ກຽມເປີດຕະຫຼາດນັດແຮງງານ ສົ່ງເສີມວຽກເຮັດງານທຳໃນທ້າຍເດືອນຕຸລານີ້

ເພື່ອສົ່ງເສີມການມີວຽກເຮັດງານທຳຢູ່ພາຍໃນປະເທດ ແລະ ການສ້າງຄວາມເຂົ້າໃຈໃນການໄປເຮັດວຽກຢູ່ຕ່າງປະເທດໃຫ້ຖືກຕ້ອງ ແລະ ປອດໄພ, ກະຊວງແຮງງານ ແລະ ສະຫວັດດີການສັງຄົມ (ຮສສ) ຮ່ວມກັບ ອົງການຈັດຕັ້ງສາກົນ ເພື່ອການເຄື່ອນຍ້າຍຖິ່ນຖານປະຈຳ ສປປ ລາວ (IOM), ສູນວາງສະແດງສິນຄ້າລາວ-ໄອເຕັກ, ອົງການຜູ້ຕາງໜ້າຜູ້ໃຊ້ແຮງງານ ແລະ ຜູ້ອອກແຮງງານ ໄດ້ຈັດພິທີຖະແຫຼງຂ່າວຕໍ່ສື່ມວນຊົນຂຶ້ນໃນວັນທີ 10 ຕຸລາ ນີ້ ທີ່ສູນການຄ້າໄອເຕັກ. ໂດຍການໃຫ້ກຽດຖະແຫຼງຂ່າວຂອງ ທ່ານ ພົງໄຊສັກ ອິນຖາລາດ ຮອງລັດ ຖະມົນຕີກະຊວງ ຮສສ, ມີທ່ານ ອຸໄທ ເສົາພະຈັນ ຮອງຫົວໜ້າສະຖາບັນພັດທະນາກຳມະບານລາວ ສູນກາງສະຫະພັນກຳມະບານລາວ, ທ່ານ ໄຊບັນດິດ ຣາຊະພົນ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ທ່ານ Joaquim Torranha ອົງການຈັດຕັ້ງສາກົນ ເພື່ອການເຄື່ອນຍ້າຍຖິ່ນຖານປະຈຳ ສປປ ລາວ (IOM) ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
    ທ່ານ ພົງໄຊສັກ ອິນຖາລາດ ກ່າວວ່າ: ການຈັດງານຕະຫຼາດນັດແຮງງານ ເພື່ອສົ່ງເສີມການຈັດຫາງານພາຍໃນປະເທດ ແລະ ການໄປເຮັດວຽກຢູ່ຕ່າງປະເທດແບບຖືກຕ້ອງຕາມກົດໝາຍ (Job Fair) ຊຶ່ງຈະຈັດຂຶ້ນໃນລະຫວ່າງວັນທີ 27-29 ຕຸລາ 2023 ທີ່ສູນວາງສະແດງສິນຄ້າລາວ-ໄອເຕັກ (ຕຶກເກົ່າ). ການຈັດງານດັ່ງ ກ່າວເພື່ອສ້າງໂອກາດໃຫ້ຜູ້ວ່າງງານ ຜູ້ທີ່ຍັງບໍ່ເຄີຍມີວຽກເຮັດມາກ່ອນ ຫຼື ຜູ້ທີ່ກຳລັງກຽມເຂົ້າສູ່ຕະຫຼາດແຮງງານ, ຜູ້ທີ່ເຄີຍເຮັດວຽກມາກ່ອນ ລວມທັງຜູ້ວ່າງງານທີ່ເປັນສະມາຊິກປະກັນສັງຄົມ ໄດ້ເຂົ້າເຖິງຕຳແໜ່ງງານທີ່ມີຢູ່ໃນລະບົບເສດຖະກິດພາຍໃນປະເທດ ເປັນຕຳແໜ່ງງານໃນລະບົບ.
