ຈຸດປະສົງ ຂອງກອງປະຊຸມດັ່ງກ່າວ ແມ່ນເພື່ອຮັບຮອງເອົາບັນດາ ກອບການຮ່ວມມືຕ່າງໆ ພ້ອມທັງແລກປ່ຽນບົດຮຽນ ພາຍໃຕ້ຫົວຂໍ້ “ເພີ່ມທະວີການຮ່ວມມື ເພື່ອຈັດຕັ້ງປະຕິບັດ ເປົ້າໝາຍລວມ ໃນການຮັບມືກັບ ການປ່ຽນແປງຂອງດິນຟ້າອາກາດ - Accelerating Climate Action for Care, Partnership and Common Needs”.
ທ່ານ ລັດຖະມົນຕີກະຊວງກະສິກຳ ແລະ ສິ່ງແວດລ້ອມ ໄດ້ກ່າວມີຄຳເຫັນ ໂດຍເນັ້ນໃສ່ການສົ່ງເສີມ ແລະ ຊຸກຍູ້ການເຮັດວຽກຮ່ວມກັນຢ່າງໃກ້ຊິດຕິດແທດ ເພື່ອຮັບປະກັນປະສິດຕິພາບ ໃນການຄຸ້ມຄອງຊີວະນາໆພັນ, ການປັບໂຕເຂົ້າກັບການປ່ຽນແປງຂອງດິນຟ້າອາກາດ ແລະ ການຫຼຸດຜ່ອນມົນລະພິດໝອກຄວັນ ພາຍໃນພາກພື້ນອາຊຽນ ແລະ ສາກົນ. ນອກຈາກນັ້ນ, ທ່ານລັດຖະມົນຕີ ຍັງໄດ້ສະແດງຄວາມຂອບໃຈ ທີ່ທາງບັນດາປະເທດອາຊຽນໄດ້ສະ ເໜີໃຫ້ ເມຶອງໄຊ ແຂວງ ອຸດົມໄຊ ເປັນ 1 ໃນ 6 ຕົວເມຶອງ ທີ່ໄດ້ຮັບລາງວັນ ຕົວເມືອງຍືນຍົງດ້ານສິ່ງແວດລ້ອມ ຊຶ່ງສະແດງໃຫ້ເຫັນ ເຖິງຄວາມເອົາໃຈໃສ່ ໃນການຈັດຕັ້ງປະຕິບັດວຽກງານດ້ານສິ່ງແວດລ້ອມ ຂອງ ສປປ ລາວ ທັງຂັ້ນສູນກາງ ແລະ ທ້ອງຖິ່ນ.
ກອງປະຊຸມ ຍັງໄດ້ຕົກລົງເຫັນດີ ເພື່ອຮັບຮອງເອົາບັນດາກອບການຮ່ວມມືຕ່າງໆ ພ້ອມທັງສະແດງຄວາມຊົມເຊີຍ ໃນການຮ່ວມມືກັນພັດທະນາແຜນຍຸດທະສາດອາຊຽນ ດ້ານສິ່ງແວດລ້ອມ (Post-2025 ASEAN Strategic Plan on Environment - ASPEN) ແລະ ແຜນດຳເນີນງານຍຸດທະສາດອາຊຽນດ້ານການປ່ຽນແປງດິນຟ້າອາກາດ (The ASEAN Climate Change Strategic Action Plan - ACCSAP), ພ້ອມທັງສະ ເໜີໃຫ້ມີການຮັບຮອງແຜນຍຸດທະສາດດັ່ງກ່າວ ເພື່ອນຳໃຊ້ເຂົ້າໃນການຈັັດຕັ້ງປະຕິບັດວຽກງານດ້ານສິ່ງແວດລ້ອມ ໂດຍສະເພາະການຮ່ວມມືດ້ານການນຳໃຊ້ນະວັດຕະກຳ ແລະ ເຕັກໂນໂລຊີ ເຂົ້າໃນກິດຈະກຳການຫຼຸດຜ່ອນການປ່ອຍກາກບອນ, ມົນລະພິດ ຈາກການນຳໃຊ້ພາສຕິກ ແລະ ການຈັດຕັ້ງປະຕິບັດ ແນວຄວາມຄິດເສດຖະກິດໝູນວຽນ.
