 |
ສະຫາຍ ວັນຕຸລາ ຣັກນຸດ ໄດ້ຂຶ້ນສະເໜີຮ່າງບົດລາຍງານການເມືອງຂອງສະຫະພັນກໍາມະບານ ຄອສພ ໂດຍໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຂາດຕົກບົກຜ່ອງ, ບົດຮຽນທີ່ຖອດຖອນໄດ້ ແລະ ທິດທາງ ຕໍ່ໜ້າ 2025- 2029 ຊຶ່ງໄດ້ເອົາໃຈໃສ່ວຽກງານປົກປ້ອງສິດ ແລະ ຜົນປະໂຫຍດອັນຊອບທໍາຂອງສະມາຊິກກໍາມະບານ, ເອົາໃຈໃສ່ການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ, ຂະບວນການກິລາ-ອະນາໄມຫ້ອງການ ແລະ ປົກປັກຮັກສາຄວາມສະຫງົບໃນສໍານັກງານ; ສະຫະພັນກຳມະບານ ຄອສພ ໄດ້ເປັນເຈົ້າການປຸກລະດົມ, ຊຸກຍູ້ບັນດາຮາກຖານກຳມະບານນໍາພາໃນການຈັດຕັ້ງປະຕິບັດຂໍ້ແຂ່ງຂັນຕິດພັນກັບຂະບວນການຕ່າງໆເປັນຢ່າງດີ ໂດຍສະເພາະຂະບວນການປະຕິບັດມາດຕະການສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19, ການບໍລິຈາກເລືອດເພື່ອຊ່ວຍເຫຼືອສັງຄົມ ແລະ ຂະບວນການອື່ນໆ.
ຄຽງຄູ່ກັນນັ້ນ, ສະມາຊິກ ສະຫະພັນກໍາມະບານ ຄອສພ ຍັງໄດ້ເອົາໃຈໃສ່ເຄື່ອນໄຫວເຮັດວຽກງານວິຊາສະເພາະຂອງກົມ, ຫ້ອງການ, ວາລະສານ, ໜັງສືພິມ ມີຜົນສໍາເລັດຕາມລະດັບຄາດໝາຍໂດຍສຸມໃສ່ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກ ຄອສພ, ແຜນພັດທະນາວຽກງານໂຄສະນາອົບຮົມຮອດປີ 2025 ຢ່າງເປັນຂະບວນຟົດຟື້ນ; ໄດ້ສ້າງ, ປັບປຸງ ແລະ ພິມຈຳໜ່າຍເອກະສານໃນຂົງເຂດວຽກງານການເມືອງ-ແນວຄິດ, ວຽກງານອົບຮົມ ກໍຄືບັນດາເອກະສານກອງປະຊຸມຄົບຄະນະບໍລິຫານງານສູນກາງພັກແຕ່ລະຄັ້ງ, ບັນດາມະຕິ-ຄໍາສັ່ງແຕ່ລະໄລຍະພ້ອມທັງໄດ້ເປັນເຈົ້າການຜັນຂະຫຍາຍອອກຄໍາແນະນໍາ ແລະ ເອກະສານຕ່າງໆ ຕາມພາລະບົດບາດ, ຕາມການມອບໝາຍຂອງຂັ້ນເທິງ; ປະສານສົມທົບກັບອົງການຈັດຕັ້ງຂັ້ນຕ່າງໆທັງສູນກາງ ແລະ ທ້ອງຖິ່ນຈັດຕັ້ງການໂຄສະນາ, ປາຖະກະຖາ, ຝຶກອົບຮົມ ແລະ ຕິດຕາມເກັບກຳສະພາບແນວຄິດ-ຫາງສຽງສັງຄົມ; ປັບປຸງ ແລະ ພັດທະນາວຽກງານຂໍ້ມູນຂ່າວສານ ເປັນຕົ້ນ ເວັບໄຊ, ລະບົບເອເລັກໂຕຣນິກຢ່າງກວ້າງຂວາງກວ່າເກົ່າ.
