 |
ໃນກອງປະຊຸມ ພາຍຫຼັງສະຫາຍ ບຸນໂຈມ ອຸບົນປະເສີດ ໄດ້ມີຄໍາເຫັນກ່າວເປີດກອງປະຊຸມເປັນທາງການ, ສະຫາຍ ອ່ອນລຳພັນ ບົວສີແກ້ວ ກຳມະການພັກແຂວງໄດ້ເຜີຍແຜ່ຄໍາສັງຂອງຄະນະເລຂາທິການສູນກາງພັກ ສະບັບເລກທີ 173/ຄລສພ, ລົງວັນທີ 5 ກໍລະກົດ 2024 ວ່າດ້ວຍການຄາດຄະເນແບ່ງຄວາມຮັບຜດຊອບຂອງຄະນະປະຈຳພັກແຕ່ລະຂັ້ນ, ຄາດຄະເນການແບ່ງຄວາມຮັບຜິດຊອບ ຄະນະປະຈຳພັກແຂວງ-ນະຄອນຫຼວງວຽງຈັນໃຫ້ປະຕິບັດດັ່ງນີ້: ເລຂາຄະນະບໍລິຫານງານພັກແຂວງ ເປັນປະທານສະພາປະຊາຊົນແຂວງ-ນະຄອນຫຼວງວຽງຈັນ, ປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ແລະ ເປັນປະທານຄະນະກຳມະການປ້ອງກັນຊາດ-ປ້ອງກັນຄວາມສະຫງົບແຂວງ-ນະຄອນຫຼວງວຽງຈັນ, ຮັບຜິດຊອບນໍາພາ-ຊີ້ນໍາວຽກງານຮອບດ້ານ ແລະ ຮັບຜິດຊອບໂດຍກົງຕໍ່ຜົນໄດ້, ຜົນເສຍໃນການນໍາພາຈັດຕັ້ງປະຕິບັດໜ້າທີ່ການເມືອງຂອງແຂວງ-ນະຄອນຫຼວງວຽງຈັນ; ຮອງເລຂາຄະນະບໍລິຫານງານພັກແຂວງ-ນະຄອນຫຼວງວຽງຈັນ: ເປັນປະທານຄະນະກຳມະການປົກຄອງແຂວງ-ນະຄອນຫຼວງວຽງຈັນ, ຮອງເລຂາຄະນະບໍລິຫານງານພັກແຂວງ-ນະຄອນຫຼວງວຽງຈັນ ຮັບຜິດຊອບຊີ້ນໍາວຽກງານການເມືອງແນວຄິດ, ວຽກງານພັກ-ພະນັກງານ, ວຽກງານປັບປຸງກົງຈັກການຈັດຕັ້ງ ແລະ ອົງການຈັດຕັ້ງມະຫາຊົນ.
ສ່ວນກຳມະການປະຈຳພັກແຂວງ-ນະຄອນຫຼວງວຽງຈັນທີ່ໄດ້ຮັບການເລືອກຕັ້ງ ແມ່ນແບ່ງງານນໍາພາໃນບາງຂົງເຂດຕາມຄວາມຮຽກຮ້ອງຕ້ອງການຂອງວຽກງານຂອງແຕ່ລະອົງຄະນະພັກເປັນຕົ້ນ: ປະທານແນວລາວສ້າງຊາດ, ຫົວໜ້າຄະນະຈັດຕັ້ງ, ປະທານຄະນະກວດກາພັກ-ລັດ, ຂົງປ້ອງກັນຊາດ-ປ້ອງກັນຄວາມສະຫງົບ, ຮອງປະທານສະພາປະຊາຊົນ, ຮອງປະທານຄະນະກຳມະການປົກຄອງແຂວງ-ນະຄອນຫຼວງວຽງຈັນ, ເລຂາຄະນະບໍລິຫານງານພັກເມືອງ-ນະຄອນໃນເທດສະບານແຂວງ-ນະຄອນຫຼວງວຽງຈັນ. ພ້ອມນັ້ນໄດ້ເຜີຍແຜ່ເອກະສານແຈ້ງການເລກທີ 865/ຄຈສພ, ລົງວັນທີ 14 ກໍລະກົດ 2025 ກ່ຽວກັບການເອີ້ນຊື່ປະທານ, ຮອງປະທານຄະນະກຳມະການປົກຄອງຂັ້ນແຂວງ, ຂັ້ນເມືອງ; ຜ່ານແຈ້ງການຂອງຄະນະຈັດຕັ້ງສູນກາງພັກ ສະບັບເລກທີ 1344/ຄຈສພ, ລົງວັນທີ 13 ສິງຫາ 2025 ກ່ຽວກັບການຈັດຕັ້ງປະຕິບັດວຽກງານຂອງອົງການປົກຄອງທ້ອງຖິ່ນ; ຜ່ານແຈ້ງການຂອງຄະນະຈັດຕັ້ງສູນກາງພັກສະບັບເລກທີ 1573/ຄຈສພ, ລົງວັນທີ 5 ກັນຍາ 2025 ກ່ຽວກັບຈໍານວນ ແລະ ການແຕ່ງຕັ້ງກຳມະການຄະນະປົກຄອງແຕ່ລະຂັ້ນ.