    ພາຍໃນງານມີການຂຶ້ນທະບຽນຜູ້ຊອກວຽກ, ການແນະນໍາຕໍາແໜ່ງງານວ່າງທີ່ຫົວໜ່ວຍແຮງງານນຳມາສະເໜີ, ເປີດໂອກາດໃຫ້ໄດ້ເຂົ້າສຳພາດ ຫຼື ສະໝັກເຂົ້າເຮັດວຽກນຳຜູ້ໃຊ້ແຮງງານຕົວຈິງ ເພື່ອໃຫ້ຜູ້ໃຊ້ແຮງງານຄັດເລືອກເອົາແຮງງານຕາມຕໍາແໜ່ງງານທີ່ຕົນຕ້ອງການ, ມີການບໍລິການໃຫ້ຄຳປຶກສາດ້ານກົດໝາຍ ແລະ ລະບຽບການດ້ານແຮງງານ, ດ້ານປະກັນສັງຄົມ ເປັນຕົ້ນແມ່ນເງື່ອນໄຂການໄດ້ຮັບອຸດໜູນວ່າງງານຂອງຜູ້ວ່າງງານທີ່ເປັນສະມາຊິກປະກັນສັງຄົມ ພ້ອມດຽວກັນນັ້ນກໍຈະມີກິດຈະກຳການໂຄສະນາ, ເຜີຍແຜ່ວິທີການ ລະບຽບການກ່ຽວກັບການໄປເຮັດວຽກຢູ່ຕ່າງປະເທດທີ່ຖືກຕ້ອງ ແລະ ປອດໄພໃຫ້ແກ່ຜູ້ທີີ່ສົນໃຈ. ນອກຈາກນີ້ ຍັງເປັນການເພີ່ມທະວີກົນໄກການປະສານງານ ແລກປ່ຽນຂໍ້ມູນຂ່າວສານລະຫວ່າງກະຊວງ ຮສສ ແລະ ຫົວໜ່ວຍແຮງງານດ້ວຍກັນ. ຄາດວ່າຈະມີການຕັ້ງຫ້ອງວາງສະແດງໃຫ້ບໍລິການຂຶ້ນທະບຽນຊອກວຽກ, ໃຫ້ຄໍາປຶກສາ, ສໍາພາດເອົາແຮງງານທັງໝົດ 120 ຫ້ອງວາງສະແດງ. ໃນນີ້ມີ 70 ຫົວໜ່ວຍແຮງງານ, 48 ວິສາຫະກິດບໍລິການຈັດຫາງານ, 10 ຫ້ອງວາງສະແດງຂອງຄູ່ຮ່ວມງານຈາກພາກລັດ ແລະ ອົງການຈັດຕັ້ງຕ່າງໆ; ສຳລັບປະເທດພວກເຮົາ ງານຕະຫຼາດນັດແຮງງານຍັງຖືວ່າເປັນປະກົດການ ຫຼື ວິທີການໃໝ່ທີ່ຍັງບໍ່ປະສົບຜົນສຳເລັດເທົ່າທີ່ຄວນ ຈາກການຈັດໃນຜ່ານມາ. ແຕ່ເຖິງຢ່າງໃດກໍຕາມ, ຂ້າພະເຈົ້າເຊື່ອໝັ້ນວ່າຖ້າຫາກທຸກພາກສ່ວນມີສ່ວນຮ່ວມຢ່າງຕັ້ງໜ້າ ແລະ ມີຄວາມຮັບຜິດຊອບຮ່ວມກັນຢ່າງແທ້ຈິງ ກໍຈະເຮັດໃຫ້ການຈັດງານໃນຄັ້ງນີ້ໄດ້ຮັບຜົນສຳເລັດຕາມຈຸດປະ ສົງທີ່ວາງໄວ້ ຄາດວ່າຈະມີຜູ້ເຂົ້າມາຮ່ວມງານບໍ່ຕໍ່າກ່ວາ 1.000 ຄົນ. ດັ່ງນັ້ນ, ຮຽກຮ້ອງມາຍັງພໍ່ແມ່ປະຊາຊົນຊາວນະຄອນຫຼວງວຽງຈັນ ຫຼື ແຂວງໃກ້ຄຽງ, ສະຖາບັນການສຶກສາ, ສະຖານພັດທະນາສີມືແຮງງານ, ສູນຝຶກວິຊາຊີບທັງພາກລັດ ແລະ ເອກະຊົນ, ນັກຮຽນ, ນັກສຶກສາ, ຜູ້ອອກແຮງງານທຸກທົ່ວໜ້າ ລວມທັງບັນດາຫົວ     ໜ່ວຍທຸລະກິດຂອງທຸກຂະແໜງການ ຈົ່ງເຫັນໄດ້ຄວາມສຳຄັນ ແລະ ເຂົ້າຮ່ວມງານໃນຄັ້ງນີ້ດ້ວຍ. 
ຂ່າວ-ພາບ: ບຸນຕອມ