ກອງປະຊຸມເທື່ອທີ 10 ສະພາແຫ່ງຊາດ ຫວຽດນາມ ຊຸດທີ 15 ມີປະລິມານວຽກຫຼາຍທີ່ສຸດຂອງອາຍຸການ, ລວມມີ 66 ເນື້ອໃນ, ໃນນັ້ນມີ ຮ່າງກົດໝາຍ 49 ສະບັບ, ຮ່າງມະຕິ 4 ສະບັບ ນອນໃນວຽກງານສ້າງກົດໝາຍ ແລະ 13 ໝວດບັນຫາເສດຖະກິດ - ສັງຄົມ, ງົບປະມານ, ການຕິດຕາມກວດກາ ແລະ ບຸກຄະລາກອນຂັ້ນສູງ. ໃນກອງປະຊຸມ, ສະມາຊິກສະພາແຫ່ງຊາດຈະພິຈາລະນາຮ່າງກົດໝາຍຫຼາຍສະບັບນອນໃນບັນດາຂົງເຂດສຳຄັນຈຸດສຸມ ຄື: ການປ້ອງກັນຄວາມສະຫງົບ - ຕຸລາການ, ເສດຖະກິດ, ການລົງທຶນ, ການສຶກສາ, ວິທະຍາສາດ, ຊີວິດການເປັນຢູ່… ພ້ອມກັນນັ້ນ, ກອງປະຊຸມຄັ້ງນີ້ກໍພິຈາລະນາ, ຕົກລົງເນື້ອໃນບຸກຄະລາກອນຂຶ້ນກັບສິດອຳນາດ, ລວມມີ: ການເລືອກຕັ້ງ, ໃຫ້ສັດຕະຍາບັນ, ການພົ້ນຕຳແໜ່ງ ຂອງຕຳແໜ່ງຂັ້ນສູງລັດຈຳນວນໜຶ່ງໃນກົງຈັກ.
ທ່ານ ເຈິ່ນແທັງເໝີນ ປະທານສະພາແຫ່ງຊາດ ຫວຽດນາມ ກ່າວຄຳເຫັນເປີດກອງປະຊຸມວ່າ: ນີ້ແມ່ນວຽກງານສ້າງກົດໝາຍຈຳນວນຫຼາຍທີ່ສຸດໃນປະຫວັດສາດຂອງບັນດາສະໄໝກອງປະຊຸມ, ແມ່ນສິ່ງພິສູດໃຫ້ແກ່ຈິດໃຈການສ້າງກົດໝາຍຕ້ອງໄປກ່ອນບາດກ້າວໜຶ່ງ, ເປີດທາງໃຫ້ແກ່ນະວັດຕະກຳ, ຖືເອົາຊີວິດ ແລະ ຜົນປະໂຫຍດຂອງປະຊາຊົນເປັນໄມ້ຫຼາວັດແທກຂອງນະໂຍບາຍ.
ໃນວາລະເປີດກອງປະຊຸມໃນຕອນເຊົ້າ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ສະເໜີບົດລາຍງານສະຫຼຸບໝາກຜົນການປະຕິບັດແຜນການພັດທະນາເສດຖະກິດ - ສັງຄົມ ປີ 2025 ແລະ 5 ປີ 2021 – 2025, ພ້ອມກັບການຄາດຄະເນແຜນການປີ 2026. ທ່ານປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ສະເໜີບົດລາຍງານສັງລວມຄຳເຫັນ, ຂໍ້ສະເໜີແນະຂອງຜູ້ມີສິດເລືອກຕັ້ງ, ກ່ອນທີ່ທ່ານປະທານສະພາແຫ່ງຊາດ ຈະລາຍງານວຽກງານອາຍຸການຊຸດທີ 15.
ຄໍາເຫັນ