 |
ໃນກອງປະຊຸມ, ສະຫາຍ ຄຳວິໃສ ຜຸຍຍະວົງ ກຳມະການປະຈຳພັກແຂວງໄດ້ຜ່ານຮ່າງແຜນຈັດຕັ້ງເຊື່ອມຊຶມເຜີຍແຜ່ມະຕິກອງປະຊຸມໃຫຍ່ຜູ້ແທນອົງຄະນະພັກແຂວງ ຄັ້ງທີ X. ຈາກນັ້ນ, ສະຫາຍ ໂພໄຊ ໄຂຄໍາພິທູນ ຮອງເລຂາພັກແຂວງ ກໍໄດ້ຜ່ານຮ່າງແຜນດໍາເນີນງານຂອງຄະນະບໍລິຫານງານພັກແຂວງ ສະໄໝທີ X, ສະຫາຍ ນາງ ດາວວອນ ໄຊສຸລຽນ ຮອງເລຂາພັກແຂວງ ຜ່ານຮ່າງລະບອບແບບແຜນວິທີເຮັດວຽກຂອງຄະນະບໍລິຫານງານພັກແຂວງ ສະໄໝທີ X ແລະ ໃນກອງປະຊຸມຍັງໄດ້ຜ່ານຮ່າງແຜນພັດທະນາເສດຖະກິດ-ສັງຄົມ 5 ປີ ຂອງແຂວງ ຄັ້ງທີ X ແລະ ແຜນງົບປະມານແຫ່ງລັດ 5 ປີຂອງແຂວງໄລຍະປີ 2026-2030, ຮັບຟັງການລາຍງານກ່ຽວກັບກະກຽມສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 50 ປີ, ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 105 ປີ, ສະຫຼຸບບັ້ນແຂ່ງຂັນຮັກຊາດ ແລະ ພັດທະນາ ໄລຍະ 2021-2025; ຮັບຟັງການລາຍງານການກະກຽມຄວາມພ້ອມໃນການສໍາຫຼວດພົນລະເມືອງ ແລະ ທີ່ຢູ່ອາໃສຄັ້ງທີ V, ລາຍງານສະພາບການຈັດຕັ້ງປະຕິບັດວຽກງານ ປກຊ-ປກສ ແຂວງ ແລະ ທິດທາງໃນຕໍ່ໜ້າ, ຜ່ານຮ່າງມະຕິຕົກລົງວ່າດ້ວຍການແບ່ງວຽກ, ແບ່ງຄວາມຮັບຜິດຊອບພາຍໃນຄະນະບໍລິຫານງານພັກແຂວງສະໄໝທີ X, ຕິດພັນກັບການປັບປຸງໂຄງປະກອບການຈັດຕັ້ງຂອງຄະນະກຳມະການປົກຄອງແຂວງ. ຫຼັງຈາກນັ້ນ, ປະທານກອງປະຊຸມກໍໄດ້ມີຄຳຖາມເຈາະຈີ້ມໃຫ້ສະຫາຍຄະນະບໍລິຫານງານພັກແຂວງໄດ້ປະກອບຄຳຄິດຄຳເຫັນໃສ່ຮ່າງເອກະສານ ເພື່ອຄວາມເປັນເອກະພາບໃນວຽກງານ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