 |
ໃນກອງປະຊຸມ ສະຫາຍ ຄໍາອົ້ນ ຈັນສຸລິຍະມາດ ກໍາມະການຄະນະບໍລິຫານງານ ສກບ.ທຫລ ໄດ້ຜ່ານບົດລາຍງານການເມືອງໄລຍະ 5 ປີຜ່ານມາ (2021-2025) ແລະ ທິດທາງແຜນການເຄື່ອນໄຫວວຽກງານຂອງສະຫະພັນກໍາມະບານ ທຫລ ໃນຕໍ່ໜ້າ (2026-2030), ສະຫະພັນກຳມະບານທະນາຄານແຫ່ງ ສປປ ລາວ ແມ່ນອົງການຈັດຕັ້ງໜຶ່ງທີ່ຂຶ້ນກັບສູນກາງສະຫະພັນກຳມະບານລາວ, ຖືກສ້າງຕັ້ງຂຶ້ນຕາມຂໍ້ຕົກລົງຂອງສູນກາງສະຫະພັນກຳມະບານລາວ ສະບັບເລກທີ 875/ສກລ, ລົງວັນທີ 11 ກັນຍາ 2020 ມີສິດ ແລະ ໜ້າທີ່ ໃນການຄົ້ນຄວ້າເຊື່ອມຊຶມມະຕິຂອງຄະນະພັກ, ແຜນພັດທະນາເສດຖະກິດ - ສັງຄົມ, ມະຕິກອງປະຊຸມຂອງສູນກາງສະຫະພັນກຳມະບານລາວ; ມາຮອດປັດຈຸບັນສະຫະພັນກຳມະບານທະນາຄານແຫ່ງ ສປປ ລາວ ປະກອບມີຮາກຖານທັງໝົດ ຈຳນວນ 8 ຮາກຖານ, ຖ້າທຽບໃສ່ປີ 2020 ບໍ່ປ່ຽນແປງ (ແຕ່ຢູ່ໃນໄລຍະຄົ້ນຄວ້ານຳສະເໜີອອກຂໍ້ຕົກລົງສ້າງຕັ້ງກຳມະບານຮາກຖານຢູ່ທະນາຄານທຸລະກິດຕ່າງປະເທດ 1 ແຫ່ງ). ສະຫະພັນກຳມະບານ ທຫລ ມີສະມາຊິກກຳມະບານທັງໝົດ 3,313 ສະຫາຍ ຍິງ 1,623 ສະຫາຍ. ບາງຮາກຖານ ສາມາດຂະຫຍາຍສະມາຊິກກຳມະບານໄດ້ລວມຈຳນວນ 680 ສະຫາຍ, ສ່ວນຫຼາຍແມ່ນນັກສຶກສາກວມເອົາຫຼາຍກວ່າ 80%; ສະຫະພັນກຳມະບານທະນາຄານແຫ່ງ ສປປ ລາວ ໄດ້ຊຸກຍູ້, ປະສານສົມທົບກັບພາກສ່ວນທີ່ກ່ຽວຂ້ອງໃນການກໍ່ສ້າງ-ບຳລຸງ ແລະ ຍົກລະດັບພະນັກງານ-ສະມາຊິກກຳມະບານດ້ວຍຫຼາຍຮູບການ ເປັນຕົ້ນໄດ້ໄປຍົກລະດັບທິດສະດີການເມືອງ-ການປົກຄອງ, ວຽກງານກຳມະບານ, ວຽກງານວິຊາສະເພາະ ໃຫ້ສະມາຊິກກຳມະບານແຕ່ລະຂັ້ນໃຫ້ມີຄວາມຮູ້, ຄວາມສາມາດສູງຂຶ້ນ ໄດ້ໄປຮຽນ ຫຼື ຝຶກອົບຮົມຢູ່ພາຍໃນ ແລະ ຕ່າງປະເທດ ຫຼາຍຮ້ອຍເທື່ອຄົນ. ພ້ອມກັນນີ້ ສະມາຊິກກໍາມະບານຫຼາຍສະຫາຍ ກໍໄດ້ຮັບການກໍ່ສ້າງ, ຝຶກຝົນຫຼໍ່ຫຼອມໃຫ້ກາຍເປັນສະມາຊິກພັກ ແລະ ໄດ້ຮັບການມອບໝາຍແຕ່ງຕັ້ງໃນຕໍາລົງແໜ່ງງານພະນັກງານນໍາພາ-ຄຸ້ມຄອງຂັ້ນຕ່າງໆຕາມລະບຽບການສະແດງອອກຄື: ໄດ້ຮັບການແຕ່ງຕັ້ງຂຶ້ນເປັນຂັ້ນພະແນກ 415 ຕໍາແໜ່ງ ແລະ ຂັ້ນກົມ 149 ຕໍາແໜ່ງ.
