ກໍາມະການສູນກາງພັກເລຂາຄະນະບໍລິຫານງານພັກ ຫົວໜ້າອົງການໄອຍະການປະຊາຊົນສູງສຸດ, ມີສະຫາຍຮອງເລຂາ, ຄະນະປະຈໍາພັກ ແລະ ບັນດາສະຫາຍຄະນະບໍລິຫານງານພັກ ເຂົ້າຮ່ວມ.
ຈຸດປະສົງກອງປະຊຸມ ໄດ້ພ້ອມກັນປຶກສາຫາລື ຄົ້ນຄວ້າປະກອບຄໍາຄິດຄໍາເຫັນ, ຕີລາຄາຄວາມຮັບຜິດຊອບການເມືອງ ຂອງຄະນະພັກຂັ້ນຕ່າງໆ ໃນໄລຍະ 3 ເດືອນຜ່ານມາ ປີ 2024 ເພື່ອໃຫ້ເຫັນໄດ້ດ້ານດີ, ຜົນໄດ້ຮັບ, ດ້ານອ່ອນ, ຂໍ້ຄົງຄ້າງ, ຂໍ້ຂາດຕົກບົກຜ່ອງ ແລະ ສາເຫດໃນການນໍາພາ ຂອງຄະນະພັກແຕ່ລະຂັ້ນ ແລະ ວາງທິດທາງວຽກງານຈຸດສຸມ 3 ເດືອນຕົ້ນປີ 2025 ຂອງຄະນະບໍລິຫານງານພັກ ກ່ຽວກັບວຽກງານກົງຈັກການຈັດຕັ້ງ - ພະນັກງານ, ແບ່ງປັນຄວາມຮັບຜິດຊອບຊີ້ນໍາ ອົງການໄອຍະການປະຊາຊົນທ້ອງຖິ່ນ ໃຫ້ບັນດາສະຫາຍຄະນະບໍລິຫານງານພັກ, ຫົວໜ້າຫ້ອງການ, ຫົວໜ້າກົມ ເອົາໃຈໃສ່ວຽກງານສຶກສາອົບຮົມການເມືອງ-ນໍາພາແນວຄິດ ໃຫ້ແກ່ສະມາຊິກພັກ, ພະນັກງານ-ລັດຖະກອນ ຂັ້ນສູນກາງ ແລະ ທ້ອງຖິ່ນ ຢ່າງໜັກແໜ້ນ ໂດຍຖືເອົາການຈັດຕັ້ງຜັນຂະຫຍາຍວາລະແຫ່ງຊາດເປັນວຽກງານປຸກລະດົມດ້ານທັດສະນະແນວຄິດຂອງສະມາຊິກພັກ, ພະນັກງານ ແລະ ໄດ້ຈັດຕັ້ງຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ XI, ມະຕິກອງປະຊຸມໃຫຍ່ ຄັ້ງທີ V ຂອງອົງການໄອຍະການປະຊາຊົນສູງສຸດ, ມະຕິກອງປະຊຸມໃຫຍ່ຂອງບັນດາໜ່ວຍພັກ ຂອງ 3 ອົງການຈັດຕັ້ງມະຫາຊົນໃຫ້ບາດກ້າວບຸກລະທຸ; ປັບປຸງກົງຈັກການຈັດຕັ້ງຢູ່ອົງການໄອຍະການປະຊາຊົນ ຂັ້ນສູນກາງ ຮອດ ທ້ອງຖິ່ນ ໃນການບັນຈຸສັບຊ້ອນພະນັກງານຂັ້ນຕ່າງໆ; ການສ້າງກົນໄກຄົ້ນຄວ້າແກ້ໄຂຄະດີ ແລະ ຄຳຮ້ອງໃຫ້ໄດ້ທັງຈຳນວນ ແລະ ຄຸນນະພາບ; ວຽກງານການປະກາດອະໄພຍະໂທດ ປະຈຳປີ 2024 ໃນຂອບເຂດທົ່ວປະເທດແລະ ການປັບປຸງລັດຖະບັນຍັດຂອງປະທານປະເທດ; ວຽກງານປະສານງານກົນໄກການດຳເນີນຄະດີກັບພາກສ່ວນຕ່າງໆ, ການຂຽນປຶ້ມຄູ່ມືດຳເນີນຄະດີປົກຄອງ, ປັບປຸງຮ່າງບົດບັນທຶກຮ່ວມກັບພາກສ່ວນອື່ນໆ; ວຽກງານລົງຕິດຕາມ ແລະ ຊຸກຍູ້ໂຄງການກໍ່ສ້າງຕັ້ງອົງການໄອຍະການເຂດປະຈໍາເມືອງ ເພື່ອໃຫ້ໄດ້ທັງດ້ານປະລິມານ ແລະ ມີຄຸນນະພາບມີບາດກ້າວດີຂຶ້ນຕາມລໍາດັບ. ພ້ອມນັ້ນ ໄດ້ຊີ້ໃຫ້ເຫັນການຊີ້ນໍາ-ນໍາພາວຽກງານຮອບດ້ານຂອງ ຄະນະບໍລິຫານງານພັກ ອົງການໄອຍະການປະຊາຊົນສູງສຸດ ໃນສາມເດືອນຜ່ານມາ ແມ່ນມີຜົນສໍາເລັດອັນໜ້າເພິ່ງພໍໃຈ; ຄະນະບໍລິຫານງານພັກ, ສະມາຊິກພັກ ແລະ ພະນັກງານ-ລັດຖະກອນ ທົ່ວລະບົບອົງການໄອຍະການປະຊາຊົນ ມີຄວາມອຸ່ນອ່ຽນທຸ່ນທ່ຽງ, ມີຄວາມສາມັກຄີເປັນປຶກແຜ່ນ ພາຍໃຕ້ການນຳພາຂອງອົງຄະນະພັກ ແລະ ເປັນກຳລັງແຮງປະກອບສ່ວນໃຫ້ອົງຄະນະພັກ ນຳພາຍາດເອົາຜົນສຳເລັດໃໝ່ ຍິ່ງໃຫຍ່ກວ່າເກົ່າ.
ໃນໂອກາດດັ່ງກ່າວ, ສະຫາຍປະທານກອງປະຊຸມ ໄດ້ໃຫ້ທິດຊີ້ນໍາໃຫ້ເພີ່ມທະວີຄວາມຮັບຜິດຊອບໃນການຊີ້ນຳ-ນຳພາ, ປັບປຸງກົງຈັກການຈັດຕັ້ງ, ປັບປຸງແບບແຜນວິທີ ນຳພາ-ແບບແຜນວິທີເຮັດວຽກ, ວຽກງານແຂ່ງຂັນ-ຍ້ອງຍໍ, ເພີ່ມທະວີວຽກງານກວດກາ, ວຽກງານວິຊາສະເພາະ, ສ້າງກົນໄກປະສານງານ ໃຫ້ໂລ່ງລ່ຽນ ແລະ ມີປະສິດທິຜົນ. ພ້ອມທັງຮຽກຮ້ອງໃຫ້ບັນດາສະຫາຍຄະນະບໍລິຫານງານພັັກ ຈົ່ງຍົກສູງຄວາມຮັບຜິດຊອບຂອງຕົນ ໃນການຊີ້ນໍາ-ນໍາພາ ຊຶ່ງກ່ອນອື່ນໝົດ ຕ້ອງເພີ່ມທະວີການເຊື່ອມຊຶມ, ກໍາແໜ້ນແນວທາງແຜນນະໂຍບາຍຂອງພັກ, ກົດໝາຍຂອງລັດ ໂດຍສະເພາະກົດໝາຍວ່າດ້ວຍອົງການໄອຍະການປະຊາຊົນ, ກົດໝາຍອື່ນໆທີ່ກ່ຽວຂ້ອງ, ເປັນແກນນໍາໃນລະບົບການເມືອງ ຢູ່ອົງການໄອຍະການປະຊາຊົນ, ເປັນແບບຢ່າງຕັ້ງໜ້າໃນການປະຕິບັດສິດ ແລະ ໜ້າທີ່ ຕາມຄວາມຮັບຜິດຊອບຂອງຕົນ ໃຫ້ມີຜົນສໍາເລັດ, ເຮັດໃຫ້ອົງການໄອຍະການປະຊາຊົນນັບມື້ມີການພັດທະນາ, ຍົກສູງຄຸນນະພາບຂອງການດໍາເນີນຄະດີຕາມຂະບວນການຍຸຕິທໍາ, ເພີ່ມທະວີວຽກງານຕິດຕາມກວດກາຂອງອົງການໄອຍະການປະຊາຊົນ, ປະກອບສ່ວນເຮັດໃຫ້ປະເທດເຮົາມີຄວາມສະຫງົບ ແລະ ມີຄວາມເປັນລະບຽນຮຽບຮ້ອຍ, ເສດຖະກິດ ໄດ້ຮັບການພັດທະນາ ຢ່າງບໍ່ຢຸດຢັ້ງ.
(ຂ່າວ-ພາບ:ຕຸໄລເພັດ)
ຄໍາເຫັນ