ກິດຈະກໍາພົບກັນຢູ່ຈ່ຽງໜານໃນລະດູໃບໄມ້ປົ່ງ-ເທສະການໂຄມໄຟສະເຫຼີມ ສະຫຼອງບຸນກຸດຈີນ

ສະຫຼອງບຸນກຸດຈີນ” ຂຶ້ນໃນວັນທີ 3-4 ມີນາ ນີ້ ທີ່ສູນວັດທະນະທໍາຈີນ ປະຈໍາ ສປປ ລາວ, ພາຍໃນກິດຈະກໍາປະກອບມີການສໍາຜັດວັດທະນະທໍານາມມະທໍາຫຼາຍລາຍການເຊັ່ນ: ການພິມຮູບມຸງຄຸນປີໃໝ່, ການປັ້ນຕຸກກະຕາເຂົ້າ, ການແຕ້ມຮູບດ້ວຍນໍ້າຕານ, ໂຄມໄຟສິລະປະ, ການສະແດງການເຊີດຕຸກກະຕາ, ການຮ້ອງເພງລະຄອນງິ້ວວູ້ຈີ້, ວາງສະແດງສິລະປະການຊົງຊາ ແລະ ເຄື່ອງເຊລາມິກ ຈາກແຂວງເຈີຈ່ຽງ. ໂດຍມີສະມາຄົມ 67 ຊ່ວຍເຫຼືອກັນ ແລະ ພັດທະນາສັງຄົມ, ສະຖາບັນ ຣັຕນະ ບໍລິຫານ ທຸລະກິດ, ຄະນະອັກສອນສາດ ພາກວິຊາພາສາຈີນ, ໂຮງຮຽນປີຊາໄຊ 2 ແລະ ສະຖາບັນພາສາຕ່າງປະເທດໂລໂກສ.

ທ່ານ ຫຼົວເຫວິ້ຍຈ້ຽງ ຫົວໜ້າສູນວັດທະນະທໍາຈີນ ປະຈໍາ ສປປ ລາວ ກ່າວວ່າ: ສູນວັດທະນະທໍາຈີນ ປະຈໍາ ສປປ ລາວ ແມ່ນເຕັມໄປດ້ວຍບັນຍາກາດອັນແສນອົບອຸ່ນແຫ່ງລະດູບານໃໝ່. ພວກເຮົາໄດ້ຂ້າມນໍ້າຂ້າມພູເຂົາ ເພື່ອເຕົ້າໂຮມກັນ ໃນກິດຈະກໍາ “ພົບກັນຢູ່ຈ່ຽງໜານ”, ເພື່ອຈຸດໂຄມໄຟທີ່ອົບອຸ່ນ ແລະ ສະຫວ່າງທີ່ສຸດ ໃຫ້ກັບ “ງານສະເຫຼີມສະຫຼອງບຸນກຸດຈີນ” ປີ 2026. ກ່ອນອື່ນ, ອະນຸຍາດຕາງໜ້າຝ່າຍເຈົ້າພາບຈັດງານ, ສະແດງການອວຍພອນເທສະການໂຄມໄຟຢ່າງຈິງໃຈມາຍັງບັນດາ ທ່ານ ທີ່ເຂົ້າຮ່ວມງານໃນຄັ້ງນີ້ຈົ່ງມີຄວາມສຸກສົມຫວັງທຸກປະການ.