 |
ກອງປະຊຸມ ໄດ້ເປັນເອກະພາບກັນຮັບຮອງເອົາບົດລາຍງານການເມືອງ ຊຶ່ງມີການສະຫຼຸບຕີລາຄາການນໍາພາຂອງຄະນະບໍລິຫານງານ, ຕີລາຄາການນໍາພາຂອງຄະນະບໍລິຫານງານສະຫະພັນກຳມະບານ ໃນໄລຍະ 5 ປີຜ່ານມາ ແລະ ຮັບຮອງເອົາທິດທາງລວມ, ໜ້າທີ່ຈຸດສຸມ ແລະ ແຜນພັດທະນາວຽກງານກຳມະບານຂອງສະຫະພັນກຳມະບານ ຄອສພ ໃນ 5 ປີຕໍ່ໜ້າ; ໄດ້ຮັບຮອງເອົາບົດສໍາຫຼວດການນໍາພາ ຂອງຄະນະບໍລິຫານງານສະຫະພັນກຳມະບານ ຄອສພ ສະໄໝ ທີ VI ໂດຍໄດ້ຕີລາຄາສູງ ຕໍ່ຄວາມພະຍາຍາມ, ຄວາມເປັນເຈົ້າການ ໃນການນໍາພາ-ຊີ້ນໍາ ເຮັດໃຫ້ການເຄື່ອນໄຫວ ຂອງອົງການຈັດຕັ້ງສະຫະພັນກຳມະບານມີຜົນສໍາເລັດເປັນຢ່າງດີ.
ຈາກນັ້ນ, ສະມາຊິກກຳມະບານພາຍໃນ ຄອສພ ໄດ້ພ້ອມກັນໃຊ້ສິດປະຊາທິປະໄຕ ປ່ອນບັດຄັດເລືອກເອົາ ຄະນະບໍລິຫານງານສະຫະພັນກຳມະບານ ຄອສພ ຊຸດໃໝ່ ຊຶ່ງມີຜູ້ລົງສະໝັກຮັບເລືອກຕັ້ງ ຈຳນວນ 9 ສະຫາຍ, ເລືອກເອົາ 7 ສະຫາຍ. ຜ່ານການປ່ອນບັດເລືອກໄດ້ຄື: 1. ສະຫາຍ ວັນລາຕີ ຄໍາວານວົງສາ; 2. ສະຫາຍ ພູວັນ ສຸວັນ; 3. ສະຫາຍ ລິດສະໄໝ ເພັງສະຫວັນ; 4. ສະຫາຍ ບຸນມີ ຫຼວງປັນຍາ; 5. ສະຫາຍ ຄໍາເຮືອງ ຄໍາປະສິດ; 6. ສະຫາຍ ທອນ ພົມທິກອນ; 7. ສະຫາຍ ນາງ ຄໍາພັດ ຄູນວິທອງ. ກອງປະຊຸມຄົບຄະນະຄັ້ງປະຖົມມະລືກຂອງຄະນະບໍລິຫານງານສະຫະພັນກຳມະບານ ຄອສພ ຊຸດໃໝ່ ໄດ້ເປັນເອກະພາບເລືອກເອົາສະຫາຍ ວັນລາຕີ ຄໍາວານວົງສາ ເປັນປະທານ,ສະຫາຍ ພູວັນ ສຸວັນ ເປັນຮອງປະທານ; ສະຫາຍ ລິດສະໄໝ ເພັງສະຫວັນ ເປັນຮອງປະທານ ແລະ ເປັນປະທານກວດກາ; ສະຫາຍ ນາງ ຄໍາພັດ ຄູນວິທອງ ເປັນຮອງປະທານກວດກາ.
 |
ກອງປະຊຸມໃຫຍ່ ຍັງໄດ້ຮັບຟັງການໂອ້ລົມຂອງສະຫາຍ ນາງ ອາລິຍາວັນ ອັກຄະວົງ ຊຶ່ງສະຫາຍໄດ້ໃຫ້ທິດຊີ້ນຳທີ່ສໍາຄັນຖືເປັນແນວທາງໃຫ້ແກ່ການນໍາພາ ແລະ ການຈັດຕັ້ງປະຕິບັດວຽກງານຂອງສະຫະພັນກຳມະບານ ຄອສພ ໃຫ້ປະກົດຜົນເປັນຈິງ. ກອງປະຊຸມໃຫຍ່ໄດ້ຮຽກຮ້ອງໃຫ້ສະມາຊິກກຳມະບານທຸກສະຫາຍ ຈົ່ງເພີ່ມທະວີຄວາມສາມັກຄີເປັນເອກະພາບ, ຕັ້ງໜ້າຝຶກຝົນຫຼໍ່ຫຼອມຕົນເອງ, ເອົາໃຈໃສ່ປັບປຸງຍົກລະດັບຄວາມຮູ້, ຄວາມສາມາດ ແລະ ຄວາມເປັນເຈົ້າການໃນການປະຕິບັດໜ້າທີ່ວຽກງານ ທີ່ກອງປະຊຸມໃຫຍ່ຄັ້ງນີ້ ໄດ້ຮັບຮອງເອົາໃຫ້ບັນລຸຜົນສໍາເລັດ ຕາມຈຸດປະສົງ ແລະ ຄາດໝາຍທີ່ວາງໄວ້.
(ຂ່າວ-ພາບ: ແສງຈັນ)
ຄໍາເຫັນ