ໃຫ້ກຽດເຂົ້າຮ່ວມກອງປະຊຸມມີ ສະຫາຍ ຄຳພັນ ສິດທິດຳພາ ກຳມະການສູນກາງພັກ ເລຂາພັກແຂວງ ເຈົ້າແຂວງວຽງຈັນ, ມີບັນດານການນຳຂັ້ນແຂວງ, ເມືອງ, ແຂກຖືກເຊີນ, ພ້ອມດ້ວຍຜູ້ແທນສົມບູນ ຊຶ່ງເປັນຕົວແທນໃຫ້ແກ່ສະມາຊິກພັກທົ່ວເມືອງ.
ສະຫາຍ ອໍາໄພ ໂສລັດຕະນະວົງ ກ່າວວ່າ: ໄລຍະຜ່ານມາ ພວກເຮົາໄດ້ດຳເນີນການສຳຫຼວດກວດກາ-ຕີລາຄາການເຄື່ອນໄຫວນຳພາຂອງອົງຄະນະພັກຢ່າງຮອບດ້ານ, ປັບປຸງປົວແປງພາຍໃນພັກຢ່າງເລິກເຊິ່ງ; ຄະນະພັກຮາກຖານ ແລະ ສຳນັກງານອົງການໄດ້ດຳເນີນກອງປະຊຸມໃຫຍ່, ປ່ອນບັດຄັດເລືອກເອົາຜູ້ແທນເຂົ້າຮ່ວມກອງປະຊຸມໃຫຍ່ຢ່າງຖຶກຕ້ອງຕາມກົດລະບຽບຂອງພັກ. ພ້ອມກັນນັ້ນ, ຍັງໄດ້ເສີມຂະຫຍາຍປະຊາທິປະໄຕພາຍໃນພັກ ແລະ ໃນສັງຄົມ ດ້ວຍການສ້າງໂອກາດ-ສ້າງເງື່ອນໄຂໃຫ້ສະມາຊິກພັກພະນັກງານ ແລະ ປະຊາຊົນບັນດາຊັ້ນຄົນໄດ້ຄົ້ນຄວ້າ ປະກອບຄໍາເຫັນຕໍ່ເນື້ອໃນເອກະສານທີ່ຈະນຳສະເໜີລາຍງານ ແລະ ຮັບຮອງເອົາໃນກອງປະຊຸມໃຫ່ຍຄັ້ງນີ້.
ກອງປະຊຸມໃຫຍ່ຄັ້ງນີ້, ແມ່ນວາລະສຳຄັນທີ່ຄະນະນຳສູງສຸດຂອງເມືອງ ຕົກລົງຮັບຮອງເອົາໜ້າທີ່, ທິດທາງວຽກງານໃຫຍ່ ເພື່ອນຳພາເມືອງກາສີ ກ້າວຂຶ້ນສູ່ຈຸດໝາຍມັ່ງຄັ່ງເຂັ້ມແຂງໃນອະນາຄົດ, ນຳເອົາຄວາມຮັ່ງມີຜາສຸກມາສູ່ປະຊາຊົນ, ສຳລັບກອງປະຊຸມໃຫຍ່ ຄັ້ງທີ VIII ນີ້, ແມ່ນມີໜ້າທີ່ຄົ້ນຄວ້າ ແລະ ຮັບຮອງເອົາລາຍງານການເມືອງຂອງອົງຄະນະພັກເມືອງ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IV (2025-2029). ພ້ອມກັນນັ້ນກໍຈະໄດ້ເລືອກຕັ້ງເອົາບຸກຄະລາກອນຄະນະນຳສູງສຸດຂັ້ນເມືອງ ເພື່ອສືບຕໍ່ນຳພາຈັດຕັ້ງປະຕິບັດສອງໜ້າທີ່ຍຸດທະສາດ ໃຫ້ກ້າວຂຶ້ນຢ່າງຕໍ່ເນື່ອງໜັກແໜ້ນໄປສູ່ຈຸດໝາຍທີ່ວາງໄວ້. ທັງໝົດນັ້ນແມ່ນໜ້າທີ່ສຳຄັນທີ່ກອງປະຊຸມໃຫຍ່ໃນຄັ້ງນີ້ ຕ້ອງປະຕິບັດດ້ວຍຄວາມຮັບຜິດຊອບສູງ ແລະ ມີຜົນສຳເລັດອັນຈົບງາມ ເພື່ອການເຕີບໃຫຍ່ຂະຫຍາຍຕົວ, ເຂັ້ມແຂງຂອງອົງຄະນະພັກເມືອງກາສີ ພວກເຮົາ.
(ພາບ-ຂ່າວ: ແກ້ວອຸດົມ)
ຄໍາເຫັນ