ໃນວັນທີ 16 ກໍລະກົດ ນີ້ ທີ່ຫ້ອງປະຊຸມໃຫຍ່ ສູນກາງຊາວໜຸ່ມ ປະຊາຊົນ ປະຕິວັດລາວ (ສຊປລ) ສະຫະພັນແມ່ຍິງຮາກຖານຫ້ອງການສຊປລ ໄດ້ເປີດກອງປະຊຸມໃຫຍ່ຄັ້ງທີ lllໂດຍການ ເປັນປະທານ ຂອງສະຫາຍ ນາງ ແກ້ວອຸດອນ ແສງມະນີວົງ ປະທານ ສະຫະພັນແມ່ຍິງ ສູນກາງຊາວໜຸ່ມ ປະຊາຊົນປະຕິວັດລາວ ມີບັນດາສະຫາຍ ຮອງປະທານ ສະຫະພັນກຳມະບານ ສູນກາງຊາວໜຸ່ມ ພ້ອມດ້ວຍປະທານໜ່ວຍຮາກຖານ ຂອງສະຫະພັນແມ່ຍິງຫ້ອງການ ແລະ ບັນດາສະຫາຍສະມາຊິກໃນໜ່ວຍແມ່ຍິງອ້ອມຂ້າງ ສູນກາງຊາວໜຸ່ມເຂົ້າຮ່ວມ.
ໃນກອງປະຊຸມໄດ້ຮັບຟັງການຂຶ້ນຜ່ານຮ່າງບົດລາຍງານການເມືອງຂອງສະຫະພັນແມ່ຍິງຮາກຖານຫ້ອງການ ຈາກສະຫາຍນາງ ແສງເພັດ ແກ້ວສົມສີ ຮອງປະທານສະຫະພັນແມ່ຍິງຮາກຖານຫ້ອງການ.ໃນໄລຍະຜ່ານມາການເຄື່ອນໄຫວຂອງຮາກຖານສະຫະພັນແມ່ຍິງຫ້ອງການ ໄດ້ປະຕິບັດຕາມພາລະບົດບາດ,ເຄື່ອນໄຫວຕາມການຊີ້ນຳຂອງສະຫະພັນແມ່ຍິງ ສຊປລ ໂດຍກົງ ແລະ ຮອບດ້ານ ໃນການຈັດຕັ້ງຜັນຂະຫຍາຍສຶກສາອົບຮົມການເມືອງແນວຄິດ ໃຫ້ແກ່ສະມາຊິກສະຫະພັນແມ່ຍິງພາຍໃນຮາກຖານ, ເຫັນໄດ້ແນວທາງນະໂຍບາຍຂອງພັກ-ລັດ,ມີແບບແຜນວິທີເຮັດວຽກແບບລວມສູນປະຊາທິປະໄຕ ເພື່ອຮັກສາໄວ້ຄວາມສາມັກຄີກໍຄືຂະບວນການລວມຂອງແມ່ຍິງໃຫ້ເປັນຂະບວນການຟົດຟື້ນ, ເອົາໃຈໃສ່ນຳພາ-ຊີ້ນຳ ສະມາຊິກແມ່ຍິງ ຈັດຕັ້ງປະຕິບັດກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VIII, ມະຕິກອງປະຊຸມໃຫຍ່ຄະນະບໍລິຫານງານສະຫະພັນແມ່ຍິງ ສຊປລ VII ແລະ ສຸມໃສ່ປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ. ເວົ້າລວມແລ້ວສະມາຊິກແມ່ຍິງຫ້ອງການເຮົາຍັງມີນ້ຳໃຈຮັກຊາດອັນດູດດື່ມ, ມີຄວາມຈົງຮັກພັກດີຕໍ່ພັກ, ມີຄວາມກະຕັນຍູກະຕະເວທີຕໍ່ຜູ້ທີ່ມີຄຸນງາມຄວາມດີ, ມີຄວາມສາມັກຄີຮັກແພງ, ມີນ້ຳໃຈບໍລິສຸດສັດຊື່, ໂອບເອື້ອອາລີເອື້ອເຟື້ອເຜື່ອແຜ່ຊ່ວຍເຫຼືອຊຶ່ງກັນແລະກັນ ເພື່ອພ້ອມກັນກ້າວໜ້າ, ມີຄວາມກະຕືລືລົ້ນໃນການສະແຫວງຫາຄວາມຮູ້, ສາມາດປົກປັກຮັກສາ ແລະ ເສີມຂະຫຍາຍຮັກສາມູນເຊື້ອຮີດຄອງປະເພນີ, ວັດທະນະທຳອັນດີງາມຂອງຊາດຂອງເຜົ່າ.ກອງປະຊຸມໄດ້ມີການປ່ອນບັດຄັດເລືອກເອົາຄະນະຮາກຖານຊຸດໃໝ່ ມີຜູ້ສະໝັກທັງໝົດ 5 ສະຫາຍ ແລະ ເລືອກເອົາ 3 ສະຫາຍ
ກອງປະຊຸມຄັ້ງປະຖົມມະລືກ ຂອງສະຫະພັນແມ່ຍິງຮາກຖານຫ້ອງການ ໄດ້ເປັນເອກະສັນເລືອກເອົາປະທານສະຫະພັນແມ່ຍິງຫ້ອງການ 1 ສະຫາຍ, ຮອງປະທານຮາກຖານ 1 ສະຫາຍ ແລະ ເລືອກເອົາຄະນະຮາກຖານ 1 ສະຫາຍ ຊຶ່ງມີລາຍຊື່ດັ່ງນີ້: 1. ສະຫາຍ ນາງ ວິລຸນນາ ກອງມະນີ ເປັນປະທານສະຫະພັນແມ່ຍິງຮາກຖາຫ້ອງການສຊປລ, 2. ສະຫາຍ ນາງ ຈັນອົບຊາມົນຕີ ເປັນຮອງປະທານສະຫະພັນແມ່ຍິງຮາກຖານຫ້ອງການ ເປັນປະທານກວດກາ, 3. ສະຫາຍ ນາງ ວັດສະລິນ ບຸນມີໄຊ ເປັນຄະນະປະທານສະຫະພັນແມ່ຍິງຮາກຖານຫ້ອງການ.
ຂ່າວ: ສຊປລ
ຄໍາເຫັນ