ກອງປະຊຸມແລກປ່ຽນວຽກງານຂໍ້ມູນຂ່າວສານສິນເຊື່ອແຫ່ງ ສປປ ລາວ

ກອງປະຊຸມແລກປ່ຽນວຽກງານຂໍ້ມູນຂ່າວສານສິນເຊື່ອແຫ່ງ ສປປ ລາວ(ຂສລ) ປະຈໍາປີ 2023 ໄດ້ຈັດຂຶ້ນໃນວັນທີ 16 ພະຈິກຜ່ານມາທີ່ຫ້ອງປະຊຸມໃຫຍ່ອາຄານຕະຫຼາດຫຼັກຊັບລາວໂດຍການເປັນປະທານຂອງທ່ານ ນາງ ຂັນແກ້ວ ຫຼ້າມະນີເງົາ ຮອງຜູ້ວ່າການທະນາຄານແຫ່ງ ສປປ ລາວປະທານສະພາບໍລິຫານ ບໍລິສັດ ຂສລ, ມີພະນັກງານ, ສະມາຊິກບໍລິສັດກ່ຽວຂ້ອງເຂົ້າຮ່ວມ.
ທ່ານນາງຂັນແກ້ວຫຼ້າມະນີເງົາກ່າວວ່າ: ວຽກງານຂໍ້ມູນຂ່າວສານສິນເຊື່ອເປັນວຽກງານທີ່ສໍາຄັນ ທີ່ຕິດພັນກັບແຜນຍຸດທະສາດຂອງທະນາຄານແຫ່ງ ສປປ ລາວ ແລະ ຄໍາສັ່ງຂອງລັດຖະບານໃນການປັບປຸງສະພາບແວດລ້ອມໃນການດໍາເນີນທຸລະກິດຢູ່ ສປປ ລາວ ຊຶ່ງບໍລິສັດ ມີພາລະບົດບາດໃນການເກັບກໍາຂໍ້ມູນ ໃຫ້ຖືກຕ້ອງ, ຄົບຖ້ວນ ແລະ ຮັບປະກັນຄຸນນະພາບ ລວມທັງຂໍ້ມູນສິນເຊື່ອ, ຂໍ້ມູນຈາກພາກສ່ວນສາທາລະນຸປະໂພກ ແລະ ກະຊວງທີ່ກ່ຽວຂ້ອງ. ພ້ອມນີ້, ວຽກງານຂໍ້ມູນຂ່າວສານສິນເຊື່ອ ຍັງມີຄວາມສໍາຄັນໃນລະດັບສາກົນ ແລະ ມີຢູ່ຫຼາຍປະເທດ ທີ່ເປັນຂໍ້ມູນສໍາຄັນໃຫ້ແກ່ບັນດາສະຖາບັນການເງິນ ເພື່ອນໍາໃຊ້ເຂົ້າໃນການພິຈາລະນາສິນເຊື່ອໃຫ້ມີປະສິດທິພາບ ແລະ ຫຼຸດຜ່ອນຄວາມສ່ຽງສິນເຊື່ອ. ກອງປະຊຸມໃນຄັ້ງນີ້, ຍັງເປັນເວທີໃນການແລກປ່ຽນບົດຮຽນ, ຂໍ້ສະດວກແລະຂໍ້ຄົງຄ້າງໃນການຈັດຕັ້ງປະຕິບັດວຽກງານຂໍ້ມູນຂ່າວສານສິນເຊື່ອລະຫວ່າງບໍລິສັດຂໍ້ມູນຂ່າວສານສິນເຊື່ອແຫ່ງສປປລາວ, ສະມາຊິກແລະພາກສ່ວນກ່ຽວຂ້ອງເພື່ອປັບປຸງແກ້ໄຂວຽກງານຂໍ້ມູນຂ່າວສານສິນເຊື່ອໃຫ້ດີຂຶ້ນເທື່ອລະກ້າວ.
