ກອງປະຊຸມຄັ້ງປະຖົມມະລືກເພື່ອປຶກສາຫາລືແກ້ໄຂບັນຫາຢາເສບຕິດ 2024-2025

ກອງປະຊຸມຄະນະກຳມະການແກ້ໄຂບັນຫາຢາເສບຕິດລະດັບຊາດຄັ້ງປະຖົມມະລືກເພື່ອປຶກສາຫາລືກ່ຽວກັບການກະກຽມຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ 2024-2025ຈັດຂຶ້ນໃນວັນທີ 10 ມັງກອນນີີ້ ທີ່ສະໂມສອນກະຊວງປ້ອງກັນຄວາມສະຫງົບ (ປກສ) ໂດຍການເປັນປະທານຂອງທ່ານ ພົອວິໄລ ຫຼ້າຄຳຟອງຮອງນາຍົກລັດຖະມົນຕີລັດຖະມົນຕີກະຊວງປ້ອງກັນຄວາມສະຫງົບປະທານຄະນະກໍາມະການແກ້ໄຂບັນຫາຢາເສບຕິດລະດັບຊາດ, ມີບັນດາທ່ານຮອງລັດຖະມົນຕີ,ອົງການ,ຜູ້ຕາງໜ້າຄະນະກຳມະການແກ້ໄຂບັນຫາຢາເສບຕິດລະດັບຊາດເຂົ້າຮ່ວມ.
ທ່ານ ພົອ ວິໄລ ຫຼ້າຄຳຟອງ ກ່າວວ່າ: ຕະຫຼອດໄລຍະເວລາທີ່ຜ່ານມາ, ລັດຖະບານໄດ້ຖືເອົາການແກ້ໄຂບັນຫາຢາເສບຕິດເປັນວຽກໜຶ່ງທີ່ສໍາຄັນ ແນໃສ່ເຮັດໃຫ້ປະຊາຊົນໃນທົ່ວສັງຄົມປອດໄພຈາກບັນຫາຢາເສບຕິດ ເພື່ອເຮັດໃຫ້ປະຊາຊົນລາວມີຄວາມຜາສຸກຢູ່ດີກິນດີ. ພາຍຫຼັງທີ່ກົມການເມືອງສູນກາງພັກໄດ້ອອກຄຳສັ່ງ ສະບັບເລກທີ 02/ກມສພ, ລົງວັນທີ 26 ກໍລະກົດ 2021 ວ່າດ້ວຍການເພີ່ມທະວີການນໍາພາຊີ້ນໍາຂອງຄະນະພັກແຕ່ລະຂັ້ນຕໍ່ການສະກັດກັ້ນ ແລະ ແກ້ໄຂບັນຫາຢາເສບຕິດ, ສະພາແຫ່ງຊາດໄດ້ອອກມະຕິຮັບຮອງເອົາວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດສະບັບເລກທີ 04/ສພຊ, ລົງວັນທີ 10 ສິງຫາ 2021. ລັດຖະບານກໍຄືກະຊວງ ປກສ ໄດ້ເປັນເຈົ້າການເພີ່ມທະວີ, ຍົກລະດັບການນໍາພາ-ຊີ້ນໍາການເຄື່ອນໄຫວພາລະບົດບາດເປັນໃຈກາງ ໃນການປະສານສົມທົບກັບບັນດາກະຊວງ-ອົງການ ແລະ ທ້ອງຖິ່ນ ເພື່ອຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດໄປຕາມ 3 ຫຼັກການຄື: ເດັດຂາດ, ໂປ່ງໃສ, ມືອາຊີບໄປຕາມຄໍາຂວັນທີ່ວ່າ: ອັດ 3 ທາງ, ມ້າງ 3 ເປົ້າ, ເປັນເຈົ້າ 3 ຫຼັກ ແລະ ໄປຕາມ 6 ວຽກຈຸດສຸມຂອງວາລະແຫ່ງຊາດ. ຜ່ານການເຄື່ອນໄຫວວຽກງານຕົວຈິງໃນໄລຍະເກືອບ 3 ປີຜ່ານມາ, ພວກເຮົາສາມາດຍາດເອົາຜົນສໍາເລັດໃດ້ຫຼາຍດ້ານ.
