ກອງປະຊຸມຄົບຄະນະບໍລິຫານງານພັກແຂວງສາລະວັນ 

ກອງປະຊຸມຄົບຄະນະບໍລິຫານງານພັກແຂວງສາລະວັນ ຄັ້ງທີ 12 ສະໄໝທີ IX ເປີດຂຶ້ນຢ່າງເປັນທາງການໃນວັນທີ 1 ພະຈິກ ນີ້ ທີ່ສະໂມສອນແຂວງ, ພາຍໃຕ້ການເປັນປະທານຂອງ ສະຫາຍ ດາວວົງ ພອນແກ້ວ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສາລະວັນ, ມີບັນດາສະຫາຍຮອງເລຂາພັກແຂວງ, ຄະນະປະຈໍາພັກແຂວງ, ກຳມະການພັກແຂວງ, ເລຂາພັກເມືອງ, ຄະນະພັກຮາກຖານ, ໜ່ວຍພັກເອກະລາດອ້ອມຂ້າງແຂວງ ແລະ ແຂກຖືກເຊີນເຂົ້າຮ່ວມ.
ສະຫາຍ ດາວວົງ ພອນແກ້ວ ໄດ້ມີຄໍາເຫັນກ່າວເປີດກອງປະຊຸມວ່າ: ກອງປະຊຸມຄັ້ງນີ້ມີຄວາມໝາຍຄວາມສໍາຄັນຫຼາຍ ໂດຍປະຕິບັດຕາມລະບຽບຂອງພັກປະຊາຊົນປະຕິວັດລາວ ສະໄໝທີ XI ແລະ ແຜນດຳເນີນງານຂອງຄະນະບໍລິຫານງານພັກແຂວງ ສະໄໝທີ IX, ເພື່ອຕີລາຄາຄືນໃນດ້ານການນໍາພາຮອບດ້ານຂອງຄະນະບໍລິຫານງານພັກແຂວງ ໄລຍະ 9ເດຶອນຜ່ານມາ ແລະ ຊອກໃຫ້ເຫັນຈຸດດີຈຸດອ່ອນ, ຂໍ້ຂາດຕົກບົກຜ່ອງ ເພື່ອປັບປຸງແກ້ໄຂໃນຕໍ່ໜ້າໃຫ້ດີຂຶ້ນ ແນໃສ່ເພື່ອສ້າງການຫັນປ່ຽນໃໝ່ຢ່າງແຂງແຮງ, ເລິກເຊິງ ແລະ ຮອບດ້ານ ຕາມມະຕິ XI ຂອງສູນກາງພັກ ກໍຄືມະຕິ IX ຂອງອົງຄະນະພັກແຂວງ ວາງອອກໃຫ້ປະກົດຜົນເປັນຈິງ. ພ້ອມທັງຈະໄດ້ຄົ້ນຄວ້າ, ປຶກສາຫາລືຕໍ່ກັບການນໍາພາ-ຊີີ້ນໍາຮອບດ້ານຂອງອົງຄະນະພັກແຂວງ ໃນໄລຍະ 9 ເດືອນ, ປີ 2023, ພ້ອມວາງທິດທາງວຽກງານຈຸດສຸມ 3 ເດືອນທ້າຍປີ ເປັນຕົ້ນຮ່າງບົດສະຫຼຸບຕີລາຄາການນຳພາລວມ 9 ເດືອນຕົ້ນປີແລະທິດທາງແຜນການ 3 ເດືອນທ້າຍປີ, ການຈັດຕັ້ງປະຕິບັດ 2 ວາລະແຫ່ງຊາດ. ຈາກນັ້ັນ, ສະຫາຍຍັງໄດ້ຮຽກຮ້ອງໃຫ້ເອົາໃຈໃສ່ເຊີດຊູຄວາມຮັບຜິດຊອບທາງດ້ານການເມືອງ, ຄົ້ນຄວ້າ,ວິເຄາະ, ວິໄຈແຕ່ລະເນື້ອໃນຢ່າງລະອຽດ, ມີວິທະຍາສາດ ແລະ ຕິດພັນກັບສະພາບຄວາມເປັນຈິງ, ຊອກໃຫ້ເຫັນບັນຫາບາງດ້ານທີ່ຍັງຈຳກັດ, ຂໍ້ຄົງຄ້າງສາເຫດໃນຕົວແລະນອກຕົວ, ສິ່ງທີ່ສຳຄັນຕ້ອງຊີ້ໃຫ້ເຫັນບັນຫາທີ່ເກີດຂຶ້ນ, ມີຄວາມຫຍຸ້ງຍາກໃນການແກ້ໄຂ ເພື່ອຈະສາມາດຖອດຖອນບົດຮຽນແລະສືບຕໍ່ວາງແຜນການ, ທິດທາງ ໃຫ້ສອດຄ່ອງກັບຕົວຈິງ, ປັບປຸງຂອດການນຳພາ ຈົນເຖິງ ຂອດການຈັດຕັ້ງປະຕິບັດໃນອີກ3 ເດືອນຕໍ່ໜ້າ ໃຫ້ບັນລຸໄດ້ຫຼາຍດ້ານ ໃນປີ 2023.
ກອງປະຊຸມຄັ້ງນີ້ ກໍໄດ້ຜ່ານຮ່າງບົດຕີລາຄາການນຳພາຂອງຄະນະບໍລິຫານງານພັກແຂວງ ໄລຍະ 9ເດືອນ ແລະ ວາງທິດທາງແຜນການ 3ເດືອນທ້າຍປີ 2023,ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ - ການເງິນ, ການແກ້ໄຂບັນຫາຢາເສບຕິດ, ການລາຍງານວຽກງານການກະກຽມສະເຫຼີມສະຫຼອງວັນສ້າງຕັ້ງກອງທັບ ປະຊາຊົນລາວ ຄົບຮອບ 75 ປີ ແລະ ການກະກຽມສະເຫຼີມສະຫຼອງວັນຄ້າຍວັນເກີດ ປະທານຄຳໄຕສີພັນດອນຄົບຮອບ 100 ປີ.ຂ່າວ-ພາບ: ວິໄລວອນ ສິດທິໄຊ