ໂດຍການໃຫ້ກຽດເຂົ້າຮ່ວມຂອງສະຫາຍຄໍາຜາ ພິມມະສອນ ຮອງເລຂາຄະນະພັກ ຮອງຫົວໜ້າຫ້ອງວ່າການສູນກາງພັກ ຜູ້ຊີ້ນໍາອົງການຈັດຕັ້ງມະຫາຊົນ, ສະຫາຍ ທອງລີ ສີສຸລິດ ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ແຂກຖືກເຊີນ ພ້ອມດ້ວຍ ຜູ້ແທນສົມບູນ.
ໃນວາລະ, ຜູ້ແທນກອງປະຊຸມໃຫຍ່ ໄດ້ຍົກສູງຄວາມຮັບຜິດຊອບການເມືອງຂອງຕົນ ເຮັດໃຫ້ກອງປະຊຸມດຳເນີນໄປດ້ວຍບັນຍາກາດຟົດຟື້ນ, ສ້າງສັນ, ມີຄວາມເປັນເອກະພາບສູງ ແລະ ມີຜົນສໍາເລັດຕາມຄາດໝາຍທີ່ວາງໄວ້ ຊຶ່ງສະແດງອອກ ຄື:ກອງປະຊຸມ ໄດ້ຮັບຮອງເອົາລາຍງານການເມືອງ, ໄດ້ຕີລາຄາສູງ ຕໍ່ຜົນສໍາເລັດທີ່ພົ້ນເດັ່ນໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VIຂອງຄະນະບໍລິຫານງານຊາວໜຸ່ມຫ້ອງວ່າການສູນກາງພັກໃນໄລຍະຜ່ານມາອັນເປັນຜົນງານການປະກອບສ່ວນສໍາຄັນ ເຂົ້າໃນການປະຕິບັດໜ້າທີ່ການເມືອງ ກໍຄືໜ້າທີ່ເສນາທິການ ຂອງຫ້ອງວ່າການສູນກາງພັກເວົ້າລວມ, ເວົ້າສະເພາະວຽກງານຊາວໜຸ່ມ ທີ່ເປັນກໍາລັງແຮງສຳຄັນ ຊ່ວຍຄະນະພັກ-ຄະນະນໍາຫ້ອງວ່າການສູນກາງພັກ.ພ້ອມກັນນັ້ນ,ຍັງຊີ້ໃຫ້ເຫັນດ້ານອ່ອນ-ຂໍ້ຄົງຄ້າງ, ສາເຫດ ແລະ ບາງບົດຮຽນທີ່ຖອດຖອນໄດ້ອັນເປັນພື້ນຖານໃຫ້ແກ່ການກໍໍານົດທິດທາງ, ວາງຄາດໝາຍ ແລະ ວຽກງານຈຸດສຸມໃນແຕ່ລະດ້ານ ໂດຍໄດ້ກໍານົດເປັນແຜນງານ ແລະ ໂຄງການພັດທະນາວຽກງານຊາວໜຸ່ມຫ້ອງວ່າການສູນກາງພັກ ໃນ 5 ປີຕໍ່ໜ້າ;ກອງປະຊຸມໃຫຍ່ ໄດ້ຮັບຟັງບົດສໍາຫຼວດການນໍາພາລວມ ຂອງຄະນະບໍລິຫານງານຊາວໜຸ່ມຫ້ອງວ່າການສູນກາງພັກ ສະໄໝທີ VI, ຊຶ່ງໄດ້ຊີ້ໃຫ້ເຫັນວ່າ ໃນໄລຍະຜ່ານມາເຖິງວ່າມີຄວາມຫຍຸ້ງຍາກ ແລະ ມີຫຼາຍບັນຫາບໍ່ເອື້ອອໍານວຍ, ແຕ່ກໍໄດ້ຍົກສູງຄວາມຮັບຜິດຊອບ, ມີຄວາມພະຍາຍາມ ແລະເປັນເຈົ້າການນໍາພາຊີ້ນໍາການຈັດຕັ້ງປະຕິບັດມະຕິກອງປະຊຸມ ຄັ້ງທີ VI ຂອງຄະນະບໍລິຫານງານຊາວໜຸ່ມຫ້ອງວ່າການສູນກາງພັກ ໄດ້ຮັບຜົນສໍາເລັດ ເປັນຢ່າງດີ.ກອງປະຊຸມ ຍັງໄດ້ດຳເນີນການປ່ອນບັດເລືອກຕັ້ງເອົາຄະນະບໍລິຫານງານຊາວໜຸ່ມຫ້ອງວ່າການສູນກາງພັກ ຊຸດໃໝ່ເພື່ອເປັນແກນນຳ ໃນການນໍາພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຊາວໜຸ່ມ ຫ້ອງວ່າການສູນກາງພັກ ຄັ້ງທີ VII, ມີຜູ້ສະໝັກເລືອກຕັ້ງ ເຂົ້າໃນຄະນະບໍລິຫານງານຊາວໜຸ່ມ ຫ້ອງວ່າການສູນກາງພັກ ສະໄໝທີVIIທັງໝົດ 15 ສະຫາຍ, ໄດ້ປ່ອນບັດຄັດເລືອກເອົາ13ສະຫາຍ.ຈາກນັ້ນ, ກອງປະຊຸມຄັ້ງປະຖົມມະລືກ ຂອງຄະນະບໍລິຫານງານຊາວໜຸ່ມ ຫ້ອງວ່າການສູນກາງພັກ ຄັ້ງທີVIIໄດ້ເປັນເອກະສັນ ເລືອກເອົາສະຫາຍຕົວຢ່າງ ເນັ່ງໄຊເກີເປັນເລຂາ, ສະຫາຍນາງ ອາລູໂນ ກວ້າງມະນີວັນເປັນຮອງເລຂາ ທັງເປັນປະທານກວດກາ, ສະຫາຍສຸກກັນຍາ ພອນຄໍາມາເປັນຮອງເລຂາ.
