ສະມາຄົມນັກທຸລະກິດແມ່ຍິງລາວໄດ້ຈັດພິທີຖະແຫຼງຂ່າວຂຶ້ນໃນວັນທີ 2 ກັນຍາຜ່ານມາ ທີ່ສະພາການຄ້າ ແລະ ອຸດສາຫະກຳແຫ່ງຊາດລາວ ໂດຍການເປັນປະທານຮ່ວມຂອງທ່ານນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງລາວປະທານກອງປະຊຸມຜູ້ປະກອບການແມ່ຍິງອາຊຽນ ແລະພິທີມອບລາງວັນພິເສດຜູ້ປະກອບການແມ່ຍິງອາຊຽນປີ 2024, ທ່ານນາງ ລາວັນ ສຸດທິສານ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ, ທ່ານ ແສງພະນົມຈອນ ອິນທະສານຮອງຫົວໜ້າຫ້ອງການກະຊວງອຸດສາຫະກຳ ແລະ ການຄ້າ, ມີບັນດານັກທຸລະກິດ, ຜູ້ໃຫ້ການສະໜັບສະໜູນ ພ້ອມດ້ວຍສື່ມວນຊົນຈາກພາກສ່ວນຕ່າງໆເຂົ້າຮ່ວມ.
ທ່ານນາງ ຈັນທະຈອນ ວົງໄຊ ກ່າວວ່າ: ກອງປະຊຸມຄັ້ງນີ້ຈັດຂຶ້ນເພື່ອຊຸກຍູ້ຜູ້ປະກອບການແມ່ຍິງໃນພາກພື້ນອາຊຽນເວົ້າລວມໂດຍສະເພາະທຸລະກິດແມ່ຍິງລາວເນັ້ນເຖິງການປະກອບສ່ວນຮ່ວມກັນຂອງຜູ້ປະກອບການຍິງໃນການຂະຫຍາຍດ້ານເສດຖະກິດ ແລະພັດທະນາສັງຄົມ; ເພື່ອອໍານວຍຄວາມສະດວກໃນການສ້າງເຄືອຂ່າຍເຮັດທຸລະກິດ, ສົ່ງເສີມການຮ່ວມມືລະຫວ່າງຜູ້ປະກອບການແມ່ຍິງ, ນັກລົງທຶນ, ຜູ້ວາງແຜນນະໂຍບາຍ ແລະພາກສ່ວນກ່ຽວຂ້ອງອື່ນໆ; ເພື່ອສະເຫຼີມສະຫຼອງຄວາມມານະພະຍາຍາມຂອງຜູ້ປະກອບການແມ່ຍິງອາຊຽນໃນການຊຸກຍູ້ການເຕີບໂຕທາງດ້ານເສດຖະກິດທີ່ຍືນຍົງ ແລະ ສ້າງຄວາມເຂັ້ມແຂງຂອງປະເທດອາຊຽນ ແລະການເຊື່ອມໂຍງເສດຖະກິດໃນພາກພື້ນ; ເພື່ອຮັບຮູ້, ຢັ້ງຢືນເຖິງຜົນສໍາເລັດອັນຊົງກຽດແກ່ຜູ້ປະກອບການແມ່ຍິງດີເດັ່ນ ທັງເປັນແຮງບັນດາໃຈໃຫ້ແກ່ຄົນຮຸ່ນໃໝ່ດ້ວຍການມອບລາງວັນພິເສດຂອງນັກທຸລະກິດແມ່ຍິງອາຊຽນປີ 2024; ເພື່ອສັງລວມສິນຄ້າຂອງສະມາຊິກສະມາຄົມນັກທຸລະກິດແມ່ຍິງລາວ ແລະ ຜູ້ສະໜັບສະໜູນຫຼັກມາວາງສະແດງ ເພື່ອເພີ່ມສີສັນໃນຂັ້ນຕອນຕ່າງໆ, ຕອບສະໜອງໃຫ້ແກ່ການຂະຫຍາຍເຄືອຂ່າຍຂອງຜູ້ປະກອບການແມ່ຍິງ ແລະຜູ້ມີສ່ວນຮ່ວມໃນກອງປະຊຸມດັ່ງກ່າວຊຶ່ງເປັນປະໂຫຍດຢ່າງໃຫຍ່ຫຼວງໃຫ້ທັງຜູ້ສະໜັບສະໜູນ ແລະເຈົ້າພາບຈັດກອງປະຊຸມຄັ້ງນີ້ຢ່າງແທ້ຈິງ.
