 |
ສະຫາຍ ຄຳພັນ ສິດທິດຳພາ ໄດ້ກ່າວເປີດວ່າ: ກອງປະຊຸມໃຫຍ່ຜູ້ແທນອົງຄະນະພັກແຂວງວຽງຈັນ ຄັ້ງທີ VII ໄດ້ເປີດຂຶ້ນໃນທ່າມກາງບັນຍາກາດທີ່ທົ່ວພັກ-ທົ່ວກອງທັບ ແລະ ປວງຊົນລາວທັງຊາດກໍຄືຊາວແຂວງວຽງຈັນ ຂຸ້ນຂ້ຽວຈັດຕັ້ງປະຕິບັດ ມະຕິ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຂອງລັດ ຊຶ່ງເປັນປີມ້ວນທ້າຍໃນການຈັດຕັ້ງປະຕິບັດໃຫ້ສຳເລັດ ພ້ອມດຽວກັນນີ້ກໍຫ້າວຫັນສ້າງຜົນງານ, ຂະບວນການຕ່າງໆ ຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ XII ຂອງພັກ, ວັນຊາດທີ 2 ທັນວາ ຄົບຮອບ 50 ປີ, ວັນເກີດ ປະທານ ໄກສອນ ພົມວິຫານ ຄົບຮອບ 105 ປີ ທີ່ຈະມາເຖິງໃນວັນຂ້າງໜ້ານີ້ໃຫ້ເຕັມໄປດ້ວຍເນື້ອໃນ ແລະ ຄວາມໝາຍເລິກເຊິ່ງ. ຄະນະບໍລິຫານງານພັກແຂວງ ສະ
ໄໝທີ VI ໄດ້ຖືການພັດທະນາເສດຖະກິດເປັນໃຈກາງ, ສຸມໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VI (2021-2025) ໂດຍຫັນເປັນແຜນງານ, ໂຄງການ ແລະ ແຜນຈັດຕັ້ງປະຕິບັດປະຈຳປີ, ຍູ້ແຮງການຜະລິດເປັນສິນຄ້າຕາມທິດຫັນເປັນອຸດສາຫະກຳ-ທັນສະໄໝ ແລະ ການ ບໍລິການທ່ອງທ່ຽວ ເຮັດໃຫ້ເສດຖະກິດພາຍໃນແຂວງ ຢູ່ໃນທ່າຂະຫຍາຍຕົວໃນຈັ່ງຫວະທີ່ດີ, ລວມຍອດຜະລິດຕະພັນພາຍໃນ (GDP) ຂອງ 5 ປີ ຂະຫຍາຍຕົວສະເລ່ຍ 4.9% ສະເລ່ຍຕໍ່ຫົວຄົນໄດ້ 23 ລ້ານກວ່າກີບ ຫຼື 1,000 ກວ່າໂດລາ, ສະເພາະປີ 2025 ຄາດວ່າຈະຂະຫຍາຍຕົວ 6%, ທຽບໃສ່ຜົນສໍາເລັດໃນໄລຍະຜ່ານມາເຫັນວ່າການພັດທະນາໂດຍລວມ ກໍຄືຊີວິດການເປັນຢູ່ຂອງປະຊາຊົນນັບມື້ໄດ້ຮັບການປັບປຸງຍົກສູງຂຶ້ນກວ່າເກົ່າ. ບັນຫາສໍາຄັນແມ່ນໄດ້ສຸມໃສ່ປັບປຸງກໍ່ສ້າງພື້ນຖານໂຄງລ່າງ ເຊັ່ນ: ຄົມມະນາຄົມ, ໄຟຟ້າ, ໂທລະຄົມມະນາຄົມ, ແຫຼ່ງທ່ອງທ່ຽວ ເພື່ອສ້າງພື້ນຖານອໍານວຍຄວາມສະດວກໃຫ້ແກ່ການພັດທະນາ, ຂົນຂວາຍດຶງດູດນັກທຸລະກິດ, ຜູ້ປະກອບການ, ຊາວຄ້າຂາຍ ລົງທຶນສ້າງຫົວໜ່ວຍລາຍຮັບໃໝ່ ອັນໄດ້ເຮັດໃຫ້ການເກັບລາຍຮັບເພີ່ມຂຶ້ນແຕ່ລະປີ, ການຄຸ້ມຄອງລາຍຈ່າຍໄດ້ປະຕິບັດເຂັ້ມງວດຕາມລະບຽບກົດໝາຍ. ການຜະລິດກະສິກຳເປັນສິນຄ້າ ໄດ້ຮັບການຊຸກຍູ້ສົ່ງເສີມ ການຜະລິດແບບເປັນກຸ່ມ-ເປັນຟາມຢ່າງກວ້າງຂວາງ, ເກີດມີຕົວແບບການຜະລິດເພີ່ມຂຶ້ນໂດຍໄດ້ກໍ່ສ້າງ ແລະ ປັບປຸງລະບົບຊົນລະປະທານ, ນໍາໃຊ້ເຕັກນິກວິຊາການເຂົ້າໃນການຜະລິດ, ຍູ້ແຮງການຜະລິດເປັນສິນຄ້າ ປູກພືດ ແລະ ລ້ຽງສັດປະເພດຕ່າງໆ ໄດ້ຂະຫຍາຍເປັນຂະບວນກວ້າງຂວາງຢູ່ບັນດາເມືອງ ສາມາດຄໍ້າປະກັນດ້ານສະບຽງອາຫານ ເພື່ອຕອບສະໜອງການບໍລິໂພກພາຍໃນແຂວງ ແລະ ສົ່ງອອກເປັນສິນຄ້າ. ການຜະລິດເປັນສິນຄ້າໄດ້ປະກົດຕົວພົ້ນເດັ່ນຂຶ້ນໃນຮູບແບບເປັນກຸ່ມ-ເປັນຟາມ, ອຸດສາຫະກຳ-ຫັດຖະກຳ ປຸງແຕ່ງຜົນຜະລິດກະສິກຳ ແລະ ການບໍລິການທ່ອງທ່ຽວ ມີການຂະຫຍາຍຕົວ ແລະ ເກີດມີໜໍ່ແໜງສິນຄ້າ (ODOP) ໃໝ່ເພີ່ມຂຶ້ນ.
 |
ເພື່ອສືບຕໍ່ປະຕິບັດຂະບວນການກໍຄືປະຕິບັດຕາມແນວທາງຍຸດທະສາດຂອງພັກກຳນົດໄວ້ໃຫ້ປະກົດຜົນເປັນຈິງເທື່ອລະກ້າວນັ້ນ, ກອງປະຊຸມຄັ້ງນີ້ຈະໄດ້ພ້ອມກັນທົບທວນຫວນຄືນເຖິງຜົນງານ ແລະ ໄຊຊະນະໃນການຈັດຕັ້ງປະຕິບັດແນວທາງນະໂຍບາຍຂອງພັກ, ມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງ ໃນໄລຍະ 5 ປີຜ່ານມາ, ສະຫຼຸບສັງລວມ, ຖອດຖອດບົດຮຽນທີ່ສຳຄັນ ແລະ ຈະໄດ້ພ້ອມກັນຄົ້ນຄ້ວາ ຕົກລົງຮັບຮອງເອົາທິດທາງ, ໜ້າທີ່ສະເພາະໜ້າ (2026-2030) ແນໃສ່ປົກປັກຮັກສາ ແລະ ພັດທະນາແຂວງວຽງຈັນ ໃຫ້ມີບາດກ້າວຫັນປ່ຽນໃໝ່ໃຫ້ນັບມື້ນັບໜັກແໜ້ນ, ຮັ່ງມີເຂັ້ມແຂງ, ປະກອບສ່ວນຢ່າງຕັ້ງໜ້າ ແລະ ສົມກຽດ ເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ.
ກອງປະຊຸມໃຫຍ່ຄັ້ງນີ້ຈະໄດ້ເລືອກຕັ້ງເອົາຄະນະບໍລິຫານງານພັກແຂວງຊຸດໃໝ່ ເພື່ອສືບຕໍ່ຊີ້ນຳ-ນຳພາແຂວງວຽງຈັນຕໍ່ໄປ. ພ້ອມກັນນັ້ນ ກອງປະຊຸມຍັງຈະໄດ້ປ່ອນບັດເລືອກຕັ້ງເອົາຜູ້ແທນສົມບູນ ແລະ ສຳຮອງ ຂອງແຂວງ ເພື່ອເຂົ້າຮ່ວມກອງປະຊຸມໃຫຍ່ ຄັ້ງທີ XII ຂອງພັກທີ່ຈະເປີດຂຶ້ນໃນຂ້າງໜ້ານີ້. ພິເສດກອງປະຊຸມໃຫຍ່ຍັງຈະໄດ້ຮັບຟັງການໂອ້ລົມໃຫ້ທິດຊີ້ນຳຈາກສະຫາຍ ບຸນທອງ ຈິດມະນີ ຕື່ມອີກ.
(ຂ່າວ-ພາບ: ບຸນຕອມ).
ຄໍາເຫັນ