ກອງປະຊຸມຄົບຄະນະພັກເມືອງຄອບ ຄັ້ງທີ 10 ສະໄໝທີ V 

ອົງຄະນະພັກເມືອງຄອບ ແຂວງໄຊຍະບູລີ ໄດ້ດໍາເນີນກອງປະຊຸມຄົບຄະນະ ຄັ້ງທີ 10 ສະໄໝທີ V  ຂຶ້ນທີ່ສະໂມສອນຂອງເມືອງ ໃນວັນທີ 10 ຕຸລາ ນີ້ ໂດຍການເປັນປະທານຂອງ ສະຫາຍ ແພງຊ້ອຍ ແພງເມືອງ ກໍາມະການພັກແຂວງ ເລຂາພັກເມືອງ ເຈົ້າເມືອງໆຄອບ, ເປັນກຽດເຂົ້າຮ່ວມຂອງ ສະຫາຍ ພົຈວ ຄຳແພງ ເພັດ ກໍາມະການປະຈໍາພັກແຂວງ ຫົວໜ້າປ້ອງກັນຄວາມສະຫງົບແຂວງ, ມີຄະນະປະຈໍາພັກເມືອງ, ກໍາມະການພັກເມືອງ, ເລຂາຄະນະພັກຮາກຖານ, ສໍານັກງານ-ອົງການ ແລະ ແຂກທີ່ຖືກເຊີນ ພ້ອມດ້ວຍເລຂາພັກບ້ານ 28 ບ້ານໃນທົ່ວເມືອງເຂົ້າຮວມ.
ໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງການຜ່ານຮ່າງບົດສະຫຼຸບການຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມ 9 ເດືອນ ແລະ ທິດທາງແຜນການ 3 ເດືອນທ້າຍປີ 2023, ບົດລາຍງານການປະຕິບັດວຽກງານພັກ-ພະນັກງານ 9 ເດືອນ ແລະ ທິດທາງແຜນການ 3 ເດືອນ ທ້າຍປີ, ການເຊື່ອມຊຶມເອກະສານຄໍາແນະນໍາຂອງຄະນະປະຈໍາພັກເມືອງ ສະບັບເລກທີ 128 ລົງວັນທີ 9 ຕຸລາ 2023 ວ່າດ້ວຍການຜັນຂະຫຍາຍຄໍາແນະນໍາຂອງຄະນະປະຈໍາພັກແຂວງ ສະບັບເລກທີ 324 ລົງວັນທີ 6 ກັນຍາ 2023, ຮັບຟັງແຜນດໍາເນີນງານຂອງຄະນະປະຈໍາພັກເມືອງ ເພື່ອການກະກຽມກອງປະຊຸມໃຫຍ່ 3 ຂັ້ນຂອງພັກໃນທົ່ວເມືອງ ສະບັບເລກທີ 110 ລົງວັນທີ 26 ກັນຍາ 2023, ຄໍາແນະນໍາ ສະບັບເລກທີ 285 ຂອງຄະນະກວດກາສູນກາງພັກ. ພ້ອມດຽວກັນ ກໍຍັງໄດ້ຮັບຟັງບົດລາຍງານແຜນກໍ່ສ້າງໜ່ວຍພັກ, ປອດໃສ, ເຂັ້ມແຂງ ແລະ ໜັກແໜ້ນ ປີ 2023, ບົດລາຍງານການປະຕິບັດການຮຽນ-ການສອນສົກຮຽນ 2023-2024 ຕິດພັນກັບການແກ້ໄຂປາກົດການຫຍໍ້ທໍ້ໃນຂົງເຂດວຽກງານການສຶກສາ ແລະ ກິລາ, ບົດລາຍງານການກະກຽມການເກັບກູ້ພືດລະດູຝົນ ແລະ ການກະກຽມໃຫ້ແກ່ການຜະລິດລະດູແລ້ງ, ບົດລາຍງານສະພາບການຈັດຕັ້ງປະຕິບັດການເກັບລາຍຮັບເຂົ້າງົບປະມານ 9 ເດືອນ ແລະ ທິດທາງແຜນການ 3 ເດືອນທ້າຍປີ ແລະ ບົດລາຍງານການປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ.
ໂອກາດດຽວກັນ, ແຕ່ລະສະຫາຍກໍໄດ້ຜັດປ່ຽນກັນຂຶ້ນປະກອບຄໍາຄິດ-ຄໍາເຫັນຕໍ່ກັບບາງໜ້າວຽກງານທີ່ຍັງຄົງຄ້າງ ຕ້ອງໄດ້ຮັບການປັບປຸງແກ້ໄຂ ໂດຍແນໃສ່ເຮັດໃຫ້ເສດຖະກິດ-ສັງຄົມຂອງເມືອງມີການຂະຫຍາຍຕົວຢ່າງຕໍ່ເນື່ອງ, ສັງຄົມມີຄວາມສະຫງົບ ແລະ ເຮັດໃຫ້ຊີວິດການເປັນຢູ່ຂອງປະຊາຊົນໄດ້ຮັບການປັບປຸງໃຫ້ດີຂຶ້ນໄປເທື່ອລະກ້າວ; ກອງປະຊຸມດັ່ງກ່າວໄດ້ດໍາເນີນໄປດ້ວຍບັນຍາກາດອັນຟົດຟື້ນ ແລະ ປິດລົງດ້ວຍໝາກຜົນທີ່ຈົບງາມ.
(ຂ່າວ-ພາບ: ພົມມະນີ ອິນສະຫວັນ)