 |
ໃນວັນທີ 28 ກໍລະກົດ ນີ້, ກົມໂຄສະນາ ຄະນະໂຄສະນາອົບຮົມສູນກາງພັກ ໄດ້ເປີດຊຸດຝຶກອົບຮົມ ຄວາມຮູ້ພື້ນຖານກ່ຽວກັບການຜະລິດສາລະຄະດີ (ການຂຽນບົດ, ການຖ່າຍທໍາ ແລະ ຕັດຕໍ່) ຢູ່ຫ້ອງປະຊຸມ ຄອສພ ໃຫ້ກຽດເຂົ້າຮ່ວມພິທີເປີດ ໂດຍ ທ່ານ ບົວໄລ ພານຸວົງ ຄະນະພັກ ຫົວໜ້າກົມໂຄສະນາ, ມີທ່ານຫົວໜ້າກົມກວດກາ, ຜູ້ຕາງໜ້າຈາກກົມຈັດຕັ້ງ, ຫ້ອງການ, ກົມສື່ມວນຊົນ, ຄູ-ອາຈານ ຈາກໂທລະພາບແຫ່ງຊາດລາວ, ຂ່າວສານປະເທດລາວ, ມີນັກສໍາມະນາກອນຈາກກົມໂຄສະນາ ແລະ ພາກສ່ວນທີ່ກ່ຽວຂ້ອງເຂົ້າຮ່ວມທັງໝົດ ຈໍານວນ 37 ທ່ານ ຍິງ 14 ທ່ານ.
ຈຸດປະສົງເພື່ອແນໃສ່ຍົກສູງຄວາມຮູ້ຟື້ນຖານທາງດ້ານທິດສະດີ ແລະ ເຕັກນິກກ່ຽວກັບການຖ່າຍພາບນິ້ງ, ການຖ່າຍວີດີໂອ ໃຫ້ແກ່ພະນັກງານກົມໂຄສະນາ ແລະ ເພື່ອນຮ່ວມງານ; ຍົກລະດັບຄວາມຮູ້ຄວາມສາມາດການຂຽນບົດ, ການສ້າງ ແລະ ການຕັດຕໍ່ ສາລະຄະດີ ທັງແບບສັັ້ນ ແລະ ແບບຍາວກ່ຽວກັບແນວທາງແຜນນະໂຍບາຍຂອງພັກ,ລະບຽບກົດໝາຍຂອງລັດ, ບົດຮຽນໃນການສ້າງເສດຖະກິດຄອບຄົວ ແລະ ສາລະຄະດີອື່ນໆ ຮັບໃຊ້ໃຫ້ແກ່ວຽກງານໂຄສະນາເຄື່ອນທີ່, ເຜີຍແຜ່ຜ່ານສື່ອອນລາຍຕ່າງໆ; ເພື່ອສ້າງການຫັນປ່ຽນຮູບແບບໃນການໂຄສະນາແນວທາງແຜນນະໂຍບາຍຂອງພັກ,ລະບຽບກົດໝາຍຂອງລັດ ກໍຄືບັນດາມະຕິ-ຄໍາສັ່ງຕ່າງໆ ຂອງພັກ-ລັດວາງອອກ ໃຫ້ມີຫຼາຍສີສັນ, ຫຼາຍແພລັດຟອມເປັນຕົ້ນແມ່ນ: Facebook, Youtube, Tiktok ເພື່ອໃຫ້ສາມາດເຂົ້າເຖິງເປົ້າໝາຍຕ່າງໆ ໃນສັງຄົມຢ່າງກວ້າງຂວາງ ແລະ ວ່ອງໄວ.
 |
ທ່ານ ບົວໄລ ພານຸວົງ ຍັງໄດ້ກ່າວຢໍ້າວ່າ: ຮຽກຮ້ອງໃຫ້ນັກສໍາມະນາກອນທຸກທ່ານ ປະຕິບັດໂມງເວລາຂຶ້ນຫ້ອງຕາມວາລະ ທີ່ຄະນະຮັບຜິດຊອບວາງອອກ, ເອົາໃຈໃສ່ຖອດຖອນບົດຮຽນນໍາອາຈານໃຫ້ໄດ້ຫຼາຍທີ່ສຸດ ແລະ ເພື່ອນໍາມາໝູນໃຊ້ເຂົ້າໃນການປະຕິບັດວຽກງານຕົວຈິງ ໃຫ້ມີຄຸນນະພາບສູງ; ຊຸດຝຶກອົບຮົມຄັ້ງນີ້ ຈະໄດ້ດໍາເນີນໄປຈົນຮອດວັນທີ 31 ກໍລະກົດ 2026 ຈຶ່ງຈະປິດລົງ.
(ຂ່າວ: ພັນແສງ; ພາບ: ຫວ່າງ)
ຄໍາເຫັນ