ໃນໂອກາດນີ້, ທ່ານ ນາງວິນຄໍາລຸນທອນຜູ້ອໍານວຍການໃຫຍ່ບໍລິສັດຂສລ ໄດ້ຂຶ້ນສະຫຼຸບລາຍງານການເຄື່ອນໄຫວວຽກງານ ຂສລ ປະຈໍາປີ 2023ໂດຍມີຜົນສໍາເລັດທາງດ້ານວຽກງານເປັນຕົ້ນ ໄດ້ສະໜອງການບໍລິການຂໍ້ມູນຂ່າວສານສິນເຊື່ອແບບທັນທີ ໃຫ້ແກ່ສະມາຊິກ ຈໍານວນ 180  ແຫ່ງ, ມີຈໍານວນ 216.319 ລາຍການ ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 5,13%; ໄດ້ສໍາເລັດການສຳເລັດການເກັບກຳຂໍ້ມູນການຊົມໃຊ້ ແລະ ຊໍາລະຄ່າໄຟຟ້າ ທົ່ວປະເທດ ຮອດເດືອນ ກໍລະກົດ ປີ 2023 ມີຈໍານວນ 1.393.315 ກົງເຕີເຂົ້າໃນຖານຂໍ້ມູນຂ່າວສານສິນເຊື່ອ; ໄດ້ສໍາເລັດການເກັບກໍາຂໍ້ມູນການຊົມໃຊ້ ແລະ ຊໍາລະຄ່ານໍ້າປະປາ ພາຍໃນນະຄອນຫຼວງວຽງຈັນ ນັບແຕ່ປີ 2021 ຮອດເດືອນຕຸລາ ປີ 2023. ໃນນັ້ນ, ໄດ້ສໍາເລັດການອັບໂຫຼດເຂົ້າໃນລະບົບຂໍ້ມູນຂ່າວສານສິນເຊື່ອຮອດເດືອນສິງຫາ ປີ 2023; ໄດ້ຈັດຕັ້ງປະຕິບັດວຽກງານກວດກາແກ້ໄຂຂໍ້ມູນ ແລະ ຊຸກຍູ້ສະມາຊິກປະຕິບັດວຽກງານຂໍ້ມູນຂ່າວສານສິນເຊື່ອຈໍານວນ 32 ແຫ່ງ (ກວດກາໃນຮູບແບບກັບທີ່ 14 ແຫ່ງ ແລະ ຮູບແບບອອນລາຍ 18 ແຫ່ງ); ໄດ້ສໍາເລັດອອກໃບອະນຸຍາດເຂົ້າເປັນສະມາຊິກຂອງ ບໍລິສັດ ຂສລ ໄດ້ ຈໍານວນ 41 ແຫ່ງ ທຽບໃສ່ແຜນແມ່ນປະຕິບັດໄດ້ 205%; ໄດ້ສຳເລັດການເຜີຍແຜ່, ຝຶກອົບຮົມ ແລະ ແນະນໍາວຽກງານຂໍ້ມູນຂ່າວສານສິນເຊື່ອ, ຂໍ້ກໍານົດກົດລະບຽບ ແລະ ການນໍາໃຊ້ລະບົບຂໍ້ມູນຂ່າວສານສິນເຊື່ອ ໃຫ້ແກ່ສະມາຊິກ ຈຳນວນ 34 ແຫ່ງ (ນະຄອນຫຼວງ 27 ແຫ່ງ ແລະ ທ້ອງຖິ່ນ 7 ແຫ່ງ. ໃນນັ້ນໄດ້ເຮັດໃນຮູບແບບອອນລາຍ 1 ຄັ້ງ); ສໍາເລັດການສ້າງຜະລິດຕະພັນການຊໍາລະຄ່ານໍ້າປະປາ (ຜູ້ຊົມໃຊ້ພາຍໃນນະຄອນຫຼວງວຽງຈັນ) ຊຶ່ງປັດຈຸບັນສາມາດໃຫ້ບໍລິການໃນຮູບແບບຜະລິດຕະພັນສາທາລະນຸປະໂພກ (ລວມມີຄ່າໄຟຟ້າ ແລະ ຄ່ານໍ້າປະປາ) ຊຶ່ງກໍາລັງກະກຽມປະກາດໃຫ້ສະມາຊິກທົດລອງນໍາໃຊ້. ໄດ້ສໍາເລັດການຄົ້ນຄວ້າສ້າງ ແລະ ປັບປຸງນິຕິກໍາ ທີ່ຕິດພັນກັບວຽກງານຂໍ້ມູນຂ່າວສານສິນເຊື່ອ ແລະ ວຽກງານບໍລິຫານອື່ນໆ.
ພ້ອມດຽວກັນນີ້, ຜູ້ເຂົ້າຮ່ວມຍັງໄດ້ຮັບຟັງການສັງລວມລາຍງານບັນຫາຄຸນນະພາບຂໍ້ມູນຂ່າວສານສິນເຊື່ອ ເພື່ອໃຫ້ຜູ້ເຂົ້າຮ່ວມໄດ້ແລກປ່ຽນຮ່ວມກັນໃນຫົວຂໍ້: ການບໍລິການສິນເຊື່ອ.(ຂ່າວ-ພາບ: ວັນເພັງ)