 |
ກອງປະຊຸມຄັ້ງນີ້, ຈັດຂຶ້ນເພື່ອເປັນບ່ອນອີງໃຫ້ຫ້ອງການ, ບັນດາກົມ, ສະຖາບັນ, ສຳນັກພິມສຶກສາ ແລະ ສູນ ພາຍໃນສຳນັກກະຊວງ ສສກ ໃນການກຳນົດຫຼັກການ, ເປົ້າໝາຍ, ເງື່ອນໄຂ ແລະ ຂັ້ນຕອນການສະສາງ-ຖອນຄືນລົດຂອງລັດ. ທັງນີ້, ເພື່ອໃຫ້ສອດຄ່ອງ ແລະ ເປັນການຈັດຕັ້ງປະຕິບັດຕາມແຈ້ງການຂອງກະຊວງການເງິນ ສະບັບເລກທີ 0589/ກງ, ລົງວັນທີ 15 ກຸມພາ 2024 ກ່ຽວກັບການ ຈັດຕັ້ງປະຕິບັດຂໍ້ຕົກລົງຂອງນາຍົກລັດຖະມົນຕີ ວ່າດ້ວຍການສະສາງລົດຂອງລັດ ສະບັບເລກທີ 169/ນຍ, ລົງວັນທີ 28 ທັນວາ 2023 ໃຫ້ປະກົດຜົນເປັນຮູບປະທຳ.
ໂອກາດນີ້, ທ່ານ ເຈັດຊິ້ງ ອິນທະວົງ ໄດ້ສະແດງຄວາມຂອບໃຈ ແລະ ຍ້ອງຍໍຊົມເຊີຍຕໍ່ຄະນະຮັບຜິດຊອບ ທີ່ໄດ້ຫ້າງຫາກະກຽມຄວາມພ້ອມ ແລະ ປະສານງານກັບທຸກພາກສ່ວນທີ່ກ່ຽວຂ້ອງຢ່າງມີຄວາມຮັບຜິດຊອບສູງ. ຮຽກຮ້ອງໃຫ້ບັນດາຜູ້ແທນທີ່ເຂົ້າຮ່ວມ ຈົ່ງພ້ອມກັນປະກອບຄຳຄິດຄຳເຫັນຢ່າງກົງໄປກົງມາ, ມີຄຳເຫັນຢ່າງເລິກເຊິ່ງ ເພື່ອໃຫ້ກອງປະຊຸມມີເນື້ອໃນອຸດົມສົມບູນ, ຄົບຖ້ວນ ແລະ ສາມາດນຳເອົາເນື້ອໃນ ຜົນທີ່ໄດ້ຮັບໄປຈັດຕັ້ງປະຕິບັດໃນວຽກງານຕົວຈິງ ໃຫ້ສອດຄ່ອງກັບນະໂຍບາຍ, ກົດໝາຍ ແລະ ລະບຽບການຂອງລັດຢ່າງເຂັ້ມງວດ ແລະ ຖືກຕ້ອງຕາມເປົ້າໝາຍ.
 |
ຈາກນັ້ນ, ທ່ານ ນາງ ສົມສະຫວັນ ຫຼວງມະໄຊ ຕາງໜ້າຈາກກົມຄຸ້ມຄອງຊັບສິນແຫ່ງລັດ ກະ ຊວງການເງິນ ໄດ້ຜ່ານຂໍ້ຕົກລົງຂອງລັດຖະມົນຕີ ກະຊວງການເງິນ ສະບັບເລກທີ 1460/ກງ, ລົງວັນທີ 10 ພຶດສະພາ 2025 ວ່າດ້ວຍການສະສາງລົດຂອງລັດ ໃຫ້ພະນັກງານບຳນານ ແລະ ພະນັກງານປະຈຳ ການກະຊວງ ສສກ (ຊຸດທີ 2); ຊຶ່ງຂໍ້ຕົກລົງດັ່ງກ່າວໄດ້ອະນຸມັດໃຫ້ສະສາງລົດຂອງລັດໃຫ້ພະນັກງານບຳນານ ແລະ ພະນັກງານປະຈຳການຂອງກະຊວງ ສສກ ທີ່ໄດ້ເອົາໄປນໍາໃຊ້ໃນໄລຍະຜ່ານມາ ດ້ວຍການຂາຍນະໂຍບາຍ ແລະ ໂອນກຳມະສິດໃຫ້ຢ່າງຂາດຕົວ ຈຳນວນ 35 ທ່ານ ຕາມການສະເໜີຂອງຫ້ອງການກະຊວງ ສສກ.
ຂ່າວ-ພາບ: ລູກນ້ຳເຊ ອິນທະດາລິນ
ຄໍາເຫັນ