 |
ໃນໂອກາດນີ້, ທ່ານ ນາງ ມຸກດາວັນ ສີສຸລິດ ຫົວໜ້າກົມອົງການຈັດຕັ້ງສາກົນ ຫົວໜ້າກອງເລຂາ ໄດ້ລາຍງານກ່ຽວກັບຄວາມຄືບໜ້າ ແລະ ຄວາມພ້ອມຂອງທຸກພາກສ່ວນໃນການເປັນເຈົ້າພາບກອງປະຊຸມ ຊຶ່ງເປັນການຫັນປ່ຽນບົດບາດຂອງ ສປປ ລາວ ຈາກການເປັນ "ປະເທດທີ່ໄດ້ຮັບເຄາະຮ້າຍ" ໄປສູ່ການເປັນ "ຜູ້ນຳທາງດ້ານການທູດເພື່ອມະນຸດສະທຳສາກົນ" ໃນທ່າມກາງສະພາບການໂລກທີ່ມີຄວາມຜັນແປ ແລະ ທ່າອ່ຽງການຫຼຸດລົງຂອງຄວາມສົນໃຈຕໍ່ວຽກງານຫຼຸດຜ່ອນອາວຸດໃນບາງພາກ ພື້ນ, ສປປ ລາວ ໄດ້ສືບຕໍ່ຄວາມມຸ້ງຫວັງໃນຖານະເປັນປະເທດຮັກຫອມສັນຕິພາບເພື່ອສືບຕໍ່ຊຸກຍູ້ວຽກງານຫຼຸດຜ່ອນອາວຸດ ແລະ ວຽກງານມະນຸດສະທຳສາກົນ. ປັດຈຸບັນ ມີຄະນະຜູ້ແທນລົງທະບຽນຜ່ານອອນລາຍແລ້ວຫຼາຍກວ່າ 500 ຄົນ. ການເຂົ້າຮ່ວມຢ່າງກວ້າງຂວາງຂອງຄະນະຜູ້ແທນສາກົນໄດ້ສະທ້ອນໃຫ້ເຫັນເຖິງຄວາມເຂັ້ມແຂງ ແລະ ຄວາມຊອບທຳຂອງສົນທິສັນຍາ CCM. ມາຮອດປັດຈຸບັນໄດ້ມີຄວາມກຽມພ້ອມຮອບດ້ານ, ທັງໃນດ້ານພະລາທິການ, ພື້ນຖານໂຄງລ່າງ, ລະບົບການຂົນສົ່ງ, ພາກສະໜາມ ແລະ ການບໍລິການພື້ນຖານທີ່ມີຄວາມຈຳເປັນອື່ນໆ.
ການເປັນເຈົ້າພາບກອງປະຊຸມສາກົນຄັ້ງນີ້ ມີຄວາມໝາຍສຳຄັນເປັນພິເສດສຳລັບ ສປປ ລາວ ຊຶ່ງໄດ້ສະແດງໃຫ້ເຫັນເຖິງເຈດຈຳນົງ ອັນສະເໝີຕົ້ນສະເໝີປາຍ ຂອງ ລັດຖະບານ ສປປ ລາວ ໃນການປະກອບສ່ວນເຂົ້າໃນຄວາມພະຍາຍາມຂອງສາກົນ ເພື່ອພາລະກິດການປົກປັກຮັກສາສັນຕິພາບໃນໂລກ ໂດຍຜ່ານຂະບວນການ ຂອງສົນທິສັນຍາ CCM ໄປຄຽງຄູ່ກັບການແກ້ໄຂບັນຫາລະເບີດບໍ່ທັນແຕກທີ່ຍັງຕົກຄ້າງ ຢູ່ພາຍໃນປະເທດ ຊຶ່ງຈະປະກອບສ່ວນ ຜົນປະໂຫຍດໂດຍກົງຕໍ່ປະຊາຊົນລາວ, ໂດຍສະເພາະ ການບັນລຸເປົ້າໝາຍການພັດທະນາແບບຍືນຍົງແຫ່ງຊາດ ທີ 18 ວ່າດ້ວຍຊີວິດປອດໄພຈາກລະເບີດບໍ່ທັນແຕກ (SDG18)
ທ່ານຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ປະທານກອງປະຊຸມ ໄດ້ໃຫ້ທິດຊີ້ນໍາ ໂດຍເນັ້ນໜັກໃຫ້ທຸກພາກສ່ວນ ລວມທັງ 12 ອະນຸກໍາມະການ ເພີ່ມທະວີຄວາມຮັບຜິດຊອບ ແລະ ປະສານງານກັນຢ່າງກົມກຽວທີ່ສຸດ ເພື່ອໃຫ້ມີຄວາມພ້ອມ 100% ໃນທຸກດ້ານ. ຜົນສໍາເລັດຂອງກອງປະຊຸມຄັ້ງນີ້ຈະປະກອບສ່ວນສໍາຄັນ ໃນການຍົກສູງບົດບາດຂອງ ສປປ ລາວ ໃນເວທີສາກົນ.
ໝາກຜົນທາງດ້ານເນື້ອໃນຂອງກອງປະຊຸມຄັ້ງນີ້ ຈະມີການຮັບຮອງເອກະສານສໍາຄັນ 3 ສະບັບ: (1) ເອກະສານທົບທວນການປະຕິບັດສົນທິສັນຍາ, (2) ແຜນປະຕິບັດງານນະຄອນຫຼວງວຽງຈັນ 2027-2032 (VCAP) ຊຶ່ງເປັນເຂັມທິດຍຸດທະສາດລະດັບໂລກໃນ 5 ປີຕໍ່ໜ້າ ແລະ (3) ຖະແຫຼງການການເມືອງ ໂດຍອີງໃສ່ເປົ້າໝາຍລວມຂອງສົນທິສັນຍາ CCM.
(ຂ່າວ: ກຕທ, ພາບ: ແສງຈັນ)
ຄໍາເຫັນ