ເທດສະການໂຄມໄຟແມ່ນການປິດທ້າຍບຸດກຸດຈີນ ແລະ ຈຸດເລີ່ມຕົ້ນແຫ່ງແສງສະຫວ່າງໃນປັດຊະຍາດ້ານເວລາຂອງປະຊາຊົນຈີນ, ການສະເຫຼີມສະຫຼອງ “ປີໃໝ່” ແມ່ນເລີ່ມຈາກວັນສົ່ງທ້າຍປີເກົ່າ, ແຕ່ວ່າຄວາມສົມບູນ ແລະ ຄວາມຫວັງຂອງ “ປີໃໝ່” ເລີ່ມຈາກຢວນຊ່ຽວ ຫຼື “ເທສະການໂຄມໄຟ”. ເທສະການໂຄມໄຟ ແມ່ນໄລຍະເວລາດວງຈັນເຕັມດວງຄັ້ງທໍາອິດຂອງປີໃໝ່, ມີຄວາມໝາຍທີ່ງົດງາມຂອງການອໍາລາປີເກົ່າຕ້ອນຮັບປີໃໝ່ ແລະ ຄໍາອະທິຖານໃຫ້ມີອະນາຄົດທີ່ດີ. ມີໂຄມໄຟບໍ່ມີດວງຈັນກໍບໍ່ມ່ວນຊື່ນ, ມີດວງຈັນບໍ່ມີໂຄມໄຟບໍ່ແມ່ນບຸນກຸດຈີນ ເຖິງແມ່ນພວກເຮົາຈະຍັງບໍ່ເຫັນແສງຈັນ, ແຕ່ຢູ່ຫ້ອງປະຊຸມທີ່ແສງຍາມເຊົ້າໄດ້ສາດສ່ອງເຂົ້ານີ້, ກໍເປັນສັນຍາລັກແຫ່ງການເລີ່ມຕົ້ນປີໃໝ່ ແລະ ການເລີ່ມຕົ້ນຂອງທຸກສິ່ງ. ພວກເຮົາເລືອກເຕົ້າໂຮມກັນໃນໄລຍະແສງແດດຍາມເຊົ້າ, ເພື່ອເລີ່ມຕົ້ນເວລາທີ່ສົດໃສ ແລະ ສາມັກຄີປອງດອງຂອງປີດ້ວຍຈິດໃຈທີ່ປ່ຽມລົ້ນ, ປິດທ້າຍບຸນກຸດຈີນດ້ວຍຄວາມຫວັງ.

ປີ 2026 ແມ່ນ “ປີມິດຕະພາບລາວ-ຈີນ” ທີ່ມີຄວາມໝາຍສໍາຄັນເປັນພິເສດ. ສິດເກົ່າໂຮງຮຽນ 67 ແມ່ນສ່ວນສໍາຄັນຂອງມິດຕະພາບລາວ-ຈີນ, ແມ່ນບົດກະວີໄວໜຸ່ມທີ່ມີຊີວິດຊີວາທີ່ສຸດ, ໄດ້ສະແດງເຖິງຈິດໃຈ “ອຸດົມການຮ່ວມກັນ, ຮ່ວມຊາຕາກໍາດຽວກັນ”. ໃນອະດີດ, ພວກທ່ານເປັນນັກຮຽນເມືອງໜານໜິງທີ່ປ່ຽມລົ້ນໄປດ້ວຍພະລັງ ແລະ ຄວາມທະເຍີທະຍານ; ເປັນຂົວຕໍ່ ແລະ ເສົາຫຼັກສໍາຄັນແຫ່ງການພັດທະນາ ສປປ ລາວ ແລະ ເຊື່ອມໂຍງມິດຕະພາບລາວ-ຈີນ. ສິດເກົ່າໄດ້ທຸ້ມເທຫຍາດເຫື່ອ, ເຮັດໃຫ້ມິດຕະພາບເຕີບໃຫຍ່ເປັນຕົ້ນໄມ້ທີ່ສູງໃຫຍ່, ພວກທ່ານຄືຜູ້ກໍ່ຕັ້ງປະຫວັດສາດ, ຍິ່ງເປັນຜູ້ນໍາພາການຮ່ວມມືໃນອະນາຄົດ.

