 |
ທ່ານ ສຸວັນນີ ໄຊຊະນະ ໄດ້ກ່າວໄຂກອງປະຊຸມຢ່າງເປັນທາງການວ່າ: ກອງປະຊຸມ ຄັ້ງນີ້, ຈະໄດ້ດຳເນີນໄປເປັນເວລາ 2 ວັນເຕັມ ເພື່ອຮັບຟັງການລາຍງານ, ພິຈາລະນາ, ຮັບຮອງເອົາບັນຫາສໍາຄັນທີ່ເປັນພື້ນຖານຂອງແຂວງ ດັ່ງນີ້: ຮັບຟັງການລາຍງານ ແລະ ພິຈາລະນາ ຮັບຮອງເອົາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ ປະຈຳ 6 ເດືອນຕົ້ນປີ ແລະ ທິດທາງແຜນການ ປະຈໍາ6 ເດືອນທ້າຍປີ 2025; ຮັບຟັງການລາຍງານກ່ຽວກັບການຈັດຕັ້ງປະຕິບັດ ຄຳສັ່ງເລກທີ 06/ນຍ ແລະ ຄຳສັ່ງເລກທີ 02/ຂບຊ ວ່າດ້ວຍການຕິດຕາມ, ກວດກາ ແລະ ແກ້ໄຂບັນຫາການຂຸດຄົ້ນແຮ່ຫີນ-ຊາຍ ທີ່ຕິດພັນກັບການຂຸດຄົ້ນແຮ່ຄຳຕົກຂ້ອນ ຕາມບັນດາສາຍນໍ້າ, ຮ່ອງຫ້ວຍ ແລະ ການຄຸ້ມຄອງ, ການຂຸດຄົ້ນແຮ່ທາດຕ່າງໆພາຍໃນແຂວງ; ຮັບຟັງການລາຍງານຜົນການສໍາມະນາວິທະຍາສາດກ່ຽວກັບການທາບທາມຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VI ຂອງແຂວງ; ຮັບຟັງການລາຍງານ ແລະ ພິຈາລະນາ, ຮັບຮອງເອົາບົດລາຍງານການປະເມີນຜົນການຈັດຕັ້ງປະຕິບັດຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງ, ປົກປັກຮັກສາຊັບພະຍາກອນປ່າໄມ້ ແລະ ຊີວະນາໆພັນ ໃນເຂດອ່າງຮັບນໍ້າໜ້າເຂື່ອນໄຟຟ້ານໍ້າງຽບ 1 ໃນເຂດພື້ນທີ່ແຂວງບໍລິຄໍາໄຊ; ຮັບຟັງການລາຍງານ ແລະ ພິຈາລະນາຮັບຮອງເອົາການຈັດຕັ້ງປະຕິບັດວຽກງານແຕ່ກອງປະຊຸມສະໄໝສາມັນ ເທື່ອທີ 8-9 ແລະ ທິດທາງແຜນການຫາທ້າຍສະໄໝ ຂອງສະພາປະຊາຊົນແຂວງ. ພ້ອມນີ້ ກອງປະຊຸມຍັງຈະໄດ້ຮັບຟັງການອະທິບາຍ, ຊີ້ແຈງຈາກການນຳຂອງແຂວງ, ພະແນກການທີ່ກ່ຽວຂ້ອງ ຕໍ່ກັບການປະກອບຄຳເຫັນ, ການຊັກຖາມຂອງບັນດາທ່ານສະມາຊິກສະພາປະຊາຊົນແຂວງ; ຊຶ່ງບັນດາເນື້ອໃນຕ່າງໆ ທີ່ກອງປະຊຸມຈະໄດ້ພິຈາລະນາ, ຮັບຮອງໃນຄັ້ງນີ້ ລ້ວນແລ້ວແຕ່ມີຄວາມໝາຍຄວາມສຳຄັນ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານຂອງແຂວງ ກໍຄືການປະຕິບັດພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນແຂວງ ໃນຖານະທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ, ພິເສດໃນໄລຍະດຳເນີນກອງປະຊຸມ ຍັງໄດ້ເປີດກວ້າງການປະກອບຄຳເຫັນ, ຄຳສະເໜີ ຂອງບັນດາທ່ານມາຍັງກອງປະຊຸມ ຜ່ານໂທລະສັບສາຍດ່ວນ ໝາຍເລກ 054 156 ໂດຍບໍ່ເສຍຄ່າ.
(ຂ່າວ-ພາບ: ຄຳຟອງ)
ຄໍາເຫັນ