ໃຫ້ແກ່ພະນັກງານ-ລັດຖະກອນປະຈຳການ ແລະ ພະນັກງານບຳນານ.ສໍາລັບຄະນະໂຄສະນາອົບຮົມແຂວງອັດຕະປື ມີຜູ້ໄດ້ຮັບການປະດັບຫຼຽນກາລະນຶກ 50 ປີ ຈຳນວນ 25 ທ່ານ, ຍິງ 6 ທ່ານ, ໃນນັ້ນເປັນພະນັກງານບຳນານ 8 ທ່ານ, ຍິງ 1 ທ່ານ.
ທ່ານ ກົງຈັກ ສີສະຫວາດ ໄດ້ສະແດງຄວາມຍ້ອງຍໍຊົມເຊີຍບັນດາພະນັກງານຜູ້ທີ່ໄດ້ຮັບການປະດັບຫຼຽນກາລະນຶກໃນຄັ້ງນີ້ເຊິ່ງຫຼຽນກາລະນຶກ 50 ປີ ບໍ່ພຽງແຕ່ເປັນລາງວັນອັນຊົງກຽດ ແຕ່ຍັງເປັນການຍ້ອງຍໍສັນລະເສີນຈາກ ພັກ-ລັດ, ຕໍ່ຜົນງານ, ຄຸນງາມຄວາມດີ, ການອຸທິດທຸ່ມເທເຫື່ອແຮງ ແລະ ສະຕິປັນຍາຂອງບັນດາພະນັກງານຕະຫຼອດໄລຍະຜ່ານມາ ແລະ ທ່ານໄດ້ຮຽກຮ້ອງໃຫ້ບັນດາຜູ້ໄດ້ຮັບຫຼຽນກາລະນຶກ 50 ປີ ຈົ່ງສືບຕໍ່ຮັກສາ ແລະ ເສີມຂະຫຍາຍມູນເຊື້ອອັນດີງາມ, ສືບຕໍ່ເປັນແບບຢ່າງອັນດີໃຫ້ແກ່ຄົນຮຸ່ນຫຼັງ, ຕັ້ງໜ້າປະຕິບັດໜ້າທີ່ການເມືອງ, ພັດທະນາຕົນເອງ ແລະ ປະກອບສ່ວນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ.
ສຳລັບ ພະນັກງານທີ່ອອກພັກການ-ຮັບອຸດໜູນບຳນານ, ທ່ານໄດ້ສະແດງຄວາມຍ້ອງຍໍ ແລະ ຂອບໃຈຕໍ່ຜົນງານ, ຄຸນງາມຄວາມດີ ແລະ ການອຸທິດເຫື່ອແຮງສະຕິປັນຍາເຂົ້າໃນວຽກງານໂຄສະນາອົບຮົມ ຕະຫຼອດໄລຍະຜ່ານມາ, ພ້ອມທັງຮຽກຮ້ອງໃຫ້ສືບຕໍ່ຖ່າຍທອດປະສົບການ,ບົດຮຽນໃຫ້ແກ່ພະນັກງານຮຸ່ນສືບສອດ, ຊຸກຍູ້ປະຊາຊົນ ແລະ ລູກຫຼານຢູ່ຂັ້ນທ້ອງຖິ່ນ-ຮາກຖານ ໃຫ້ປະຕິບັດຕາມລະບຽບກົດໝາຍ, ນະໂຍບາຍ ແລະ ແນວທາງຂອງພັກ-ລັດ, ຮ່ວມກັນສ້າງຄອບຄົວ, ຊຸມຊົນ ແລະ ບ້ານເມືອງໃຫ້ມີຄວາມສະຫງົບ ແລະ ຈະເລີນກ້າວໜ້າຕໍ່ໄປ.
ຂ່າວ: ສ.ໄຊຄຳສອນ
ຄໍາເຫັນ