ທ່ານກ່າວຕື່ມວ່າ: ມົນສະເໜ່ຈ່ຽງໜານພວກເຮົາສາມາດສໍາຜັດກັບຄວາມງາມຂອງເຈີຈ່ຽງ “ພົບກັນຢູ່ຈ່ຽງໜານ”, ຕ້ອງສະແດງຄວາມຂອບໃຈການສະໜັບສະໜູນຈາກເພື່ອນມິດສະຫາຍຈາກຫໍວັດທະນະທໍາແຂວງເຈີຈ່ຽງ. ເຖິງແມ່ນແຂວງເຈີຈ່ຽງ ແລະ ປະເທດລາວ ຈະຖືກຂັ້ນກາງດ້ວຍພູເຂົາ ແລະ ແມ່ນໍ້າ, ແຕ່ວັດທະນະທໍາ ແລະ ຈິດໃຈເຊື່ອມໂຍງເຖິງກັນ. ກິດຈະກຳຄັ້ງນີ້, ນັກສະແດງສິລະປະຈາກຫໍວັດທະນະທໍາແຂວງເຈີຈ່ຽງໄດ້ນໍາເອົາຄວາມງົດງາມ ຄວາມມີຊິວິດຊີວາ ແລະ ຄວາມຮູ້ສຶກອັນເລິກເຊິ່ງຂອງຈ່ຽງໜານມາປະເທດລາວ. ລາຍການມາສະແດງ, ປຽບດັ່ງສາຍລົມໃນ “ຍາມເຊົ້າລະດູໃບໄມ້ປົ່ງທີ່ຈ່ຽງນານ”, ທີ່ໄດ້ເຕີມເຕັມຄວາມງົດງາມ ແລະ ຊີວິດຊີວາໃຫ້ກັບງານໃນຄັ້ງນີ້.

ທ່ານ ນາງ ສົມສະນິດ ແກ້ວດວງດີ ປະທານສະມາຄົມ 67 ຊ່ວຍເຫຼືອກັນ ແລະ ພັດທະນາສັງຄົມ ກ່າວວ່າ: ສາຍພົວພັນສອງຊາດລາວ-ຈີນ ມີໄດ້ມາແຕ່ດຶກດຳບັນ, ຍ້ອນສອງປະເທດ ມີຊາຍແດນຕິດຈອດກັນ, ມີຮີດຄອງປະເພນີຄ້າຍຄືກັນ, ໃຊ້ນໍ້າຂອງຮ່ວມກັນ, ປຽບເໝືອນບ້ານພີ່ເມືອງນ້ອງ, ໄປຈີນກໍໄດ້ກິນປາ ມາລາວກໍໄດ້ກິນເຂົ້າ, ໄປມາຫາສູ່ກັນຕະຫຼອດ, ຈົນມາເຖິງປີ 1961 ສອງພັກ-ສອງລັດ ລາວ-ຈີນ, ຈີນ-ລາວ ໄດ້ຕົກລົງຮ່ວມກັນສ້າງສາຍພົວພັນການທູດ ລາວ-ຈີນ ຂຶ້ນໃນວັນທີ 25/4/1961, ປີນີ້ພໍດີຄົບຮອບ 65 ປີ. ກອ່ນໜ້ານີ້ 50 ກວ່າປີຫຼັງ ຊຶ່ງແມ່ນໄລຍະທີ່ປະຊາຊົນລາວ ດໍາເນີນການຕໍ່ສູ້ຕ້ານຈັກກະພັດເຂົ້າມາຮຸກຮານ, ດັ່ງນັ້ນການນໍາພັກ-ລັດ ໄດ້ສະເໜີໄປຍັງລັດຖະບານ ສປ ຈີນ ຮັບເອົາ ລູກ-ຫຼານພະນັກງານປະຕິວັດໄປຮໍ່າຮຽນຢູ່ເມືອງໜານໜິງ ແຂວງກວາງຊີ ສປ ຈີນ ແລະ ໄດ້ເຊັນສັນຍາກັນໃນປີ 1967, ຈຶ່ງໃສ່ຊື່ວ່າ: “ໂຮງຮຽນນ້ອງນ້ອຍ 67" ໃນລະດັບຊັ້ນປະຖົມສອນພາສາລາວແມ່ນຄູຄົນລາວ ແລະ ຄູ ຄົນຈີນແມ່ນສອນກິດຈະກຳຕ່າງໆເຊັ່ນ: ກິລາ, ພໍ່ຄົວ-ແມ່ຄົວ, ຄູແປພາສາ ແລະ ອື່ນໆ, ເລີ່ມສົ່ງນັກຮຽນລາວໄປ ຮຽນໃນເດືອນ 3/1968, ຄູ-ອາຈານ ແລະ ນັກຮຽນລາວທັງໝົດມີ 1,074 ຄົນ, ຫຼັງຮຽນຈົບ ປ.4 ແລ້ວ ໄດ້ສົ່ງກັບປະເທດລາວ, ເລີ່ມປີ 1969-1976 ລວມມີ 8 ລຸ້ນ.