 |
ກອງປະຊຸມຄັ້ງນີ້, ຜູ້ແທນກອງປະຊຸມໄດ້ພ້ອມກັນໃຊ້ສິດປະຊາທິປະໄຕຂອງຕົນຢ່າງເຕັມສ່ວນ, ປ່ອນບັດຄັດເລືອກເອົາຄະນະບໍລິຫານງານ ສກບ.ທຫລ ຊຸດທີ IX ຈໍານວນ 17 ສະຫາຍ, ໂດຍກອງປະຊຸມຄັ້ງປະຖົມມະລືກໄດ້ເປັນເອກະສັນ ເລືອກເອົາ ສະຫາຍ ນາງ ມະໂນລາ ເມືອງມະນີ ເປັນປະທານຄະນະບໍລິຫານງານສະຫະພັນກໍາມະບານທະນາຄານແຫ່ງ ສປປ ລາວ; ສະຫາຍ ສົມເພັດ ວົງຄໍາຈັນ ເປັນຮອງປະທານ; ສະຫາຍ ມະໂນສິນ ຕັນດາວົງ ເປັນຮອງປະທານ ທັງເປັນປະທານກວດກາ; ສະຫາຍ ກົງສັກ ສຸພອນສີ ເປັນຮອງປະທານ; ສະຫາຍ ສອນເພັດ ຈັນແດງ ຮອງປະທານກວດກາ.
ໂອກາດດັ່ງກ່າວ, ກອງປະຊຸມກໍໄດ້ຮັບຟັງການໂອ້ລົມຂອງ ສະຫາຍ ນາງ ບຸນຄໍາ ວໍລະຈິດ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນໍາ-ນໍາພາຂອງຄະນະບໍລິຫານງານ ສກບ.ທຫລ ຊຸດເກົ່າ ທີ່ໄດ້ຊີ້ນໍາ-ນໍາພາ ສະມາຊິກກໍາມະບານປະຕິບັດໜ້າທີ່ການເມືອງ ທີ່ໄດ້ຮັບມອບໝາຍ ແລະ ຍາດໄດ້ຜົນງານໃນຫຼາຍດ້ານ ພ້ອມທັງໃຫ້ທິດຊີ້ນໍາອັນມີຄຸນຄ່າ, ເພື່ອເປັນບ່ອນອີງໃຫ້ແກ່ການເຄື່ອນໄຫວຂອງວຽກງານອົງການຈັດຕັ້ງກໍາມະບານໃນຊຸມປີຕໍ່ໜ້າ. ຮຽກຮ້ອງມາຍັງຄະນະບໍລິຫານງານສະຫະພັນກໍາມະບານແຕ່ລະຂັ້ນ ພ້ອມດ້ວຍສະມາຊິກກໍາມະບານຈົ່ງພ້ອມກັນຄົ້ນຄວ້າເຊື່ອມຊຶມເນື້ອໃນຈິດໃຈຂອງມະຕິກອງປະຊຸມໃຫຍ່ຄັ້ງນີ້ ເພື່ອນໍາໄປຈັດຕັ້ງຜັນຂະຫຍາຍເປັນແຜນງານ-ໂຄງການລະອຽດຂອງຕົນ ນໍາໄປຈັດຕັ້ງປະຕິບັດໃຫ້ປະກົດຜົນເປັນຈິງເທື່ອລະກ້າວ.
ຂ່າວ: ຍຸພິນທອງ
ຄໍາເຫັນ