ກອງປະຊຸມຄົບຄະນະພັກເມືອງນານ ຄັ້ງທີ 14 ສະໄໝທີ VII

ກອງປະຊຸມຄົບຄະນະບໍລິຫານງານພັກເມືອງນານ ຄັ້ງທີ 14 ສະໄໝທີ VII ໄດ້ຈັດຂຶ້ນຫວ່າງບໍ່ດົນມານີ້ ທີ່ສະໂມສອນຂອງເມືອງ ໂດຍການເປັນປະທານຂອງ ສະຫາຍ ຄໍາເກັ່ງ ຈັນທະວີສຸກ ກໍາມະການພັກແຂວງຫຼວງພະບາງ ເລຂາພັກເມືອງ ເຈົ້າເມືອງໆນານ, ມີຄະນະປະຈໍາພັກເມືອງ, ກໍາມະການພັກເມືອງເຂົ້າຮ່ວມ. 
ສະຫາຍ ບຸນທີ ມະນີວົງ ຮອງເລຂາພັກເມືອງ ໄດ້ຂຶ້ນຜ່ານບົດສະຫຼຸບວຽກງານຮອບດ້ານຂອງເມືອງ ປະຈໍາ 9 ເດືອນ ແລະທິດທາງແຜນການ 3 ເດືອນທ້າຍປີ 2023 ໂດຍມີທັງດ້ານດີ, ດ້ານອ່ອນ ແລະຂໍ້ຄົງຄ້າງ ທີ່ຈະຕ້ອງໄດ້ເພີ່ມທະວີເອົາໃຈໃສ່ເພື່ອປັບປຸງແກ້ໄຂ ໃຫ້ມີປະສິດທິພາບ ແລະປະສິດທິຜົນສູງຂຶ້ນກວ່າເກົ່າ, ຈາກນັ້ນ ສະຫາຍ ແສງເພັດ ເພັດດວງຈັນ ກໍາມະການປະຈໍາພັກເມືອງ ຮອງເຈົ້າເມືອງໆນານ ໄດ້ຜ່ານແຜນພັດທະນາເສດຖະກິດ-ສັງຄົມ 9 ເດືອນ ແລະທິດທາງແຜນການ 3 ເດືອນ ທ້າຍປີ 2023 ໂດຍແຕ່ລະຂົງເຂດວຽກງານຕ້ອງຫັນເປັນແຜນງານ,ໂຄງການລະອຽດເພື່ອຈັດຕັ້ງປະຕິບັດໃຫ້ເປັນຮູບປະທໍາ ແນໃສ່ສືບຕໍ່ພັດທະນາວຽກງານຮອບດ້ານຂອງເມືອງ ໃຫ້ມີການຫັນປ່ຽນທີ່ດີ ຮັບປະກັນເຮັດໃຫ້ເສດຖະກິດພາຍໃນເມືອງນານ ໄດ້ຮັບການແກ້ໄຂ ແລະເຕີບໃຫຍ່ຂະຫຍາຍຕົວດີຂຶ້ນເປັນກ້າວໆ  ໂອກາດນີ້ຜູ້ເຂົ້າຮ່ວມໄດ້ມີຄໍາເຫັນ ເພື່ອຊອກຫາວິທີທາງແກ້ໄຂບັນຫາອ່ອນ, ຂໍ້ຄົງຄ້າງໃນຕໍ່ໜ້າ ໂດຍສະເພາະສຸມໃສ່ແກ້ໄຂບັນຫາວຽກງານດ້ານວິຊາສະເພາະ, ການຂຸດຄົ້ນລາຍຮັບເຂົ້າງົບປະມານ, ການລົງຊຸກຍູ້ການປູກພືດ ແລະການເກັບກູ້ຜົນຜະລິດໃນລະດູຝົນ, ການສະກັດກັ້ນການລັກລອບຕັດໄມ້ ທີ່ບໍ່ຖືກຕ້ອງກັບລະບຽບກົດໝາຍ, ບັນຫາການຈັດສັນວັດແທກດິນ, ການຫັນປ່ຽນດິນ, ອອກໃບຕາດິນ, ການຄຸ້ມຄອງຊັບພະຍາກອນທໍາມະຊາດ, ຊຸກຍູ້ ແກ້ໄຂບັນຫານັກຮຽນຕົກລົ່ນ, ປະລະການຮຽນ, ການສັບຊ້ອນຄູ-ອາຈານ, ບັນຫາການຕິດຕາມ ແລະສະກັດກັ້ນການແຜ່ລະບາດພະຍາດຕາມລະດູການ ແລະວຽກງານອື່ນໆທີ່ຕິດພັນກັບຄວາມຮັບຜິດຊອບຂອງແຕ່ລະຂົງເຂດວຽກງານ. 
ຕອນທ້າຍ ສະຫາຍ ຄໍາເກັ່ງ ຈັນທະວີສຸກ ໄດ້ເນັ້ນໜັກໃຫ້ບັນດາຂະແໜງການຂອງເມືອງ ເອົາໃຈໃສ່ນໍາພາ-ຊີ້ນໍາພະນັກງານ ໃນການຈັດຕັ້ງປະຕິບັດວຽກງານຕາມຂອບເຂດສິດໜ້າທີ່ຂອງຕົນທີ່ໄດ້ຮັບມອບໝາຍໃຫ້ມີຄວາມລະອຽດຊັດເຈນ ມີປະສິດທິພາບ ແລະປະສິດທິຜົນ ພ້ອມກັນນັ້ນຕ້ອງປຸກລະດົມບັນດາບ້ານປັງປຸງແກ້ໄຂເສັ້ນທາງຂອບເຂດບ້ານ ຊຸກຍູ້ສົ່ງເສີມປະຊາຊົນໃນການປູກ-ການລ້ຽງຢ່າງແຂງແຮງ ແນໃສ່ເຮັດໃຫ້ວຽກງານຮອບດ້ານຂອງເມືອງ ສາມາດບັນລຸໄດ້ຕາມຈຸດປະສົງ ແລະຄາດໝາຍທີ່ວາງໄວ້.
(ຂ່າວ-ພາບ: ຫຸມແພງ ສີດາໄລ)