ໃນລະຫວ່າງວັນທີ 21-22 ກັນຍາ ຜ່ານມາ, ທ່ານ ພູທອນ ເມືອງປາກ ປະທານອົງການກາແດງແຫ່ງຊາດລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມຄະນະນຳກາແດງ ແລະ ຊີກວົງເດືອນແດງ ປະຈຳພາກພື້ນອາຊີຕາເວັນອອກສ່ຽງໃຕ້ ທີ່ນະຄອນຫຼວງພະນົມເປັນ ກຳປູເຈຍ, ກອງປະຊຸມພາຍໃຕ້ການເປັນປະທານຂອງ ສົມເດັດ ນາງ ກິດຕິພີບິນດິດ ບັນລານີ ຮຸນເຊັນ ປະທານອົງການກາແດງກຳປູເຈຍ.
ກອງປະຊຸມນີ້ ແມ່ນແນໃສ່ທົບທວນຄືນບັນດາຜົນສຳເລັດ, ຄວາມຄືບໜ້າ, ຄວາມຫຍຸ້ງຍາກ ແລະ ສິ່ງທ້າທ້າຍໃນການຈັດຕັ້ງປະຕິບັດວຽກງານມະນຸດສະທຳ ແລະ ພ້ອມທັງເປັນໂອກາດໃນການປຶກສາຫາລືບັນດານະໂຍບາຍຕ່າງໆ, ໃນການເພີ່ມທະວີການຮ່ວມມືລະຫວ່າງບັນດາອົງການກາແດງ ແລະ ຊີກວົງເດືອນແດງໃນພາກພື້ນອາຊີຕາເວັນອອກສ່ຽງໃຕ້, ໂດຍສະເພາະການເຂົ້າເປັນສະມາຊິກຂອງເຄືອຂ່າຍຕ່າງໆຂອງວຽກງານກາແດງ, ພ້ອມທັງກະກຽມພັດທະນາສັນຍາການຮ່ວມມືລະຫວ່າງອົງການກາແດງ ແລະ ຊີກວົງເດືອນແດງອາຊີຕາເວັນອອກສ່ຽງໃຕ້ ຮ່ວມກັບ ກອງເລຂາອາຊຽນ ກ່ຽວກັບວຽກງານຕອບໂຕ້ໄພພິບັດ. ຄຽງຄູ່ກັນນັ້ນ, ກອງປະຊຸມເຄືອຂ່າຍຊາວໜຸ່ມກາແດງ ແລະ ຊີກວົງເດືອນແດງອາຊີຕາເວັນ ອອກສ່ຽງໃຕ້ ຄັ້ງທີ 2 ກໍໄດ້ຈັດຂຶ້ນໃນໄລຍະເວລາດຽວກັນ.
ພິເສດອີກວາລະໜຶ່ງຂອງກອງປະຊຸມໄດ້ມີພິທີປູກຕົ້ນໄມ້ ເພື່ອເປັນການສົ່ງເສີມວາລະການຫຼຸດຜ່ອນຄວາມສ່ຽງໄພພິບັດ ແລະ ການປ່ຽນແປງດິນຟ້າອາກາດ ຊຶ່ງໄດ້ປູກຕົ້ນໄມ້ຫຼາຍພັນຕົ້ນ.
(ຂ່າວ: ກາແດງ)
ຄໍາເຫັນ