ກອງປະຊຸມຄົບຄະນະບໍລິຫານງານພັກແຂວງຄຳມ່ວນ ຄັ້ງທີ 10 ສະໄໝທີ X ເປີດຂຶ້ນໃນວັນທີ 12 ຕຸລາ ນີ້ ທີ່ເຮືອນຮັບແຂກ ເລກ 1 ພາຍໃຕ້ການເປັນປະທານຂອງ ສະຫາຍ ວັນໄຊ ພອງສະຫວັນ ກຳມະການສູນກາງພັກ ເລຂາພັກແຂວງຄຳມ່ວນ, ມີບັນດາສະຫາຍໃນຄະນະປະຈຳ, ກຳມະການພັກ ແຂວງ, ເລຂາຄະນະພັກຮາກຖານ, ອົງການຈັດຕັ້ງມະຫາຊົນ, ເລຂາໜ່ວຍພັກບັນດາພະແນກການອ້ອມຂ້າງແຂວງເຂົ້າຮ່ວມ.
ກອງປະຊຸມຄັ້ງນີ້ ໄດ້ລາຍງານກ່ຽວກັບການຈັດຕັ້ງປະຕິບັດວຽກງານພັກ-ພະນັກງານ, ວຽກງານແນວລາວສ້າງຊາດ, ບັນດາອົງການຈັດຕັ້ງມະຫາຊົນ, ວຽກງານສະຫະພັນນັກຮົບເກົ່າໃນໄລຍະເຄິ່ງສະໄໝ (2021-2023) ແລະ ທິດທາງແຜນການໃນທ້າຍສະໄໝ 2023-2025, ການຈັດຕັ້ງປະຕິບັດວຽກງານຮອບດ້ານ ໄລຍະ 9 ເດືອນ ແລະ ທິດທາງວຽກງານຈຸດສຸມ 3 ເດືອນທ້າຍປີ 2023, ລາຍງານກ່ຽວກັບແຜນການຟື້ນຟູຜົນກະທົບຈາກໄພພິບັດນໍ້າຖ້ວມ ປີ 2023 ໃນທົ່ວແຂວງ ແລະ ເຜີຍແຜ່ ຂໍ້ກໍານົດ ຂອງຄະນະເລຂາທິການສູນກາງພັກ ສະບັບເລກທີ 416/ຄລສພ, ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະພັກຮາກຖານກຸ່ມບ້ານ ຫຼື ບ້ານໃຫຍ່.
ໃນໂອກາດມີຄຳເຫັນກ່າວເປີດກອງປະຊຸມ ສະຫາຍເລຂາຄະນະບໍລິຫານງານພັກແຂວງຄຳມ່ວນ ໄດ້ມີຄຳເຫັນສະເໜີ ແລະ ຮຽກຮ້ອງ ໃຫ້ບັນດາສະຫາຍໃນຄະນະພັກ, ເລຂາໜ່ວຍພັກ ທີ່ເຂົ້າຮ່ວມກອງປະຊຸມ ຈົ່ງພ້ອມກັນເອົາໃຈໃສ່ຍົກສູງຄວາມຮັບຜິດຊອບ, ຄວາມເປັນເຈົ້າການໃນການຕິດຕາມ, ຮັບຟັງ ແລະ ປະກອບຄຳຄິດຄຳເຫັນ ເພື່ອຍົກເອົາບັນຫາຕົວຈິງທີ່ໄດ້ຈັດຕັ້ງປະຕິບັດຢູ່ໃນທ້ອງຖິ່ນ, ກົມກອງຂອງຕົນເອງ ເພື່ອປຶກສາຫາລື ແລກປ່ຽນບົດຮຽນ ທາງດ້ານດີ, ດ້ານອ່ອນ ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງໃນຕໍ່ໜ້າ, ເອົາໃຈໃສ່ເພີ່ມຄວາມຮັບຜິດຊອບ ເປັນເຈົ້າການໃນການຄົ້ນຄວ້າບັນຫາຕ່າງໆໃຫ້ເລິກເຊິ່ງ ກົງໄປກົງມາ, ມີພາວະວິໄສ, ຖືກຕ້ອງ, ສອດຄ່ອງ ແລະ ຍົກໃຫ້ເຫັນບັນຫາຕົວຈິງ ເພື່ອພ້ອມກັນສືບຕໍ່ສຸມໃສ່ແກ້ໄຂບັນຫາທີ່ຍັງຄົງຄ້າງ ໃຫ້ໄດ້ຮັບການແກ້ໄຂໃນຕໍ່ໜ້າ.
(ຂ່າວ-ພາບ: ກອງຄຳ)
ຄໍາເຫັນ