ການຈັດກອງປະຊຸມຄັ້ງນີ້,ຍັງເປັນສ່ວນໜຶ່ງທີ່ຢັ້ງຢືນຕໍ່ສາກົນວ່າພັກ ແລະ ລັດຖະບານລາວເຮົາເວົ້າລວມ,ເວົ້າສະເພາະສະມາຄົມນັກທຸລະກິດແມ່ຍິງລາວມີຄວາມພ້ອມ ແລະ ພູມໃຈກະກຽມເປັນເຈົ້າພາບໃນການຈັດກອງປະຊຸມລະດັບອາຊຽນ ແລະ ກອງປະຊຸມອື່ນໆທີ່ປິ່ນອ້ອມໃນປີ 2024 ນີ້.ກອງປະຊຸມຄາດວ່າຈະຈັດຂຶ້ນຢ່າງເປັນທາງການໃນວັນທີ 4 ຕຸລາ 2024ນີ້ ທີ່ໂຮງແຮມແລນມາກແມ່ຂອງລີເວີໄຊ ນະຄອນຫຼວງວຽງຈັນ ສປປ ລາວ. ງານດັ່ງກ່າວຈະມີຜູ້ເຂົ້າຮ່ວມຈາກພາກລັດຖະບານ, ສະຖານທູດ, ທູຕານຸທູດ, ນັກວິຊາການ, ອົງການຈັດຕັ້ງສາກົນ ແລະ ຈາກບັນດາປະເທດສະມາຊິກອາຊຽນ(ລວມທັງຕີມໍແລັດສະເຕ) ລວມທັງສື່ມວນຊົນຈາກສປປລາວ ຄາດວ່າຈະມີຜູ້ເຂົ້າຮ່ວມປະມານ 200 ຄົນ.
ທ່ານນາງ ຈັນທະຈອນ ວົງໄຊ ກ່າວອີກວ່າ: ຄາດວ່າຜົນຈະໄດ້ຮັບຈາກກອງປະຊຸມຄັ້ງນີ້ເປັນການຢືນຢັນຄືນໃໝ່ຕໍ່ຄໍາໝັ້ນສັນຍາຂອງອາຊຽນໃນການຊຸກຍູ້ສົ່ງເສີມການພັດທະນາຜູ້ປະກອບການແມ່ຍິງແລະ ສ້າງຄວາມເຂັ້ມແຂງທາງດ້ານເສດຖະກິດໃຫ້ເປັນວາລະຂອງພາກພື້ນເພື່ອຮັບຮູ້ບົດບາດສໍາຄັນ, ທ່າແຮງຕ່າງໆ ແລະ ຄວາມເຂັ້ມແຂງຂອງຜູ້ນໍາແມ່ຍິງ ແລະ ແມ່ຍິງທຸກຄົນໃນຂອບເຂດອາຊຽນໃນການຫາແນວທາງເພື່ອກ້າວໄປຂ້າງໜ້າໃນການຟື້ນຟູທາງດ້ານເສດກິດຂອງແມ່ຍິງ ແລະ ສ້າງອະນາຄົດຂອງຂົງເຂດອາຊຽນໃນຊຸມປີຫຼັງເກີດໂຣກພະຍາດລະບາດແລະໄພພິບັດຕ່າງໆ; ສ້າງສາຍພົວພັນຮ່ວມມື ແລະ ສົມທົບລະຫວ່າງລັດຖະບານ, ພາກເອກະຊົນ ແລະ ບັນດາຜູ້ສະໜັບສະໜູນທີ່ມີສ່ວນຮ່ວມທີ່ສໍາຄັນໃນການຊຸກຍູ້ກອງປະຊຸມລະດັບສາກົນໃນຄັ້ງນີ້ໃຫ້ກ້າວໄປສູ່ການມີຄໍາໝັ້ນສັນຍາຕໍ່ໄປເລື້ອຍໆ.
(ຂ່າວ-ພາບ: ວັນເພັງ)
ຄໍາເຫັນ