 |
ກອງປະຊຸມຄັ້ງນີ້, ເປັນການເຜີຍແຜ່ໝາກຜົນການຮ່ວມມືຂອງພັນທະມິດສື່ມວນຊົນອາຊີໃຕ້-ອາຊີຕາເວັນ ອອກສ່ຽງໃຕ້ປະຈໍາປີ 2025. ໃນນັ້ນ, ໄດ້ມີພິທີເປີດໂຄງການຮ່ວມມືພັນທະມິດສື່ມວນຊົນ. ສໍາລັບໂຄງການກ່ຽວກັບປະເທດລາວມີ: ງານວັດທະນະທໍາບຸນກຸດຈີນກ້າວເຂົ້າສູ່ລາວ ແລະ ໄທປີ 2025 ພາຍໃຕ້ຫົວຂໍ້: ດື່ມນໍ້າສາຍດຽວ ກົມກຽວດັ່ງຄອບຄົວດຽວກັນ; ໂຄງການຮ່ວມມືປະຈໍາປີລະຫວ່າງສູນການສື່ສານສາກົນພາກພື້ນອາຊີໃຕ້-ອາຊີຕາເວັນ ອອກສ່ຽງໃຕ້ ແຂວງຢຸນນານ ກັບສື່ມວນຊົນຕ່າງໆຂອງລາວເຊັ່ນ: ໂຄງການ ລາຍການພາສາມື. ພ້ອມນັ້ນ, ຍັງມີງານພົບປະຕຽນສື ພາຍໃຕ້ຫົວຂໍ້: ການຮຽນຮູ້ຊຶ່ງກັນ ແລະ ກັນພັດທະນາຮ່ວມກັນ; ເວທີສົນທະນາໂຕະມົນໃນຫົວຂໍ້: ຂ້າມພູເຂົາ ແລະ ທະເລ, ຈັບມືກັນກ້າວເດີນໄປໜ້າ.
ໂອກາດນີ້, ທ່ານ ຄໍາພັນ ເຜີຍຍະວົງ ກ່າວວ່າ: ສື່ມວນຊົນເປັນຂົວຕໍ່ໃນການແລກປ່ຽນ ແລະ ການຮຽນຮູ້ຊຶ່ງກັນ ແລະ ກັນດ້ານອາລິຍະທໍາ ແລະ ເປັນຂົວຕໍ່ໃນການເພີ່ມທະວີຄວາມເຂົ້າໃຈກັນລະຫວ່າງປະຊາຊົນ. ພັນທະມິດສື່ມວນຊົນອາຊີໃຕ້-ອາຊີຕາເວັນອອກສ່ຽງໃຕ້ ໄດ້ສ້າງເວທີທີ່ສຳຄັນໃຫ້ການແລກປ່ຽນດ້ານວັດທະນະທຳ, ການຮ່ວມມືດ້ານສື່ມວນຊົນລະຫວ່າງລາວ-ຈີນ, ເປັນກົນໄກທີ່ມີປະສິດທິຜົນໃນການຊຸກຍູ້ການຊົມໃຊ້ຂໍ້ມູນຂ່າວສານຮ່ວມກັນ, ການປະສານສົມທົບຊັບພະຍາກອນຮ່ວມກັນ ແລະ ການແລກປ່ຽນບຸກຄະລາກອນຂອງສື່ມວນຊົນໃນພາກພື້ນ. ສື່ມວນຊົນລາວໄດ້ຕັ້ງໜ້າຕອບສະໜອງຕໍ່ການສ້າງພັນທະມິດເຊັ່ນ: ໜັງສືພິມປະຊາຊົນ, ສຳນັກຂ່າວສານປະເທດລາວ, ວິທະຍຸກະຈາຍສຽງແຫ່ງຊາດ, ໂທລະພາບແຫ່ງຊາດ ແລະ ສື່ມວນຊົນອື່ນໆ ກໍແມ່ນສະມາຊິກຂອງພັນທະມິດດັ່ງກ່າວ. ສື່ມວນຊົນລາວ-ຢຸນນານ ໄດ້ສ້າງຮູບແບບການຮ່ວມມືທີ່ມີການປະດິດຄິດສ້າງຢ່າງຕໍ່ເນື່ອງ, ມີເນື້ອໃນຫຼາກຫຼາຍ ແລະ ມີໝາກຜົນນັບມື້ນັບພົ້ນເດັ່ນ.
 |
ທ່ານ ຄໍາພັນ ເຜີຍຍະວົງ ກ່າວເນັ້ນຕື່ມວ່າ: ໃນອະນາຄົດ, ຄະນະໂຄສະນາອົບຮົມສູນກາງພັກ ປະຊາຊົນປະຕິວັດລາວຈະຊຸກຍູ້ ແລະ ສະໜັບສະໜູນສື່ມວນຊົນລາວດໍາເນີນການແລກປ່ຽນ ແລະ ຮ່ວມມືກັບສື່ມວນຊົນປະ ເທດຕ່າງໆ ພາຍໃຕ້ຂອບຂອງພັນທະມິດສື່ມວນຊົນອາຊີໃຕ້-ອາຊີຕາເວັນອອກສ່ຽງໃຕ້ ເປັນຕົ້ນຊຸກຍູ້ການແລກປ່ຽນບຸກຄະລາກອນ, ຝຶກອົບຮົມ, ສຳມະນາຮ່ວມກັນ ເພື່ອສ້າງໂອກາດດໍາເນີນການແລກປ່ຽນຄວາມຄິດຄວາມເຫັນ ແລະ ຍົກລະດັບຄວາມສາມາດໃຫ້ນັກສື່ມວນຊົນ ພ້ອມທັງຮ່ວມມືດ້ານເຕັກນິກ, ຮ່ວມກັນຊຸກຍູ້ເຕັກໂນໂລຊີທັນສະໄໝ, ປັນຍາປະດິດເພື່ອໃຫ້ເຕັກນິກດັ່ງກ່າວໄດ້ເກີດຜົນປະໂຫຍດຕໍ່ສະມາຊິກພັນທະມິດຫຼາຍກວ່າເກົ່າ, ເລັ່ງລັດຂະບວນການຫັນເປັນທັນສະໄໝຂອງສື່ມວນຊົນໃນພາກພື້ນ, ເພີ່ມທະວີການຊົມໃຊ້ຊັບພະຍາກອນຮ່ວມກັນ, ສ້າງເວທີສື່ມວນຊົນ, ແຫຼ່ງຂໍ້ມູນການເອົາຂ່າວ, ກົນໄກຊົມໃຊ້ຜະລິດຕະພັນສື່ຂ່າວຮ່ວມກັນໃຫ້ສົມບູນແບບ ເພື່ອຮ່ວມກັນເລົ່າເລື່ອງລາວການພັດທະນາຮ່ວມມືກັນຂອງບັນດາປະເທດໃນພາກພື້ນ, ສະແດງໃຫ້ເຫັນກາລະໂອກາດການຮ່ວມມືໃນພາກພື້ນເພື່ອປະກອບສ່ວນເຂົ້າໃນການສ້າງປະຊາຄົມຮ່ວມຊາຕາກຳຂອງມວນມະນຸດ.
 |
(ຂ່າວ-ພາບ: ວັນເພັງ)
ຄໍາເຫັນ