ຄຕພ ປາຖະກະຖາວັນຊາດ, ວັນເກີດປະທານ ໄກສອນ ພົມວິຫານ ແລະ ປະດັບຫຼຽນກາລະນຶກ 50 ປີ

ໃນພິທີ, ສະຫາຍ ບຸນເຫຼືອ ພັນດານຸວົງ ໄດ້ຫວນຄືນມູນເຊື້ອຂະບວນການປະຕິວັດ ແລະ ຄວາມໝາຍຄວາມສໍາຄັນຂອງວັນຊາດທີ 2 ທັນວາ, ຊຶ່ງແມ່ນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ຂອງຊາດ, ປວງຊົນລາວທັງຊາດ ໄດ້ມີອິດສະຫຼະພາບ ແລະ ເປັນເຈົ້າຂອງປະເທດຊາດຢ່າງແທ້ຈິງ ແລະ ມີອະທິປະໄຕຢ່າງຄົບຖ້ວນ, ມີຖານະເທົ່າທຽມກັບປະເທດອື່ນໆໃນເວທີສາກົນກໍຄືໃນໂລກ; ພ້ອມທັງຍົກໃຫ້ເຫັນບັນດາເຫດການໄຊຊະນະອັນຍິ່ງໃຫຍ່, ພາລະກິດປົດປ່ອຍຊາດໃນເມື່ອກ່ອນກໍຄືຜົນງານ, ຜົນສໍາເລັດໃນພາລະກິດປົກປັກຮັກສາ ແລະ ສ້າງສາປະເທດຊາດພາຍໃຕ້ການນໍາພາ-ຊີ້ນໍາຂອງພັກ, ຜົນສໍາເລັດຂອງການປະຕິບັດ 2 ໜ້າທີ່ຍຸດທະສາດແຕ່ອະດີດຈົນເຖິງປັດຈຸບັນ. ຫຼັງຈາກນັ້ນ, ກໍໄດ້ສືບຕໍ່ເຜີຍແຜ່ການເຄື່ອນໄຫວປະຕິວັດຂອງປະທານ ໄກສອນ ພົມວິຫານ ໂດຍໄດ້ຍົກໃຫ້ເຫັນເຖິງຜົນງານອັນໃຫຍ່ຫຼວງ ແລະ ແບບຢ່າງອັນດີເລີດຂອງປະທານ ໄກສອນ ພົມວິຫານ ຜູ້ນໍາທີ່ເຄົາລົບຮັກຂອງປວງຊົນລາວທັງຊາດ ທີ່ມີຕໍ່ປະເທດຊາດ ແລະ ຮໍ່າຮຽນເອົາແບບຢ່າງອັນດີງາມເພື່ອໃຫ້ຄົນຮຸ່ນໃໝ່ຝຶກຝົນຫຼໍ່ຫຼອມຕົນເອງໃຫ້ກາຍເປັນສະມາຊິກພັກທີ່ດີ,ເປັນພະນັກງານທີ່ດີ ເດັ່ນສືບທອດພາລະກິດຂອງພັກໃຫ້ຈະເລີນຮຸ່ງເຮືອງຂຶ້ນໄປເລື້ອຍໆ.

ໃນວັນດຽວກັນ, ສະຫາຍ ວາລະໄຊ ເລັ່ງສະຫວັດ, ຮອງເລຂາຄະນະບໍລິຫານງານພັກ, ຮອງຫົວໜ້າ  ຄຕພ ໄດ້ຂຶ້ນຜ່ານລັດຖະດຳລັດຂອງປະທານປະເທດສະບັບເລກທີ 290/ປປທ, ລົງວັນທີ 20 ພະຈິກ 2025 ວ່າດ້ວຍການປະດັບຫຼຽນກາລະນຶກ 50 ປີ ວັນສະຖາປະນາ ສປປ ລາວ ແລະ ຜ່ານໃບມອບສິດຂອງນາຍົກລັດຖະມົນຕີສະບັບເລກທີ 247/ນຍ, ລົງວັນທີ 20 ພະຈິກ 2025, ເພື່ອປະດັບຫຼຽນກາລະນຶກ 50 ປີ ໃຫ້ແກ່ບັນດາພະນັກງານ-ລັດຖະກອນປະຈຳການ ແລະ ບຳນານ ຜູ້ທີ່ມີຜົນງານດີເດັ່ນ, ມີຄຸນງາມຄວາມດີໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕະຫຼອດໄລຍະຜ່ານມາ, ຊຶ່ງຜູ້ທີ່ໄດ້ຮັບຫຼຽນທັງໝົດມີ 90 ສະຫາຍ, ຍິງ 23 ສະຫາຍ, ໃນນີ້ພະນັກງານບຳນານ 34 ສະຫາຍ, ຍິງ 10 ສະຫາຍ.

ການປະດັບຫຼຽນກາລະນຶກໃນຄັ້ງນີ້ແມ່ນເປັນການຍ້ອງຍໍ, ສັນລະເສີນຕໍ່ຄຸນງາມຄວາມດີອັນສູງສົ່ງ, ທັງເປັນລາງວັນ ແລະ ກຳລັງໃຈອັນສໍາຄັນຕໍ່ພາລະກິດປະຕິວັດຕໍ່ຊາດ, ຕໍ່ປະຊາຊົນລາວ ພ້ອມທັງລະນຶກເຖິງ 50 ປີວັນມະຫາໄຊຊະນະແຫ່ງການປະຕິວັດຊາດປະຊາທິປະໄຕ ແລະ ລະນຶກເຖິງຜົນງານອັນໃຫຍ່ຫຼວງຂອງປະທານ ໄກສອນ ພົມວິຫານ ແລະ ບັນດາຜູ້ນຳປະຕິວັດ, ວິລະຊົນ ຕະຫຼອດຮອດປະຊາຊົນລາວທີ່ໄດ້ເສຍສະຫຼະຊີວິດ-ເລືອດເນື້ອໃຫ້ແກ່ພາລະກິດຕໍ່ສູ້ກູ້ຊາດຢ່າງອົງອາດກ້າຫານຈົນສາມາດຍາດໄດ້ເອກະລາດ ອະທິປະໄຕ, ປົດປ່ອຍ ປະເທດຊາດໄດ້ຢ່າງສົມບູນ ແລະ ສະຖາປະນາເປັນປະເທດສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975 ຈົນເຖິງປັດຈຸບັນ. (ຂ່າວ: ຄຕພ. ພາບ: ແສງຈັນ)