 |
ທ່ານ ພັອ ສົມພຽນ ມີທາຮັກ ຫົວໜ້າກົມຕຳຫຼວດຄວບຄຸມລະບົບວົງຈອນປິດ ໃຫ້ສໍາພາດຕໍ່ສື່ມວນຊົນ ປກສ ໃນວັນທີ 4 ມິຖຸນາ 2026 ວ່າ: ໃນໄລຍະ 1 ປີຜ່ານມາ, ກົມຕໍາຫຼວດຄວບຄຸມລະບົບວົງຈອນປິດ ໄດ້ສຸມໃສ່ວຽກງານສຶກສາອົບຮົມການເມືອງ-ນຳພາແນວຄິດ ນາຍ ແລະ ພົນຕໍາຫຼວດ ໃຫ້ມີຄວາມອຸ່ນອຽນທຸ່ນທ່ຽງ, ພ້ອມທັງຕັ້ງໜ້າເຄື່ອນໄຫວປະຕິບັດໜ້າທີ່ວິຊາສະເພາະຕະຫຼອດ 24 ຊົ່ວໂມງ ໂດຍສາມາດຮັບແຈ້ງເຫດສຸກເສີນຜ່ານສາຍດ່ວນ 1191 ໄດ້ທັງໝົດ 9.078 ສາຍ. ໃນນີ້, ອຸບັດເຫດ 474 ສາຍ, ມົ້ວສຸມສິ່ງມຶນເມົາ-ຢາເສບຕິດ 144 ສາຍ, ອາລະວາດຄອບຄົວ 169 ສາຍ, ຄ້າຂາຍຢາເສບຕິດ 43 ສາຍ, ອັກຄີໄພ 12 ສາຍ, ຫຼິ້ນການພະນັນ 22 ສາຍ, ສໍ້ໂກງ 31 ສາຍ, ກຸ່ມແກ້ງກວນເມືອງ 37 ສາຍ, ຄາດຕະກຳ 1 ສາຍ, ທຳຮ້າຍຮ່າງກາຍ 16 ສາຍ, ຂົ່ມຂູ່ 4 ສາຍ, ປຸ້ນຊັບ 20 ສາຍ, ລັກຊັບ 38 ສາຍ, ຊີງຊັບ 16 ສາຍ, ງັດແງະລົດ 1 ສາຍ, ຂໍຄຳປຶກສາ-ສອບຖາມ ແລະ ຂໍຄວາມຊ່ວຍເຫຼືອ 413 ສາຍ; ໄດ້ປະສານສົມທົບ ແລະ ສັ່ງການໄປຍັງ 19 ສະຖານີ ໃນ 8 ຕົວເມືອງ ເພື່ອແກ້ໄຂເຫດການໄດ້ 471 ຄັ້ງ, ອອກເຄື່ອນໄຫວລາດຕະເວນ 3,667 ຄັ້ງ ແລະ ສາມາດຕິດຕາມແກ້ໄຂເຫດການ-ຄົ້ນຫາເປົ້າໝາຍໄດ້ 138 ເລື່ອງ (ອຸບັດເຫດ 63 ເລື່ອງ, ລັກຊັບ 38 ເລື່ອງ, ຊີງຊັບ 16 ເລື່ອງ, ທຳຮ້າຍຮ່າງກາຍ 2 ເລື່ອງ, ງັດແງະລົດ 1 ເລື່ອງ ແລະ ເປົ້າໝາຍອື່ນໆ 18 ເລື່ອງ) ພ້ອມທັງໄດ້ດຳເນີນການກວດກາສ້ອມແປງຕູ້ເຕືອນໄພໄຟອໍານາດ 295 ຈຸດ, ຕູ້ສາຍ-ຕໍ່ສາຍ 61 ຈຸດ, ປ້າຍບ້ານ-ເສັ້ນທາງ 26 ຈຸດ ແລະ ສ້ອມແປງກ້ອງວົງຈອນປິດ-ສະຖານີ 22 ຄັ້ງ ເພື່ອຮັບປະກັນໃຫ້ລະບົບກ້ອງວົງຈອນປິດ 1,152 ໜ່ວຍ ແລະ ກ້ອງຕູ້ຍາມ 40 ຈຸດ ເຄື່ອນໄຫວໄດ້ຢ່າງມີປະສິດທິພາບ.
ທິດທາງແຜນການໃນຕໍ່ໜ້າ, ສືບຕໍ່ສຸມໃສ່ແກ້ໄຂບັນຫາລະບົບໂທລະພາບວົງຈອນປິດທີ່ເປ່ເພໃນປັດຈຸບັນ ຊຶ່ງມີສາເຫດມາຈາກໄລເຊັນ (License) ໝົດອາຍຸ, ລະບົບເຄືອຂ່າຍ Network ເກົ່າ ແລະ ຂາດງົບປະມານ ໂດຍຈະເລັ່ງປ່ຽນຖ່າຍອຸປະກອນທີ່ຊຸດໂຊມ ເຊັ່ນ: ແຜ່ນພາບ, ໝໍ້ໄຟສໍາຮອງ ແລະ ສາຍສັນຍານຕ່າງໆ, ພ້ອມທັງສະເໜີຂັ້ນເທິງຍົກລະດັບລະບົບຊອບແວ (Software) ໄປເປັນໂປຣແກຣມເບິ່ງກ້ອງ (DSS PRO), ຍົກລະດັບລະບົບກ້ອງຖ່າຍປ້າຍທະບຽນລົດໃຫຍ່ ແລະ ຍົກລະດັບລະບົບເຄືອຂ່າຍ Network, Core Switch ໃຫ້ມີຄວາມທັນສະໄໝຍິ່ງຂຶ້ນ, ສືບຕໍ່ພັດທະນາໂຄງຮ່າງພື້ນຖານ, ແຜນຜັງລວມທາງດ້ານເຕັກນິກ ແລະ ການຄຸ້ມຄອງຈັດຕັ້ງໃຫ້ມີປະສິດທິພາບ, ພ້ອມທັງເຮັດບົດລາຍງານສະເໜີຂັ້ນເທິງ ເພື່ອຕິດຕາມກ້ອງວົງຈອນປິດເພີ່ມເຕີມໃນຈຸດທີ່ສຳຄັນ ແລະ ຈຸດຫຼໍ່ແຫຼມ ໃນ 8 ຕົວເມືອງ ພາຍໃນນະຄອນຫຼວງວຽງຈັນ ຈໍານວນ 415 ໜ່ວຍ ຕາມແຜນການທີ່ວາງໄວ້ໃຫ້ສໍາເລັດ.
ສ່ວນຢູ່ບັນດາແຂວງ ປັດຈຸບັນໄດ້ນໍາເຂົ້າປ້ອງກັນກອງປະຊຸມໃຫຍ່ 3 ຂັ້ນ ແລະ ສົ່ງພະນັກງານລົງສໍາຫຼວດແລ້ວ 4 ແຂວງພາກໃຕ້ ແລະ ພວມຂຶ້ນແຜນລົງສໍາຫຼວດອີກ 4 ແຂວງພາກເໜືອ ເພື່ອແນໃສ່ເຮັດໃຫ້ລະບົບວົງຈອນປິດ ໄດ້ຮັບການຈັດຕັ້ງຜັນຂະຫຍາຍ ແລະ ນຳໃຊ້ເຂົ້າໃນການຮັກສາຄວາມສະຫງົບ ຢ່າງເປັນລະບົບໃນຂອບເຂດທົ່ວປະເທດ ຢ່າງມີຜົນສຳເລັດ.
ຄໍາເຫັນ