ຄອສພ ສະຫຼຸບວຽກງານ ພ້ອມທັງເຊື່ອມຊຶມມະຕິ 10 ສະໄໝ XI

ສະຫາຍ ລາວປາວຊົ່ງ ນະວົງໄຊ ກຳມະການສູນກາງພັກ ຮອງເລຂາຄະນະພັກ ຮອງຫົວໜ້າ ຄອສພ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດວຽກງານໃນໄລຍະຜ່ານມາ ຊຶ່ງໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຂາດຕົກບົກຜ່ອງ, ບົດຮຽນທີ່ຖອດຖອນໄດ້ ແລະ ທິດທາງໃນຕໍ່ໜ້າ ຊຶ່ງໃນນີ້ຜ່ານມາ ຄອສພ ໄດ້ຈັດຕັ້ງເຜີຍແຜ່, ເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່, ເອົາໃຈໃສ່ວຽກງານໂຄສະນາຜ່ານສື່ ເປັນຕົ້ນ ໜັງສືພິມ, ວາລະສານ, ວິທະຍຸ, ໂທລະພາບ, ສື່ສັງຄົມອອນລາຍ ແລະ ໂຄສະນາເຄື່ອນທີ່; ເອົາໃຈໃສ່ວຽກງານອົບຮົມວຽກງານແນວທາງແຜນນະໂຍບາຍຂອງພັກ, ນິຕິກໍາຂອງລັດ, ວຽກງານຕິດຕາມ, ເກັບກໍາຫາງສຽງສັງຄົມ, ວຽກງານຂໍ້ມູນຂ່າວສານ, ວຽກງານຄົ້ນຄວ້າທິດສະດີ ແລະ ສັງລວມພຶດຕິກໍາຂອງພັກ, ວຽກງານວາລະສານ ແລະ ໜັງສືພິມ, ວຽກງານກໍ່ສ້າງ ແລະ ບໍາລຸງຍົກລະດັບພະນັກງານໂຄສະນາອົບຮົມ, ວຽກງານພົວພັນຮ່ວມມືກັບຕ່າງປະເທດ ແລະ ວຽກງານອື່ນໆທີ່ກ່ຽວຂ້ອງ.

ພ້ອມນີ້, ໃນວາລະກອງປະຊຸມ ສະຫາຍ ນາງ ພວງມະລີ ອັກຄະມຸນຕີ ກຳມະການຄະນະພັກ ຫົວໜ້າກົມຈັດຕັ້ງ-ພະນັກງານ ຍັງໄດ້ຂຶ້ນຜ່ານແຈ້ງການຂອງຄະນະປັບປຸງກົງຈັກການຈັດຕັ້ງ.

ຈາກນັ້ນ, ສະຫາຍ ຄໍາພັນ ເຜີຍຍະວົງ ກໍຍັງໄດ້ເຜີຍແຜ່ເຊື່ອມຊຶມເອກະສານມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝ XI; ພ້ອມທັງມີຄໍາເຫັນວ່າ: ໃຫ້ບັນດາສະມາຊິກພັກ, ພະນັກງານ - ລັດຖະກອນທົ່ວ ຄອສພ ເອົາໃຈໃສ່ສຶກສາອົບຮົມການເມືອງ-ແນວຄິດ, ມີຄວາມອຸ່ນອ່ຽນ, ທຸ່ນທ່ຽງ, ເປັນເຈົ້າການເຂົ້າຮ່ວມປະຕິບັດໜ້າທີ່ວຽກງານຕາມທິດຊີ້ນໍາຂອງຂັ້ນເທິງວາງອອກ, ຍົກສູງຄວາມຮັບຜິດຊອບຕໍ່ໜ້າທີ່ການເມືອງ, ກ້າຄິດ, ກ້າເຮັດ, ກ້າຮັບຜິດຊອບຕໍ່ໜ້າທີ່ວຽກງານທີ່ໄດ້ຮັບມອບໝາຍ; ເອົາໃຈໃສ່ສືບຕໍ່ປັບປຸງກົງຈັກການຈັດຕັ້ງ, ສືບຕໍ່ຄົ້ນຄວ້າກົງຈັກພາຍໃນໃຫ້ມີຄວາມກະທັດຮັດ; ສືບຕໍ່ຄົ້ນຄວ້ານະໂຍບາຍຮັບການອຸດໜູນບໍານານ, ເພີ່ມທະວີຄວາມສາມັກຄີພາຍໃນຢ່າງແໜ້ນແຟ້ນ. ພ້ອມນີ້, ກໍຍັງເນັ້ນໃຫ້ເອົາໃຈໃສ່ວຽກງານອື່ນໆຕື່ມອີກ.

(ຂ່າວ: ແສງຈັນ)