ກອງປະຊຸມປະກອບຄຳເຫັນໃສ່ຮ່າງນິຕິກຳ 4 ສະບັບ

ໃນວັນທີ 7 ຕຸລາ ຜ່ານມາ ທີ່ເມືອງວັງວຽງ ແຂວງວຽງຈັນ ໄດ້ຈັດກອງປະຊຸມປະກອບຄຳເຫັນໃສ່ຮ່າງນິຕິກຳ 4 ສະບັບ ທີ່ຢູ່ໃນຂົງເຂດຄວາມຮັບຜິດຊອບຂອງຄະນະເລຂາທິການສະພາແຫ່ງຊາດ ໂດຍການເປັນປະທານຂອງທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ ມີບັນດາທ່ານຮອງເລຂາທິການສະພາແຫ່ງຊາດ, ເລຂາ-ຮອງເລຂາທິການສະພາປະຊາຊົນຂັ້ນແຂວງ, ຄະນະກົມ, ສູນ, ຄະນະພະແນກ ແລະ ວິຊາການກ່ຽວຂ້ອງເຂົ້າຮ່ວມ. 
ກອງປະຊຸມຍັງໄດ້ຮັບຟັງການ ຮ່າງມະຕິຂອງຄະນະປະຈໍາສະພາແຫ່ງຊາດ ວ່າດ້ວຍວຽກງານການບໍລິການເອກະສານຜ່ານປະຕູດຽວ; ຮ່າງມະຕິຂອງຄະນະປະຈຳສະພາແຫ່ງຊາດ ວ່າດ້ວຍການດຳເນີນກອງປະຊຸມຄະນະປະທານຄະນະປະຈໍາສະພາແຫ່ງຊາດ ແລະ ຂອງຄະນະປະຈຳສະພາແຫ່ງຊາດ; ຮ່າງມະຕິຂອງຄະນະປະຈໍາສະພາແຫ່ງຊາດ ກ່ຽວກັບການພົວພັນປະສານງານ ລະຫວ່າງ ຄະນະເລຂາທິການສະພາແຫ່ງຊາດ ກັບບັນດາກຳມາທິການ ແລະ ສະຖາບັນຄົ້ນຄວ້ານິຕິກໍາສະພາແຫ່ງຊາດ; ຮ່າງມະຕິຂອງຄະນະປະຈໍາສະພາແຫ່ງຊາດ ວ່າດ້ວຍການປະສານງານ ລະຫວ່າງ ຄະນະເລຂາທິການສະພາແຫ່ງຊາດ ແລະ ຄະນະເລຂາທິການສະພາປະຊາຊົນຂັ້ນແຂວງ; ຈາກນັ້ນ, ຜູ້ເຂົ້າຮ່ວມກອງປະຊຸມໄດ້ຜັດປ່ຽນກັນປະກອບຄຳຄິດຄຳເຫັນໃສ່ນິຕິກຳດັ່ງກ່າວ.
ກອງປະຊຸມຄັ້ງນີ້ ແມ່ນໄດ້ດຳເນີນໄປຮອດວັນທີ 9 ຕຸລາ ນີ້ ຈຶ່ງສຳເລັດ ຊຶ່ງໄດ້ຮັບການສະ  ໜັບສະໜູນໂດຍໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ກັບຄະນະເລຂາທິການສະພາແຫ່ງຊາດ. 
(ຂ່າວ-ພາບ: ສພຊ)