ກອງປະຊຸມໃຫຍ່ຜູ້ແທນຊາວໜຸ່ມທົ່ວເມືອງແບງ ຄັ້ງທີ IX ໄດ້ໄຂຂຶ້ນໃນວັນທີ 12 ເມສາຜ່ານມານີ້ ຢູ່ທີ່ສະໂມສອນໃຫ່ຍຂອງເມືອງແບງ ແຂວງອຸດົມໄຊ ໂດຍໃຫ້ກຽດເຂົ້າຮ່ວມມີສະຫາຍ ຄໍາພອນ ພີມມະລາດ ຮອງເລຂາພັກເມືອງ ປະທານກວດກາພັກ-ລັດ ເມືອງ, ສະຫາຍ ຄໍາຈັນ ວ່າບົວແສງ ເລຂາຄະນະບໍລິຫານງານຊາວໜຸ່ມແຂວງອຸດົມໄຊ, ມີແຂກທີ່ຖຶກເຊີນ, ຜູ້ແທນສົມບູນເຂົ້າຮ່ວມ.
ສະຫາຍ ວຽງອຸດົມ ແກ້ວກັນຍາ ຮັກສາການເລຂາຄະນະບໍລິຫານງານຊາວໜຸ່ມ ເມືອງແບງ ໄດ້ຕີລາຄາຄືນຢ່າງຮອບດ້ານເລິກເຊິ່ງ ກ່ຽວກັບຜົນສຳເລັດຂອງການຈັດຕັ້ງປະຕິບັດທິດທາງ, ຄາດໝາຍ ແລະ ການຈັດຕັ້ງປະຕິບັດວຽກງານທີ່ໄດ້ວາງອອກໃນກອງປະຊຸມໃຫຍ່ຜູ້ແທນ ຊາວໜຸ່ມທົ່ວເມືອງແບງ ຄັ້ງທີ VIII, ຍົກໃຫ້ເຫັນຜົນສຳເລັດ, ສິ່ງທີ່ຄົງຄ້າງພ້ອມທັງສາເຫດ ແລະ ບົດຮຽນທີ່ຖອດຖອນໄດ້. ຈາກນັ້ນ, ບັນດາຜູ້ແທນກອງປະຊຸມໄດ້ປະກອບຄໍາຄິດຄໍາເຫັນໃສ່ຮ່າງລາຍງານການເມືອງທັງສອງພາກ.
ກອງປະຊຸມຍັງໄດ້ໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະບໍລິຫານງານຊຸດໃໝ່ ໂດຍມີຜູ້ສະໝັກທັງໝົດ 27 ສະຫາຍ, ເລືອກເອົາ 23 ສະຫາຍ ຜົນຂອງຫານປ່ອນບັດ ເເລະ ເຫັນດີຈາກກອງປະຊຸມຄັ້ງປະຖົມມະລຶກໄດ້ເລືອກເອົາສະຫາຍ ວຽງອຸດົມ ແກ້ວກັນຍາ ເປັນເລຂາຄະນະບໍລະຫານງານ ຊາວໜຸ່ມເມືອງແບງ, ສະຫາຍ ເພັດສະໝອນ ລີໃຈປໍ ເປັນຮອງ ແລະ ສະຫາຍ ເທິງ ຈັນຍາວົງ ເປັນຄະນະ, ໃນນີ້, ແຕ່ງຕັ້ງປະທານກວດກາ ແລະ ຮອງປະທານກວດກາໂດຍໄດ້ເເຕ່ງຕັ້ງ ສະຫາຍ ເພັດສະໝອນ ລີໃຈປໍ ເປັນປະທານ, ສະຫາຍ ຊ່ອງ ລໍປັນຈະ ເປັນຮອງ, ສະຫາຍ ບີ່ ປາດົວວື ເປັນຄະນະ, ກອງປະຊຸມຍັງໄດ້ຮັບຮອງເອົາຜູ້ແທນສົມບູນ ແລະ ສໍາຮອງໄປເຂົ້າຮ່ວມກອງປະຊຸມໃຫ່ຍຜູ້ແທນຊາວໜຸ່ມທົ່ວແຂວງ ອຸດົມໄຊ ຄັ້ງທີ່ IX ຈໍານວນ 7 ສະຫາຍ, ສໍາຮອງ 3 ສະຫາຍ, ເລືອກເອົາຄະນະປະຈໍາຊາວໜຸ່ມ 5 ສະຫາຍ.
(ຂ່າວ: ກິ່ງມະນີ)
ຄໍາເຫັນ