ການເຂົ້າຮ່ວມກອງປະຊຸມໃນຄັ້ງນີ້ ສປປ ລາວ ກໍຄື ກະຊວງກະສິກຳ ແລະ ສິ່ງແວດລ້ອມ ໄດ້ຮັບຜົນປະໂຫຍດຫຼາຍດ້ານ ເປັນຕົ້ນແມ່ນການປະກອບສ່ວນໃນເວທີພາກພື້ນ ລວມໄປເຖິງການເຂົ້າເຖິງການສະໜັບສະໜູນທາງດ້ານວິຊາການ ແລະ ງົບປະມານ ໃນການສ້າງຄວາມທົນທານ ຕໍ່ກັບການປ່ຽນແປງດິນຟ້າອາກາດ, ການຫຼຸດຜ່ອນໝອກຄວັນ ແລະ ການພັດທະນາແບບຍືນຍົງ. ນອກຈາກນີ້, ຍັງເປີດໂອກາດໃຫ້ຂະແໜງການກະສິກຳ ແລະ ສິ່ງແວດລ້ອມ ໄດ້ປະກອບສ່ວນໃນການພັດທະນາບັນດາແຜນງານພາກພື້ນອາຊຽນ ເພື່ອຮັບປະກັນຜົນປະໂຫຍດສູງສຸດ ຂອງ ສປປ ລາວ. ສຳລັບແຜນງານໃນຕໍ່ໜ້າ, ສປປ ລາວ ແມ່ນຈະໄດ້ກະກຽມເພື່ອເປັນປະທານກອງປະຊຸມຄະນະກຳມະການລັດຖະມົນຕີອະນຸພາກພື້ນແມ່ນ້ຳຂອງດ້ານມົນລະພິດໝອກຄວັນຂ້າມຜ່ານຊາຍແດນຄັ້ງທີ 14 ແລະ ກອງປະຊຸມໜ່ວຍປະຕິບັດງານອະນຸພາກພື້ນແມ່ນ້ຳຂອງດ້ານມົນລະພິດຂ້າມຜ່ານຊາຍແດນຄັ້ງທີ 20 (14th MSC, 20th TWG-Mekong) ພ້ອມທັງກະກຽມຄວາມພ້ອມຮ່ວມກັນໃນນາມເປັນປະເທດສະມາຊິກອາຊຽນເພື່ອປະກອບສ່ວນເຂົ້າໃນການວາງສະແດງວຽກງານອາຊຽນດ້ານສິ່ງແວດລ້ອມ (ASEAN Pavilion) ໃນກອງປະຊຸມລັດພາຄີສົນທິສັນຍາ ສປຊ ວ່າດ້ວຍການປ່ຽນແປງດິນຟ້າອາກາດ (COP30) ທີ່ປະເທດບຣາຊິນ.
ໃນລະຫວ່າງການເຂົ້າຮ່ວມກອງປະຊຸມໃນຄັ້ງນີ້, ກະຊວງກະສິກຳ ແລະ ສິ່ງແວດລ້ອມ ຂອງ ສປປ ລາວ ຍັງໄດ້ ພົບປະສອງຝ່າຍ ກັບ ກະຊວງກະສິກຳ ແລະ ສິ່ງແວດລ້ອມ ຂອງຍີ່ປຸ່ນ ແລະ ໄດ້ເຊັນສັນຍາການຮ່ວມມືດ້ານສິ່ງແວດລ້ອມຮ່ວມກັນ ຊຶ່ງການຮ່ວມມືດັ່ງກ່າວ ແມ່ນເນັ້ນໃສ່ການຄຸ້ມຄອງ ແລະ ປົກປັກຮັກສາສິ່ງແວດລ້ອມ ໂດຍສະເພາະການຮັບມືກັບການປ່ຽນແປງຂອງສະພາບດິນຟ້າອາກາດ, ການປົກປັກຮັກສາຊີວະນາໆພັນ, ການຄວບຄຸມມົນລະພິດ ແລະ ການພັດທະນາແບບຍືນຍົງ. ນອກຈາກນັ້ນ ກະຊວງກະສິກຳ ແລະ ສິ່ງແວດລ້ອມ ຂອງ ສປປ ລາວ ຍັງໄດ້ພົບປະກັບ ກະຊວງຍືນຍົງ ແລະ ສິ່ງແວດລ້ອມ ປະເທດສິງກະໂປ ເພື່ອປຶກສາຫາລື ໃນການດັດແກ້ຂົງເຂດການຮ່ວມມືຂອງສອງຝ່າຍ ໂດຍອີງໃສ່ພາລະບົດບາດໃໝ່ ຂອງ ກະຊວງກະສິກຳ ແລະ ສິ່ງແວດລ້ອມ ພ້ອມທັງກະກຽມການສືບຕໍ່ ໄລຍະການຮ່ວມມື ຂອງ ບົດບັນທຶກຄວາມເຂົ້າໃຈການຮ່ວມມື ລະຫວ່າງ ສອງກະຊວງ ຂອງສອງປະເທດ
ຂ່າວ:ກສ
ຄໍາເຫັນ