ກອງປະຊຸມໃຫຍ່ຄັ້ງນີ້ ຍັງໄດ້ຮັບຟັງການໂອ້ລົມແລະໃຫ້ທິດຊີ້ນໍາຈາກສະຫາຍ ທອງລີ ສີສຸລິດຊຶ່ງສະຫາຍໄດ້ຕີລາຄາແລະຍ້ອງຍໍຊົມເຊີຍຕໍ່ຜົນງານອັນພົ້ນເດັ່ນຂອງຄະນະບໍລິຫານງານຊາວໜຸ່ມຫ້ອງວ່າການສູນກາງພັກ ສະໄໝີທີ VI ທີ່ຍາດມາໄດ້ ໃນໄລຍະຜ່ານມາພ້ອມທັງໃຫ້ທິດຊີ້ນໍາ ໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີVIIຂອງຊາວໜຸ່ມຫ້ອງວ່າການສູນກາງພັກ ໃນ 5 ປີ ຕໍ່ໜ້າ ໃຫ້ບັນລຸຜົນສໍາເລັດອັນໃໝ່ ແລະ ຍິ່ງໃຫຍ່ກວ່າເກົ່າ.ກອງປະຊຸມໃຫຍ່ໄດ້ສຳເລັດຕາມລະດັບຄາດໝາຍ, ຜົນສຳເລັດດັ່ງກ່າວ ໄດ້ຢັ້ງຢືນເຖິງຄວາມເອົາໃຈໃສ່ນໍາພາ-ຊີ້ນຳ, ອຳນວຍຄວາມສະດວກຂອງຄະນະພັກ-ຄະນະນໍາຂອງຫ້ອງວ່າການສູນກາງພັກ ແລະ ສູນກາງຊາວໜຸ່ມປະຊາຊົນປະຕິວັດລາວບວກກັບຄວາມເປັນເຈົ້າການ, ຄວາມສາມັກຄີເປັນປຶກແຜ່ນຂອງຄະນະບໍລິຫານງານຊາວໜຸ່ມຫ້ອງວ່າການສູນກາງພັກ ຕະຫຼອດຮອດສະມາຊິກຊາວໜຸ່ມທຸກສະຫາຍ ທີ່ໄດ້ປະກອບສ່ວນທາງດ້ານເຫື່ອແຮງ, ສະຕິປັນຍາ ເຂົ້າໃນການກະກຽມ ແລະ ດຳເນີນກອງປະຊຸມໃຫຍ່ຄັ້ງນີ້ມີປະສົບຜົນສຳເລັດຢ່າງຈົບງາມ; ກອງປະຊຸມ ຍັງໄດ້ສະແດງຄວາມຮູ້ບຸນຄຸນຕໍ່ການນຳພັກ-ລັດ,ຄະນະພັກ-ຄະນະຫ້ອງວ່າການສູນກາງພັກ ແລະ ສູນກາງຊາວໜຸ່ມປະຊາຊົນປະຕິວັດລາວ ຊຶ່ງຍາມໃດກໍໄດ້ມີຄວາມເອົາໃຈໃສ່ ໃກ້ຊິດຕິດແທດ ແລະ ໃຫ້ທິດຊີ້ນຳ ຕໍ່ຄະນະບໍລິຫານງານຊາວໜຸ່ມຫ້ອງວ່າການສູນກາງພັກ; ສະແດງຄວາມຂອບໃຈ ຕໍ່ບັນດາກົມອ້ອມຂ້າງ ກໍຄືພາກສ່ວນຕ່າງໆທີ່ໄດ້ໃຫ້ຄວາມຮ່ວມມື, ສະໜັບສະໜູນ ແລະ ຊ່ວຍເຫຼືອ ຄະນະບໍລິຫານງານຊາວໜຸ່ມ ຫ້ອງວ່າການສູນກາງພັກ ມາໂດຍຕະຫຼອດ.
ພ້ອມນີ້, ກອງປະຊຸມໃຫຍ່ ຍັງໄດ້ຮຽກຮ້ອງມາຍັງ ຄະນະບໍລິຫານງານຊາວໜຸ່ມ ແລະ ສະມາຊິກຊາວໜຸ່ມທົ່ວຫ້ອງວ່າການສູນກາງພັກ ຈົ່ງຍົກສູງ ແລະ ເຊີດຊູບົດບາດຄວາມຮັບຜິດຊອບການເມືອງຂອງຕົນ, ຕັ້ງໜ້າເຄື່ອນໄຫວ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VII ຂອງຄະນະບໍລິຫານງານຊາວໜຸ່ມຫ້ອງວ່າການສູນກາງພັກ ໃຫ້ໄດ້ຮັບຜົນສໍາເລັດ ຢ່າງຈົບງາມ.
(ຂ່າວ-ພາບ: ແສງຈັນ)
ຄໍາເຫັນ