ກອງປະຊຸມກວດກາຄວາມສອດຄ່ອງທາງດ້ານກົດໝາຍຂອງຮ່າງກົດໝາຍວ່າດ້ວຍ ການສະກັດກັ້ນ ແລະ ຕ້ານອັກຄີໄພ

ເມືອບໍ່ດົນມານີ້ ທີ່ ກະຊວງຍຸຕິທໍາ ກົມກົດໝາຍໄດ້ຈັດກອງປະຊຸມກວດກາຄວາມສອດຄ່ອງທາງດ້ານກົດໝາຍຂອງຮ່າງກົດໝາຍວ່າດ້ວຍ ການສະກັດກັ້ນ ແລະ ຕ້ານອັກຄີໄພ ຂຶ້ນ ໂດຍການເປັນປະທານຮ່ວມຂອງ ທ່ານ ກົງຈີ ຢ່າງຈື່ ຮອງລັດຖະມົນຕີ ກະຊວງຍຸຕິທຳ ແລະ ທ່ານ ພົນຕີ ສົມວັນ ສາຍລ້ອງພາ ຮອງລັດຖະມົນຕີ ກະຊວງປ້ອງກັນຄວາມສະຫງົບ,  ມີຫົວໜ້າ-ຮອງຫົວໜ້າກົມກົດໝາຍ, ຫົວໜ້າ-ຮອງຫົວໜ້າພະແນກ, ພາກສ່ວນທີ່ກ່ຽວຂ້ອງ ແລະ ຄະນະຮັບຜິດຊອບປັບປຸງສ້າງຮ່າງກົດໝາຍ ດັ່ງກ່າວ ເຂົ້າຮ່ວມ.
ຮ່າງກົດໝາຍວ່າດ້ວຍ ການສະກັດກັ້ນ ແລະ ຕ້ານອັກຄີໄພ ໄດ້ກໍານົດບັນດາຫຼັກການ, ລະບຽບການ ແລະ ມາດຕະການ ກ່ຽວກັບການ ຄຸ້ມຄອງ, ຕິດຕາມ ກວດກາ ວຽກງານສະກັດກັ້ນ ແລະ ຕ້ານອັກຄີໄພ ມີຄວາມໜັກແໜ້ນ, ເຂັ້ມແຂງ, ຊໍານານທາງດ້ານວິຊາສະເພາະ, ມີແບບແຜນວິທີເຮັດວຽກທີ່ວ່ອງໄວ, ທັນສະໄໝເທື່ອລະກ້າວ, ຮັບປະກັນໃຫ້ການສະກັດກັ້ນ ແລະ ຕ້ານອັກຄີໄພມີປະສິດທິພາບ ແລະ ປະສິດທິຜົນ ແນໃສ່ປ້ອງກັນຜົນກະທົບຕໍ່ຊີວິດ, ສຸຂະພາບ, ຊັບສິນຂອງພົນລະເມືອງ, ຂອງລັດ, ທໍາມະຊາດ ແລະ ສິ່ງແວດລ້ອມ ເຮັດໃຫ້ສັງຄົມມີຄວາມສະຫງົບ ແລະ ປອດໄພ ທາງດ້ານອັກຄີໄພ ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ.  ເພື່ອເຮັດໃຫ້ຮ່າງກົດໝາຍສະບັບນີ້ມີເນື້ອໃນຄົບຖ້ວນ, ສົມບູນ ແລະ ຮັດກຸມຂຶ້ນຕື່ມ ຜູ້ເຂົ້າຮ່ວມປະຊຸມກໍໄດ້ມີການສົນທະນາ ແລະ ແລກປ່ຽນຄວາມຄິດເຫັນ ຢ່າງກົງໄປກົງມາ ແລະ ດ້ວຍຄວາມຮັບຜິດຊອບສູງ. 
       ຂ່າວ: ອ່ອນຄໍາ; ພາບ: ນາງ ບຸນຖອມ