ເຖິງວ່າລັດຖະບານ ກໍຄືກະຊວງ ປກສ ໄດ້ເອົາໃຈໃສ່ຈັດຕັ້ງປະຕິບັດຄໍາສັ່ງຂອງກົມການເມືອງສູນກາງພັກ, ມະຕິຂອງສະພາແຫ່ງຊາດ ແລະ ຄໍາສັ່ງຂອງນາຍົກລັດຖະມົນຕີຢ່າງຕັ້ງໜ້າ, ມີຄວາມຮັບຜິດຊອບສູງ ແລະ ມີໝາກຜົນສໍາເລັດແລ້ວກໍຕາມ ແຕ່ກໍຍັງປະເຊີນໜ້າກັບສິ່ງທ້າທາຍ, ທົດສອບ, ມີຄວາມຫຍຸ້ງຍາກສັບສົນໃນການແກ້ໄຂບັນຫາຢາເສບຕິດເປັນຕົ້ນ,ຄະນະພັກ-ຄະນະນໍາກະຊວງ-ອົງການຂັ້ນສູນກາງ, ອົງການປົກຄອງທ້ອງຖິ່ນຍັງບໍ່ທັນໄດ້ຍົກສູງຄວາມເອົາໃຈໃສ່ໃນການນໍາພາ-ຊີ້ນໍາການຈັດຕັ້ງປະຕິບັດວາລະແຫ່ງຊາດ; ກົດໝາຍວ່າດ້ວຍຢາເສບຕິດສະບັບປັບປຸງຍັງບໍ່ທັນເຜີຍແຜ່ໄດ້ຢ່າງກວ້າງຂວາງ ເຮັດໃຫ້ການປະຕິບັດມາດຕະການດ້ານກົດໝາຍຕໍ່ຜູ້ກະທໍາຜິດຍັງຈຳກັດບັນດານິຕິກຳຮັບໃຊ້ວຽກງານໂຄສະນາສຶກສາອົບຮົມຊຶ່ງເປັນວຽກບຸລິມະສິດໃນວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດຍັງບໍ່ທັນລະອຽດຄົບຖ້ວນເທົ່າທີ່ຄວນ, ຄວາມຮູ້, ຄວາມສາມາດຂອງເຈົ້າໜ້າທີ່ໆກ່ຽວຂ້ອງໃນການຈັດຕັ້ງປະຕິບັດວາລະແຫ່ງຊາດຍັງຈຳກັດ, ການແກ້ໄຂເປົ້າໝາຍສ່ວນໃຫຍ່ໄດ້ແຕ່ເປົ້າໝາຍຂົນສົ່ງ, ຊື້-ຂາຍລາຍຍ່ອຍ, ລາຍກາງບໍ່ທັນແກ້ໄດ້ຫົວໂປ່ໂຕການ; ຂອດການປະສານງານລະຫວ່າງກະຊວງກັບກະຊວງ, ກະຊວງກັບຂະແໜງການກ່ຽວຂ້ອງທັງຢູ່ຂັ້ນສູນກາງ ແລະ ທ້ອງຖິ່ນ ເຫັນວ່າບໍ່ທັນກົມກຽວຂາດຄວາມຄ່ອງຕົວ ຍ້ອນແຕ່ລະພາກສ່ວນຍັງບໍ່ທັນແຕ່ງຕັ້ງຜູ້ປະສານງານທີ່ຈະແຈ້ງ; ການຕອບສະໜອງດ້ານບຸກຄະລາກອນ, ງົບປະມານ, ວັດຖຸອຸປະກອນເຕັກນິກວິຊາສະເພາະ, ພາຫະນະທີ່ຈຳເປັນເພື່ອມາຮັບໃຊ້ໃຫ້ແກ່ວາລະແຫ່ງຊາດຍັງຊັກຊ້າ, ຍັງບໍ່ທັນທົ່ວເຖິງ ແລະ ດ້ານອື່ນໆຕື່ມອີກ. 

ທ່ານ ພົອ ວິໄລ ຫຼ້າຄຳຟອງ ໄດ້ຮຽກຮ້ອງມາຍັງບັນດາຜູ້ເຂົ້າຮ່ວມໃນກອງປະຊຸມຄັ້ງນີ້, ເອົາໃຈໃສ່ປະກອບຄໍາຄິດຄໍາເຫັນ, ປຶກສາຫາລື, ແລກປ່ຽນບົດຮຽນ, ແລກປ່ຽນເຕັກນິກວິທີການ, ຄວາມຮູ້ ແລະ ສະພາບການບັນຫາຢາເສບຕິດໃນຂົງເຂດຂອງຕົນຮັບຜິດຊອບ ເພື່ອຮັບປະກັນໃຫ້ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ 2024-2025 ໃຫ້ມີປະສິດທິຜົນສູງ.
(ຂ່າວ-ພາບ: ວັນເພັງ)