ກອງປະຊຸມຄົບຄະນະບໍລິຫານງານພັກ ຄັ້ງທີ 10 ສະໄໝທີ IV ອົງຄະນະສານປະຊາຊົນສູງສຸດ

ສານປະຊາຊົນສູງສຸດ(ສປສສ) ໄດ້ຈັດກອງປະຊຸມຄົບຄະນະບໍລິຫານງານພັກ ຄັ້ງທີ 10 ສະໄໝທີ IV ອົງຄະນະສານປະຊາຊົນສູງສຸດ ຂຶ້ນໃນວັນທີ 3 ພະຈິກ ນີ້ ທີ່ສປສສ,ພາຍໃຕ້ການເປັນປະທານຂອງສະຫາຍ ນາງ  ວຽງທອງ ສີພັນດອນ ຄະນະເລຂາທິການສູນກາງພັກເລຂາຄະນະບໍລິຫານງານພັກ ປະທານສານປະຊາຊົນສູງສຸດ,ມີສະຫາຍຮອງເລຂາຄະນະບໍລິຫານງານພັກ, ບັນດາສະຫາຍຄະນະປະຈຳພັກ ແລະ ບັນດາສະຫາຍກຳມະການຄະນະບໍລິຫານງານພັກ ສານປະຊາຊົນສູງສຸດເຂົ້າຮ່ວມ.
ກ່ອນອື່ນສະຫາຍປະທານກອງປະຊຸມ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະບໍລິຫານງານພັກ   ໄດ້ມີຜົນງານສຳເລັດອັນໃຫຍ່ຫຼວງຫຼາຍດ້ານ ອັນໄດ້ປະກອບສ່ວນເຮັດໃຫ້ສານປະຊາຊົນສູງສຸດ, ກໍຄືສານປະຊາຊົນໃນຂອບເຂດທົ່ວປະເທດ ໄດ້ຮັບຄວາມເຊື່ອໝັ້ນ, ໄວ້ວາງໃຈຈາກພັກ-ລັດ ແລະ ປະຊາຊົນບັນດາເຜົ່ານັບມື້ນັບສູງຂຶ້ນ. ນີ້ແມ່ນໝາກຜົນການເຄື່ອນໄຫວນຳພາ-ຊີ້ນຳ ຢ່າງຕັ້ງໜ້າຂອງຄະນະບໍລິຫານງານພັກ, ຄະນະໜ່ວຍພັກ ສະແດງເຖິງຄວາມກະຕືລືລົ້ນ, ຄວາມຮັບຜິດຊອບສູງຂອງສະມາຊິກພັກ, ກໍຄືພະນັກງານທັງໝົດຂອງສານປະຊາຊົນສູງສຸດ ທີ່ສາມັກຄີເປັນປຶກແຜ່ນແໜ້ນໜາ ແລະ ປະກອບສ່ວນທາງດ້ານສະຕິປັນຍາ, ເຫື່ອແຮງທາງດ້ານຈິດໃຈເຂົ້າໃນການປະຕິບັດພາລະບົດບາດ, ໜ້າທີ່ ແລະ ກົດໝາຍກຳນົດ ໄດ້ມີຜົນສຳເລັດຈົບງາມ. ເຖິງຢ່າງໃດກໍຕາມ, ໂດຍອີງໃສ່ສະພາບຈຸດພິເສດ, ເງື່ອນໄຂຂອງອົງຄະນະພັກພວກເຮົາແລ້ວ ກໍຍັງມີບາງດ້ານທີ່ພວກເຮົາຕ້ອງໄດ້ພະຍາຍາມສຸມໃສ່ປັບປຸງແກ້ໄຂໃຫ້ດີກວ່າເກົ່າ ເພື່ອຮອງຮັບໜ້າທີ່ການເມືອງຂອງພັກ - ລັດ ແລະ ປະຊາຊົນ ທີ່ນັບມື້ນັບສູງ.
ກອງປະຊຸມຄົບຄະນະບໍລິຫານງານພັກ ຄັ້ງທີ 10 ສະໄໝທີ IV ຂອງອົງຄະນະພັກ ສານປະຊາຊົນສູງສຸດ ຄັ້ງນີ້ມີຄວາມໝາຍຄວາມສຳຄັນເປັນຢ່າງຍິ່ງ ເພາະວ່າຈະໄດ້ພ້ອມກັນຮັບຟັງ ແລະ ຄົ້ນຄວ້າປະກອບຄຳຄິດຄຳເຫັນຕໍ່ບັນດາເນື້ອໃນເອກະສານສໍາຄັນດັ່ງນີ້:ຕີລາຄາການນຳພາ-ຊີ້ນຳ  ຂອງຄະນະບໍລິຫານງານພັກ ສານປະຊາຊົນສູງສຸດ ໃນ 9 ເດືອນຜ່ານມາ ແລະ ທິດທາງແຜນການ ໃນ 3 ເດືອນທ້າຍປີ 2023, ຕີລາຄາ ແລະ ປະເມີນຜົນ ວຽກງານກວດກາໃນເງື່ອນໄຂໃໝ່,ສະຫຼຸບຕີລາຄາ ກ່ຽວກັບການດຳເນີນຄະດີການຄ້າ ໃນເງື່ອນໄຂໃໝ່,ສະຫຼຸບ, ຕີລາຄາວຽກງານດໍາເນີນຄະດີເດັກ,ສະເໜີແຜນສ້າງສານປະຊາຊົນທີ່ທັນສະໄໝ ດ້ວຍລະບົບເອເລັກໂຕຣນິກ ທີ່ທັນສະໄໝ, ສະຫຼຸບ, ຕີລາຄາວຽກງານຄະນະບໍລິຫານງານຊາວໜຸ່ມ ແລະ ວຽກງານອຶ່ນໆ ຈຳນວນໜຶ່ງ.
ຂ່າວ:ອານຸພົນ