ໃນວັນທີ 14 ພຶດສະພາ 2024 ນີ້, ຫ້ອງການສຶກສາທິການ ແລະ ກິລາ ເມືອງປາກຊ່ອງ ແຂວງຈຳປາສັກ ໄດ້ຈັດກອງປະຊຸມແນະນຳວິທີການເກັບກຳສະພາບຫາງສຽງ-ສັງຄົມ ແລະ ຕ້ານປະກົດການຫຍໍ້ທໍ້ ໃນຖັນແຖວການສຶກສາ ທົ່ວເມືອງ ຂຶ້ນຢູ່ທີ່ຫ້ອງປະຊຸມຂອງຫ້ອງການສຶກສາທິການ ແລະ ກິລາເມືອງ ໂດຍການເປັນປະທານຂອງ ທ່ານ ກິ່ງແກ້ວ ເພັດນ້ຳໂຂງ ຄະນະປະຈຳພັກເມືອງ ຫົວໜ້າຄະນະໂຄສະນາອົບຮົມ ເມືອງປາກຊ່ອງ, ມີທ່ານ ບຸນລຽບ ແກ້ວວົງສາ ກຳມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງ, ທ່ານ ສຸກສະຫວັນ ຈັນທະມາໄລ ຮອງພະແນກຕຳຫຼວດ ປກສ ເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ກິ່ງແກ້ວ ເພັດນໍ້າໂຂງ ໃຫ້ຮູ້ວ່າ: ການຈັດກອງປະຊຸມ ໃນຄັ້ງນີ້ແມ່ນສຸດທີ່ມີຄວາມໝາຍສຳຄັນ ເພື່ອເຮັດໃຫ້ພະນັກງານຄູອາຈານ ກໍ່ຄືຜູ້ບໍລິຫານການສຶກສາ ໄດ້ຮັບຮູ້ເຂົ້າໃຈຢ່າງເລິກເຊິ່ງ ກ່ຽວກັບຫຼັກການ ໃນການເກັບກຳສະພາບຫາງສຽງ-ສັງຄົມ ແລະ ວິທີການຊີ້ແຈງ ຕອບໂຈດບັນຫາຕ່າງໆ ຢ່າງຖືກຕ້ອງ ເພື່ອເປັນເສນາທິການໃຫ້ແກ່ການນຳພາຂອງພັກ ພ້ອມທັງຮັບຮູ້ເຖິງພາລະບົດບາດ, ຂອບເຂດ, ສິິິິດ, ໜ້າທີ່ ແລະ ຫຼັກການໃນການຄົ້ນຄວ້າ ບັນຫາຫາງສຽງສັງຄົມ ເພື່ອໃຈ້ແຍກໃຫ້ໄດ້ເລື່ອງໃດແມ່ນຫາງສຽງ, ເລື່ອງໃດແມ່ນຂ່າວລື ໃນກະແສຂອງສັງຄົມ. ຊຶ່ງບັນດາຄູອາຈານທີ່ເຂົ້າຮ່ວມ ແມ່ນຈະໄດ້ເຊື່ອມຊຶມກຳແໜ້ນຢູ່ໃນ 4 ບົດສຳຄັນຄື: ບາງບັນຫາພື້ນຖານຂອງວຽກງານຫາງສຽງສັງຄົມ, ວິທີການໃນການເກັບກໍາ, ນໍາໃຊ້ຫາງສຽງສັງຄົມ ເຂົ້າໃນການວຽກງານການເມືອງແນວຄິດ, ການຄົ້ນຄວ້າກ່ຽວກັບບາງບົດຮຽນທີ່ໄດ້ຊີ້ແຈງໃຫ້ຮັບຮູ້ ແລະ ການປະສານກັບເພື່ອນຮ່ວມງານໃນການເກັບກຳຫາງສັງຄົມ ແລະ ການຄົ້ນຄວ້າກ່ຽວກັບວຽກງານຍົກໃຫ້ເຫັນບັນຫາຄວາມຮັບຮູ້ ພາລະ, ບົດບາດ, ສິດ, ໜ້າທີ່ ໃນການຄົ້ນຄວ້າສັງລວມ. ຈາກນັ້ນກອງປະຊຸມຍັງໄດ້ຮັບຟັງການຜ່ານແຈ້ງການຂອງກອງບັນຊາການປ້ອງກັນຄວາມສະຫງົບ ແຂວງຈຳປາສັກ ສະບັບເລກທີ 005/ປກສ ຈສ ລົງວັນທີ 31 ມັງກອນ ປີ 2024 ເລື່ອງການສະກັດກັ້ນ ແລະ ແກ້ໄຂປະກົດການຫຍໍ້ທໍ້ທີເກີດຂຶ້ນໃນສັງຄົມ ຂອງວຽກງານຄຸ້ມຄອງການສັນຈອນຕາມຖະໜົນຫຼວງປະຈຳປີ 2024. ໃນໂອກາດນີ້ກອງປະຊຸມກໍ່ໄດ້ມີການແລກປ່ຽນປະກອບຄໍາຄິດຄໍາເຫັນ ກ່ຽວກັບບັນຫາປະກົດການຫຍໍ້ທໍ້ ທີ່ເປັນກະແສໃນສະຖານທີ່ການສຶກສາໃນປະຈຸບັນ ໂດຍສະເພາະບັນຫາການດືມກິນສິ່ງຂອງທີ່ມືນເມົາ, ບັນກາຢາເສບຕິດ, ບັນຫາການຂັບຂີ່ລົດໄວ ແລະ ອື່ນໆ ພ້ອມກັນນັ້ນກໍ່ໄດ້ມີການແລກປ່ຽນກ່ຽວກັບການຕ້ານປະກົດການຫຍໍ້ທໍ້ ແລະ ຫຼຸດຜ່ອນອຸບັດຕິເຫດ ເພື່ອພ້ອມກັນຄົ້ນຄວ້າຊອກຫາວິທິການແກ້ໄຂ ໃນຕໍ່ໜ້າ ຕື່ມອີກ. (ຂ່າວ: ທ.ສອນໄຊ ຈັນທະວີ).
ຄໍາເຫັນ