 |
ກອງປະຊຸມໄດ້ຮັບຟັງການລາຍງານ ແລະ ພິຈາລະນາຮັບຮອງເອົາບັນຫາສໍາຄັນພື້ນຖານຂອງແຂວງ, ຮັບຟັງການລາຍງານ ກ່ຽວກັບການເຄື່ອນໄຫວວຽກງານ ຂອງຄະນະປະຈໍາສະພາປະຊາຊົນແຂວງ ໃນລະຫວ່າງ ກອງປະຊຸມສະໄໝສາມັນເທື່ອທີ VIII ຫາ ກອງປະຊຸມສະໄໝສາມັນເທື່ອທີ IXຂອງສະພາປະຊາຊົນແຂວງ; ພິຈາລະນາ ຮັບຮອງເອົາບົດລາຍງານຂອງເຈົ້າແຂວງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາ 6 ເດືອນຕົ້ນປີ ແລະ ທິດທາງແຜນການ ປະຈໍາ 6 ເດືອນທ້າຍປີ 2025 ຂອງແຂວງ; ພິຈາລະນາ ຮັບຮອງເອົາບົດລາຍງານຂອງອົງການປົກຄອງແຂວງກ່ຽວກັບການຈັດຕັ້ງປະຕິິບັດແຜນງົບປະມານແຫ່ງລັດປະຈໍາ 6 ເດືອນຕົ້ນປີ ແລະ ທິດທາງແຜນການປະຈໍາ 6 ເດືອນທ້າຍປີ 2025 ຂອງແຂວງ; ພິຈາລະນາ ຮັບຮອງເອົາບົດລາຍງານຂອງພະແນກຍຸຕິທໍາແຂວງກ່ຽວກັບການຈັດຕັ້ງປະຕິບັດຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດໃນໄລຍະ 4 ປີກວ່າຜ່ານມາ;
 |
ພິຈາລະນາ ຮັບຮອງເອົາບົດລາຍງານການປະເມີນຜົນການຈັດຕັ້ງປະຕິບັດຂໍ້ຕົກລົງຂອງເຈົ້າແຂວງຈໍານວນ 3 ສະບັບຄື: ຂໍ້ຕົກລົງຂອງເຈົ້າແຂວງວ່າດ້ວຍການຄຸ້ມຄອງລາຍຮັບ-ລາຍຈ່າຍງົບປະມານຂັ້ນແຂວງ, ຂັ້ນເມືອງ ແລະ ຂັ້ນບ້ານ; ຂໍ້ຕົກລົງຂອງເຈົ້າແຂວງ ວ່າດ້ວຍການຄຸ້ມຄອງສິ່ງປຸກສ້າງ ແລະ ເຂດສະຫງວນທາງພາຍໃນເທດສະບານ ແລະ ບັນດາຕົວເມືອງຂອງແຂວງຫຼວງນໍ້າທາ; ຂໍ້ຕົກລົງຂອງເຈົ້າແຂວງ ວ່າດ້ວຍການກໍານົດເຂດປະເມີນລາຄາທີ່ດິນແຕ່ລະປະເພດຢູ່ແຂວງຫຼວງນໍ້າທາ; ພິຈາລະນາ ຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາ 6 ເດືອນຕົ້ນປີ ແລະ ທິດທາງແຜນການປະຈໍາ 6 ເດືອນທ້າຍປີ 2025 ຂອງສະພາປະຊາຊົນ. ນອກນີ້, ສະມາຊິກສະພາຊົນແຂວງ ແລະ ຜູ້ແທນກອງປະຊຸມ ຍັງໄດ້ປະກອບຄໍາເຫັນໃສ່ບັນດາບົດລາຍງານຂອງແຂວງ ແລະ ຮັບຟັງການຊີ້ແຈງຂອງພະແນກການກ່ຽວຂ້ອງຈໍານວນໜຶ່ງຕໍ່ຄໍາຊັກຖາມຂອງບັນດາທ່ານ ສະມາຊິກສະພາປະຊາຊົນແຂວງພ້ອມທັງ ຈະລົງຄະແນນສຽງຮັບເອົາມະຕິກອງປະຊຸມ. ກອງປະຊຸມຈະໄດ້ດໍາເນີນເປັນເວລາ ສອງວັນ (ແຕ່ວັນທີ 22-23ກໍລະກົດ 2025) ຈິ່ງຈະສໍາເລັດ.
 |
(ຂ່າວ: ມຸນຕີ)
ຄໍາເຫັນ