ກອງປະຊຸມຄົບຄະນະກໍາມະການບໍລິຫານງານ ອພສ ແຂວງໄຊຍະບູລີ

ກອງປະຊຸມສາມັນຄົບຄະນະກໍາມະການບໍລິຫານງານອົງການພຸດທະສາສະໜາສໍາພັນລາວ (ອພສ) ແຂວງໄຊຍະບູລີຄັ້ງທີ 4 ສະໄໝທີ IV ປະຈໍາປີ 2023 ໄດ້ຈັດຂຶ້ນໃນວັນທີ 1 ກຸມພານີ້ ທີ່ຫ້ອງປະຊຸມແນວລາວສ້າງຊາດແຂວງໄຊຍະບູລີ ພາຍໃຕ້ການເປັນປະທານຂອງ ພະອາຈານ ບຸນທຽນ ພຸດທະວະໂຣ ປະທານ ອພສ ແຂວງໄຊຍະບູລີ, ໃຫ້ກຽດເຂົ້າຮ່ວມຂອງທ່ານ ຄໍາສີ ແພງສະຫວັນ ກໍາມະການປະຈໍາພັກແຂວງ ປະທານແນວລາວສ້າງຊາດແຂວງໄຊຍະບູລີ, ຕາງໜ້າຈາກພະແນກການທີ່ກ່ຽວຂ້ອງເຂົ້າຮ່ວມແບບທາງໄກ ແລະ ເຊິ່ງໜ້າ.
    ພະອາຈານ ບຸນທຽນ ພຸດທະວະໂຣໄດ້ກ່າວເປີດກອງປະຊຸມວ່າ: ກອງປະຊຸມຄັ້ງນີ້ ຈະໄດ້ພ້ອມກັນຄົ້ນຄວ້າ ແລະ ປະກອບຄໍາຄິດຄໍາເຫັນຕໍ່ຮ່າງລາຍງານການນໍາພາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 4 ໃນໄລຍະ 1 ປີ ຜ່ານມາ ແລະ ພ້ອມກັນວາງແຜນການປີ 2024, ຄົ້ນຄວ້າ ແລະ ຮັບຮອງເອົາການປັບປຸງກົງຈັກ ແລະ ບຸກຄະລາກອນໃນຄະນະກໍາມະການອພສ ແຂວງໄຊຍະບູລີ ຈໍານວນໜຶ່ງເພື່ອທົດແທນອົງທີ່ລາສິກຂາ. ຈາກນັ້ນ ພະອາຈານ ສົມພອນ ຄໍາຈະເລີນ ຮອງປະທານ ອພສ ແຂວງໄຊຍະບູລີ ໄດ້ຂຶ້ນລາຍງານຕື່ມວ່າ: ຕະຫຼອດໄລຍະ 1 ປີ ຜ່ານມາ ອພສ ແຂວງຂັ້ນຕ່າງໆ ໄດ້ເອົາໃຈໃສ່ສັ່ງສອນພະສົງ ສໍາມະເນນ ທາງດ້ານຫຼັກສິນທໍາ ຄຽງຄູ່ກັບການເຜີຍແຜ່ລະບຽບກົດໝາຍຂອງຝ່າຍບ້ານເມືອງຢ່າງຕໍ່ເນື່ອງ ແນໃສເຮັດໃຫ້ພະສົງ, ສໍາມະເນນມີລະບຽບວິໄນ, ຢືດຖືຫຼັກສິນທໍາເປັນແບບແຜນໃນການດໍາລົງຊີວິດ ຕິດພັນກັບນໍ້າໃຈຮັກຊາດ ຮັກລະບອບໃໝ່ສາມາດສ້າງຄວາມສາມັກຄີຊ່ວຍເຫຼືອຊຶ່ງກັນ ແລະ ກັນ ປັດຈຸບັນອພສ ປະຈໍາແຂວງໄຊຍະບູລີ ມີຄະນະກໍາມະການສູນກາງ ອພສ ແຫ່ງ ສປປ ລາວ 2 ອົງ, ຄະນະກໍາມະການບໍລິຫານງານ ອພສ ແຂວງທັງໝົດ 20 ອົງ ໃນນັ້ນຄະນະບໍລິຫານປະຈໍາການ ອພສ ແຂວງ 7 ອົງ, ຄະນະທີ່ປຶກສາ ອພສ ແຂວງ 2 ອົງ ແລະ ຄະນະກໍາມະການບໍລິຫານງານ ອພສ ເມືອງ 10 ເມືອງທົ່ວແຂວງ ທັງໝົດ 86 ອົງ ແລະ ມີວັດທັງໝົດ 333 ວັດ, ທຽບໃສ່ປີຜ່ານມາເພີ່ມຂຶ້ນ 1 ວັດ, ວັດທີ່ມີພະສົງປະຈໍາການຢູ່ 272 ວັດ ແລະ ວັດບໍ່ມີພະສົງຢູ່ປະຈໍາການ 61 ວັດ ທົ່ວແຂວງໄຊຍະບູລີ ມີພະສົງ, ສໍາມະເນນ ແລະ ແມ່ຂາວທັງໝົດ 1.470 ອົງ.    
ຂ່າວ-ພາບ: ຄໍາໝັ້ນ