ປັດຈຸບັນນີ້ນັກຮຽນເຫຼົ່ານັ້ນໄດ້ກາຍເປັນພະນັກງານສືບທອດພາລະກິດຂອງການປະຕິວັດລາວ, ເປັນພະນັກງານຫຼັກແຫຼ່ງນໍາພາ ແລະ ເປັນການນໍາໃນລະດັບສູງຫຼາຍທ່ານ. ນັບແຕ່ຂັ້ນກຳມະການກົມການເມືອງ, ກຳມະການສູນກາງພັກ, ລັດຖະມົນຕີ, ຫົວໜ້າກົມ, ພະແນກການ ແລະ ອໍານວຍການບໍລິສັດຕ່າງໆ.

ເຖິງວ່າເທສະການວັນກຸດຈີນ ໄດ້ຜ່ານໄປໄລຍະໜຶ່ງແລ້ວ, ແຕ່ຄວາມຮູ້ສຶກທີ່ປະທັບໃຈແມ່ນ ຍັງຢູ່ໃນ ຄວາມຊົງຈໍາຂອງປະຊາຊົນຈີນ, ໃນໂອກາດສະມາຄົມ 67 ພວກເຮົາ ໄດ້ເຂົ້າຮ່ວມງານກິດຈະກຳພາຍໃຕ້ຫົວຂໍ້ “ພົບກັນຢູ່ຈ່ຽງໜານໃນລະດູໃບໄມ້ປົ່ງ-ເທສະການໂຄມໄຟສະເຫຼີມສະຫຼອງບຸນກຸດຈີນໃນຄັ້ງນີ້, ພວກເຮົາຈະໄດ້ເຫັນການສະແດງ, ໄດ້ຮຽນຮູ້, ໄດ້ສໍາຜັດເຖິງຮີດຄອງປະເພນີ, ສິລະປະວັດທະນະທຳ ແລະ ສະຖານທີ່ທອງທ່ຽວ ຕ່າງໆຂອງເຂດຈ່ຽງໜານ ແລະ ແຕ່ລະເຂດແຄວ້ນ ຂອງ ສປ ຈີນ ອັນກ້ວາງໃຫ່ຍໄຟສານ ທີ່ມີວັດທະນະທຳ ແຕກຕ່າງກັນໄປ. ຜ່ານງານກິດຈະກໍາໃນຄັ້ງນີ້, ໄດ້ເຮັດໃຫ້ພວກເຮົາໄດ້ຮັບກິ່ນອາຍອັນຫອມຫວນຂອງວິທີການຊົງຊາ, ສໍາຜັດກັບການສະແດງສິລະປະຕາມແບບທີ່ເປັນເອກະລັກໄປພ້ອມກັບການຊົມວາງສະແດງທີ່ໜ້າປະທັບ.

(ຂ່າວ: ຕຸໄລເພັດ)