ກອງປະຊຸມຄົບຄະນະບໍລິຫານງານພັກ ກຊສ ຄັ້ງທີ 8 ສະໄໝທີ II

ອົງຄະນະພັກກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ໄດ້ດໍາເນີນກອງປະຊຸມຄົບຄະນະບໍລິຫານງານພັກກະຊວງ ຄັ້ງທີ8 ສະໄໝທີII ໃນວັນທີ18 ມັງກອນນີ້ ທີ່ຫ້ອງປະຊຸມຂອງ ກຊສ, ໂດຍການເປັນ ປະທານ ຂອງທ່ານໄຊນະຄອນ ອິນທະວົງ ຮອງເລຂາຄະນະພັກຮອງລັດຖະມົນຕີກະຊວງ, ມີຄະນະປະຈຳພັກ, ຄະນະພັກກະຊວງ ຊສ ເຂົ້າຮ່ວມຢ່າງພ້ອມພຽງ.
ກອງປະຊຸມຄົບຄະນະບໍລິຫານງານພັກ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຄັ້ງທີ8 ສະໄໝທີII ໃນຄັ້ງນີ້ ແມ່ນໄດ້ຮັບຟັງການລາຍງານ, ຄົ້ນຄວ້າ ແລະ ພິຈາລະນາຮັບຮອງເອົາບັນດາເອກະສານທີ່ສໍາຄັນ ເປັນຕົ້ນແມ່ນ:  1) ລາຍງານການສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ II ຂອງອົງຄະນະພັກກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, 2) ລາຍງານ ຮ່າງບົດສະຫຼຸບວຽກງານກໍ່ສ້າງພັກ, ພະນັກງານ ແລະ ປັບປຸງກົງຈັກການຈັດຕັ້ງ ຂອງອົງຄະນະພັກ ກຊສ ປະຈຳປີ 2023 ແລະ ທິດທາງໜ້າທີ່ປີ 2024, 3) ລາຍງານຜົນການຈັດຕັ້ງປະຕິບັດແຜນຍຸດທະສາດການພັດທະນາ ແລະ ຄຸ້ມຄອງພະນັກງານ-ລັດຖະກອນ ຂອງຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມ ຮອດປີ 2025, 4) ລາຍງານ ກ່ຽວກັບວຽກງານຊຸກຍູ້ການຄຸ້ມຄອງສິ່ງເສດເຫຼືອຢ່າງມີ ປະສິດທິພາບ, 5) ລາຍງານ ຮ່າງແຜນງານແຫ່ງຊາດການປັບຕົວເຂົ້າກັບການປ່ຽນແປງດິນຟ້າອາກາດ, 6) ລາຍງານ ກ່ຽວກັບການຜັນຂະຫຍາຍຍຸດທະສາດຄຸ້ມຄອງນໍ້າ ແລະ ຊັບພະຍາກອນນໍ້າ ຮອດປີ2030, 7) ລາຍງານ ແຜນການຮ່ວມມືກັບພາກເອກະຊົນ ໃນການຫັນລະບົບຂໍ້ມູນຂ່າວສານທີ່ດິນເປັນທັນສະໄໝ.
ຜ່ານການຮັບຟັງ ແລະ ສະເໜີເອກະສານແລ້ວ ໃນກອງປະຊຸມໄດ້ມີການປະກອບຄໍາຄິດຄໍາເຫັນຢ່າງກົງໄປ ກົງມາ ແລະ ມີຄວາມຮັບຜິດຊອບສູງ ໃນການເບິ່ງບັນຫາໃຫ້ຖືກກັບຄວາມເປັນຈິງ ຍົກໃຫ້ເຫັນອັນໃດທີ່ເຮັດໄດ້, ອັນໃດທີ່ເປັນບົດຮຽນ ແລະ ອັນໃດທີ່ຍັງອ່ອນຄົງຄ້າງ ກໍຄືການແກ້ໄຂບັນຫາຕົວຈິງໃຫ້ຖືກຕ້ອງຕາມລະບຽບການ ແລະ ຮັບປະກັນໃຫ້ແກ່ການກຳນົດແຜນວຽກຈຸດສຸມໃນຕໍ່ໜ້າແທດເໝາະກັບສະພາບຕົວຈິງ ຂອງວຽກງານຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມ ເພື່ອເຮັດໃຫ້ດ້ານເນື້ອໃນ ຂອງເອກະສານຕ່າງໆ ຄົບຖ້ວນສົມບູນ, ກ້າວໄປເຖິງການຮັບຮອງ ແລະ ເປັນບ່ອນອີງໃນການຈັດຕັ້ງປະຕິບັດວຽກງານໃນຕໍ່ໜ້າ ທັງເປັນການນໍາພາ-ຊີ້ນໍາ ວຽກງານຮອບດ້ານ ຂອງບັນດາສະຫາຍຄະນະບໍລິຫານງານພັກກະຊວງ ທີ່ຮັບຜິດຊອບຢູ່ໃນແຕ່ລະຂົງເຂດວຽກງານໃຫ້ສຳເລັດຕາມແຜນການທີ່ວາງໄວ້. 
(ຂ່າວ-ພາບ: ແສງຈັນ)