 |
ໃນພິທີ, ທ່ານ ນາງ ສຸວິຕາ ປະເສີດ ປະທານສະມາຄົມຫັດຖະກຳລາວ ທັງເປັນຫົວໜ້າຄະນະກະກຽມຈັດງານ ໄດ້ເປີດເຜີຍວ່າ: ງານມະຫະກຳສີມືຫັດຖະກຳລາວ ຄັ້ງທີ 25 ນີ້ ຈະຈັດຂຶ້ນເປັນເວລາ 9 ວັນ, ເລີ່ມແຕ່ວັນທີ 31 ຕຸລາ ຫາ 8 ພະຈິກ 2026 ທີ່ສູນວາງສະແດງສິນຄ້າ ລາວ-ໄອເຕັກ (ຕຶກເກົ່າ) ນະຄອນຫຼວງວຽງຈັນ. ງານໃນປີນີ້ມີຄວາມພິເສດ ແລະ ຍິ່ງໃຫຍ່ກວ່າທຸກໆປີ ເນື່ອງຈາກເປັນການສະເຫຼີມສະຫຼອງ ຄົບຮອບ 25 ປີ ຂອງງານມະຫະກຳສີມືຫັດຖະກຳລາວ ແລະ ສະເຫຼີມສະຫຼອງວັນຫັດຖະກຳແຫ່ງຊາດ ຄົບຮອບ 20 ປີ (1 ພະຈິກ).
ງານດັ່ງກ່າວຈັດຂຶ້ນພາຍໃຕ້ຄຳຂວັນ: "ສີໄມ້ລາຍມື ຄື ອຸທິຍານແຫ່ງການທ່ອງທ່ຽວ, 25 ປີ ແຫ່ງການເຕີບໃຫຍ່ ສານສາຍໄຍພູມປັນຍາ ເຊີດຊູຄຸນຄ່າຫັດຖະກຳລາວສູ່ມໍລະດົກໂລກ". ໂດຍມີຈຸດປະສົງຫຼັກເພື່ອສະເຫຼີມສະຫຼອງວັນຫັດຖະກຳແຫ່ງຊາດ, ສົ່ງເສີມພູມປັນຍາ ແລະ ອະນຸລັກຜະລິດຕະພັນຫັດຖະກຳມູນເຊື້ອ, ເປີດໂອກາດໃຫ້ຊາວຊ່າງ ແລະ ຜູ້ປະກອບການຈາກທົ່ວປະເທດໄດ້ເຂົ້າເຖິງຕະຫຼາດ, ແລກປ່ຽນບົດຮຽນ ແລະ ສ້າງລາຍຮັບໃຫ້ກັບຊຸມຊົນ. ນອກຈາກນີ້, ຍັງເປັນການສະໜັບສະໜູນນະໂຍບາຍຂອງລັດຖະບານໃນການແກ້ໄຂຄວາມທຸກຍາກ ແລະ ສ້າງບັນຍາກາດການທ່ອງທ່ຽວໃຫ້ຟົດຟື້ນ.
ພາຍໃນງານຈະມີຫຼາຍກວ່າ 200 ຫ້ອງວາງສະແດງ ຊຶ່ງປະກອບດ້ວຍ 5 ພາກສ່ວນຜະລິດຕະພັນຕົ້ນຕໍ ເຊັ່ນ: ແຜ່ນແພ: ຜ້າໄໝ ແລະ ຜ້າຝ້າຍ, ເຄື່ອງປະດັບ: ເງິນ, ຄຳ ແລະ ແກ້ວປະເສີດ, ເຄື່ອງຈັກສານຫວາຍ ແລະ ໄມ້ປ່ອງ, ຜະລິດຕະພັນວັດທະນະທຳ: ເຄື່ອງປັ້ນດິນເຜົາ, ໄມ້ແກະສະຫຼັກ, ເຄື່ອງດົນຕີພື້ນເມືອງ, ອາຫານພື້ນເມືອງ ແລະ ສະໝຸນໄພ. ພິເສດ: ມີຜະລິດຕະພັນຫັດຖະກຳຈາກບັນດາປະເທດອາຊຽນ ແລະ ຍີ່ປຸ່ນ ເຂົ້າຮ່ວມ. ນອກຈາກການວາງສະແດງ ແລະ ຈຳໜ່າຍສິນຄ້າແລ້ວ, ຍັງມີກິດຈະກຳທີ່ໜ້າສົນໃຈອີກຫຼາຍຢ່າງ ເຊັ່ນ: ກິດຈະກຳຍ່າງເພື່ອສະເຫຼີມສະຫຼອງວັນຫັດຖະກຳລາວ (1 ພະຈິກ), ການປະກວດ "ທິດາຫັດຖະກຳ", ການສາທິດຂັ້ນຕອນການຜະລິດສິນຄ້າຫັດຖະກຳ ຈາກຊ່າງຫັດຖະກຳ 18 ແຂວງທົ່ວປະເທດ, ການຈຳລອງວິຖີຕະຫຼາດບູຮານ, ງານເດີນແບບອາພອນລາວບັນດາເຜົ່າ (ໃນຄ່ຳຄືນວັນທີ 6 ພະຈິກ 2026), ການປະກວດຜະລິດຕະພັນຫັດຖະກຳດີເດັ່ນ, ການສຳມະນາແລກປ່ຽນຄວາມຮູ້, ການສະແດງສິລະປະວັນນະຄະດີ, ແລະ ສອນປະດິດເຄື່ອງທີ່ລະນຶກຈາກວັດຖຸເສດເຫຼືອ.
ໃນຕອນທ້າຍ, ທ່ານ ນາງ ສຸວິຕາ ປະເສີດ ໄດ້ສະແດງຄວາມຂອບໃຈຢ່າງເລິກເຊິ່ງເຖິງບັນດາພາກສ່ວນອຸປະຖຳ ທັງພາກລັດ, ທຸລະກິດ, ອົງການຈັດຕັ້ງສາກົນ, ຕະຫຼອດຮອດສື່ມວນຊົນ ທີ່ໄດ້ຊ່ວຍປະຊາສຳພັນ ແລະ ເຜີຍແຜ່ຂໍ້ມູນຂ່າວສານ ເພື່ອເຊີນຊວນໃຫ້ມວນຊົນທັງພາຍໃນ ແລະ ຕ່າງປະເທດ ເຂົ້າຮ່ວມງານຢ່າງກວ້າງຂວາງ.
(ຂ່າວ: ແສງຈັນ)
ຄໍາເຫັນ