ກອງປະຊຸມໃຫຍ່ສະມາຊິກພັກຄັ້ງທີ II ຂອງໜ່ວຍພັກຮາກຖານສູນຄົ້ນຄ້ວາວິໄຈເຄມີ

ກອງປະຊຸມໃຫຍ່ຄັ້ງທີ II ຂອງໜ່ວຍພັກຮາກຖານສູນຄົ້ນຄ້ວາວິໄຈເຄມີ ໄດ້ຈັດຂຶ້ນໃນວັນທີ 2 ພຶດສະພານີ້ໂດຍການເປັນປະທານຂອງສະຫາຍພົວ ທຽມ ຫອມຊະນະ ກຳມະການຄະນະພັກອົງການກົມໃຫຍ່ຫົວໜ້າກົມເຄມີສາດ ກົມໃຫຍ່ເສນາທິການກອງທັບ, ມີສະຫາຍ ພັນເອກ ເທບພະພອນ ຫອມດີ ຮອງຫົວໜ້າຫ້ອງການເມືອງ ກົມໃຫຍ່ເສນາທິການກອງທັບ, ມີຄະນະພັກ-ຄະນະບັນຊາ, ພະນັກງານສະມາຊິກພັກກ່ຽວຂ້ອງເຂົ້າຮ່ວມ.   
    ສະຫາຍພັນໂທ ຄໍາຫຼອຍ ອິນທິອານົງແກ້ວ ເລຂາໜ່ວຍພັກ ຫົວໜ້າການເມືອງສູນຄົ້ນຄວ້າວິໄຈເຄມີ ໄດ້ສະຫຼຸບຕີລາຄາຜົນງານການເຄື່ອນໄຫວຊີ້ນໍາ-ນໍາພາວຽກງານຢ່າງຮອບດ້ານໃນໄລຍະຜ່ານມາ, ຄະນະໜ່ວຍພັກສູນຄົ້ນຄວ້າວິໄຈເຄມີໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານສະມາຊິກພັກ-ນັກຮົບເຊື່ອມຊຶມກຳແໜ້ນແຜນນະໂຍບາຍຂອງພັກ, ລະບຽບການຂອງລັດ ເປັນຕົ້ນມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິວ່າດ້ວຍ 4 ໜ້າທີ່ໃຫຍ່ 26 ແຜນງານ ທີ່ຄະນະພັກກະຊວງປ້ອງກັນປະເທດວາງອອກ ຕິດພັນກັບການເປີດບັ້ນດໍາເນີນຊີວິດການເມືອງພາຍໃນພັກ ໃນນັ້ນໄດ້ສຸມໃສ່ການກໍ່ສ້າງກົມກອງປອດໃສ ປອດໄພ ປອດຄະດີ ແລະ ການກໍ່ສ້າງກົມກອງວັດທະນະທໍາ-ນັກຮົບວັດທະນະ ທຳ, ຂະບວນການປັບປຸງລະບຽບແບບແຜນໃນກອງທັບ, ການປັບປຸງກໍ່ສ້າງພັກປະຕິບັດຕາມ 5 ຫຼັກການ 3 ທິດນໍາຂອງພັກ ເສີມຂະຫຍາຍມູນເຊື້ອການຈັດຕັ້ງລະບອບສອງຫົວໜ້າ, ຂະແໜງມີສະມາຊິກພັກ-ພະແນກມີຈຸພັກ, ສູນມີຄະນະໜ່ວຍພັກ, ພ້ອມນີ້ຍັງໄດ້ຮັບການບົ່ງຕົວແຕ່ງຕັ້ງປ່ຽນແທນເລຂາໜ່ວຍພັກ, ປັບປຸງສັບຊ້ອນການຈັດຕັ້ງຂັ້ນຈຸ, ຮອງຈຸ, ຄະນະພັກໄດ້ເອົາໃຈໃສ່ສຶກສາອົບຮົມພະນັກງານ-ສະມາຊິກພັກຢ່າງເປັນປົກກະຕິ ເຮັດໃຫ້ພະນັກງານສະມາຊິກພັກ ເຫັນໄດ້ບົດບາດການນໍາພາຂອງພັກ ສາມາດສ້າງສະມາຊິກພັກແຂງໄດ້ 61 ສະຫາຍຍິງ 19 ສະຫາຍ, ກາງ 1 ສະຫາຍ, ໄດ້ສະເໜີຄະນະພັກຂັ້ນເທິງອອກບັດໃຫ້ສະມາຊິກພັກທີ່ໄດ້ມາດຖານຈໍານວນ 27 ສະຫາຍ, ໄດ້ຮັບຮອງເປັນໜ່ວຍພັກປອດໃສ ເຂັ້ມແຂງ ໜັກແໜ້ນ 4 ສະໄໝຕິດຕໍ່ກັນ, ຂະຫຍາຍມະຫາຊົນກ້າວໜ້າເຂົ້າພັກໄດ້ 15 ສະຫາຍຍິງ 7 ສະຫາຍ.
    ຈາກຜົນງານການເຄື່ອນໄຫວວຽກງານຂະບວນການຢ່າງຮອບດ້ານພະນັກງານນັກຮົບ ແລະກົມກອງລວມໜູ່ຈຶ່ງໄດ້ຮັບຫຼຽນໄຊ,ໃບຍ້ອງຍໍປະເພດຕ່າງໆຄື: ຫຼຽນໄຊແຮງງານຊັ້ນ II ຈຳນວນ 1 ສະຫາຍ, ຫຼຽນໄຊແຮງງານຊັ້ນ III ຈຳນວນ 7 ສະຫາຍ, ຫຼຽນໄຊພິລະອາດຫານຊັ້ນ 3 ຈຳນວນ 9 ສະຫາຍ, ຫຼຽນກາແຮງງານ 8 ສະຫາຍ, ຫຼຽນກາລະນຶກ 70 ປີ 23 ສະຫາຍ. ນອກນັ້ນໄດ້ຮັບໃບຍ້ອງຍໍລັດຖະບານ, ໃບຍ້ອງຍໍກະຊວງປ້ອງກັນປະເທດ, ໃບຍ້ອງຍໍກົມໃຫຍ່ການເມືອງກອງທັບ. ກອງປະຊຸມໄດ້ປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ຊຶ່ງເປັນເອກະສັນເລືອກເອົາສະຫາຍພັນໂທ ນິກອນ ພົງພູທອນ ເປັນເລຂາໜ່ວຍພັກ, ສະຫາຍພັນໂທ ຈັນເພັງ ໄຊປັນຍາ ເປັນຮອງເລຂາ, ສະຫາຍພັນໂທ ບຸນຈັນ ປັນຍາ ເປັນກໍາມະການ, ສະຫາຍພັນໂທ ເຂັມເພັດ ແກ້ວຄໍາຢອງ ເປັນກໍາມະການການຄັງ, ສະຫາຍ ພັນຕີ ໂຕ້ນນີ ສີສະມັກເປັນກໍາມະການໂຄສະນາ ແລະ ປ່ອນບັດຄັດເລືອກເອົາຜູ້ແທນໄປຮ່ວມກອງປະຊຸມໃຫຍ່ຂັ້ນເທິງໄດ້ຕາມລະດັບຄາດໜາຍ.
ຂ່າວ-ພາບ: ເຊໄປນ