ໃຫ້ກຽດເຂົ້າຮ່ວມມີສະຫາຍ ເຫລັກໄຫລ ສີວິໄລ ກໍາມະການສູນກາງພັກ ເລຂາພັກແຂວງ ເຈົ້າແຂວງເຊກອງ, ບັນດາສະຫາຍການນໍາຂັ້ນສູນກາງ, ແຂວງ-ເມືອງ, ແຂກຖືກເຊີນ ແລະ ຜູ້ແທນສົມບູນ ຊຶ່ງເປັນຕົວແທນໃຫ້ແກ່ສະມາຊິກພັກທົ່ວເມືອງເຂົ້າຮ່ວມ.
ສະຫາຍ ແສງລາຕີ ຫຼອມຍະເດດ ໄດ້ກ່າວໄຂກອງປະຊຸມວ່າ: ກອງປະຊຸມໃຫຍ່ຜູ້ແທນອົງຄະນະພັກເມືອງທ່າແຕງ ຄັ້ງທີ VII ແມ່ນເຫດການ ການເມືອງທີ່ສໍາຄັນ, ເປັນຂີດໝາຍໃໝ່, ເປັນກົດເກນ ແລະ ບາດລ້ຽວປະຫວັດສາດ ໃນການກໍານົດທິດທາງການພັດທະນາເມືອງທ່າແຕງ ເພື່ອກ້າວສູ່ຈຸດໝາຍທີ່ວາງໄວ້ ດ້ວຍເງື່ອນໄຂ ແລະ ທ່ວງທ່າໃໝ່, ຊຶ່ງກອງປະຊຸມຈະໄດ້ພ້ອມກັນຕີລາຄາຄືນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VI ເພື່ອຊອກໃຫ້ເຫັນຜົນສໍາເລັດດ້ານດີ, ດ້ານອ່ອນ-ຂໍ້ຄົງຄ້າງ ແລະ ສາເຫດ ເພື່ອນໍາໄປແກ້ໄຂໃຫ້ຖືກຕ້ອງ, ວ່ອງໄວ ແລະ ທັນການ ພ້ອມທັງ ຖອດຖອນເອົາເປັນບົດຮຽນທີ່ດີ ເພື່ອນໍາພາ-ຊີ້ນໍາວຽກງານໃນຂັ້ນຕໍ່ໄປ, ບົນພື້ນຖານການວິເຄາະ-ວິໄຈຢ່າງລະອຽດ. ພ້ອມນີ້, ກອງປະຊຸມຈະໄດ້ຮັບຮອງເອົາທິດທາງລວມ, ຄາດໝາຍສູ້ຊົນ ແລະ ໜ້າທີ່ວຽກງານແຕ່ລະດ້ານ ເພື່ອນໍາເອົາເມືອງທ່າແຕງ ໄປສູ່ເປົ້າໝາຍເປັນເມືອງພັດທະນາກະສິກໍາ, ການຄ້າ ແລະ ການບໍລິການ, ເສດຖະກິດຂະຫຍາຍຕົວນັບມື້ເພີ່ມຂຶ້ນ ຕາມທິດສີຂຽວ ແລະ ຍືນຍົງ. ຈາກນັ້ນ, ຜູ້ແທນກອງປະຊຸມຈະໄດ້ໃຊ້ສິດປະຊາທິປະໄຕຂອງຕົນ ດໍາເນີນການເລືອກເອົາຄະນະບໍລິຫານງານພັກເມືອງ ສະໄໝທີ VII ຊຶ່ງເປັນການນໍາສູງສຸດຂອງພັກຂັ້ນເມືອງ, ເປັນໃຈກາງເຕົ້າໂຮມຄວາມສາມັກຄີ, ສືບຕໍ່ນໍາພາ-ຊີ້ນໍາປະຊາຊົນເມືອງທ່າແຕງ ຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ ເຂົ້າສູ່ຂະບວນການຕົວຈິງ ແລະ ໃຫ້ມີຜົນສໍາເລັດຕາມຄາດໝາຍທີ່ວາງໄວ້. ພ້ອມທັງ, ສືບຕໍ່ເສີມຂະຫຍາຍຄໍາຂັວນທີ່ວ່າ “ເພີ່ມທະວີການນຳພາຂອງອົງຄະນະພັກເມືອງ ແນໃສ່ສ້າງເປັນເມືອງ ທີ່ມີລະບົບການເມືອງເຂັ້ມແຂງ ເປັນແຫຼ່ງຜະລິດກະສິກໍາສະອາດ ທໍາມະຊາດສີຂຽວ ການທ່ອງທ່ຽວວັດທະນາທໍາ-ປະຫວັດສາດ ຕິດພັນກັບການສ້າງເສດຖະກິດເອກະລາດ, ເປັນເຈົ້າຕົນເອງ”.
(ຂ່າວ-ພາບ: ສັນຍາ)
ຄໍາເຫັນ