ກອງປະຊຸມສາມັນຄົບຄະນະບໍລິຫານງານສຊປລຄັ້ງທີ 5ສະໄໝທີ VIII

ກອງປະຊຸມສາມັນຄົບຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ(ສຊປລ)ຄັ້ງທີ 5ສະໄໝທີ VIIIໄດ້ຈັດຂຶ້ນໃນວັນທີ 1 ເມສານີ້ ທີ່ສູນກິດຈະກຳຄົບວົງຈອນ ສຊປລ ນະຄອນຫຼວງວຽງຈັນ ໂດຍການເປັນປະທານຂອງທ່ານ ມອນໄຊ ລາວມົວຊົ່ງ ກໍາມະການສຳຮອງສູນກາງພັກ ເລຂາຄະນະບໍລິຫານງານ ສຊປລ, ມີຮອງເລຂາຄະນະບໍລິຫານງານ ສຊປລ,ບັນດາສະຫາຍຄະນະເລຂາທິການ,ຫົວໜ້າກົມ-ຮອງກົມ, ຄະນະບໍລິຫານງານຊາວໜຸ່ມກະຊວງ, ອົງການ, ແຂວງ, ນະຄອນຫຼວງວຽງຈັນແລະ ແຂກຖືກເຊີນເຂົ້າຮ່ວມ.
    ທ່ານ ມອນໄຊ ລາວມົວຊົ່ງ ກ່າວວ່າ: ກອງປະຊຸມຄັ້ງນີ້ຈະໄດ້ພ້ອມກັນສຸມໃສ່ຄົ້ນຄວ້າປະກອບຄຳຄິດຄຳເຫັນຕໍ່ບັນດາເນື້ອໃນດັ່ງນີ້:ບົດສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານ ສຊປລ ຄັ້ງທີ 4ສະໄໝທີ VIII;ທົບທວນບາງພາກໃນກົດລະບຽບຂອງຄະນະຊາວໜຸ່ມປະຊາຊົນປະຕິວັດລາວ ສະໄໝທີ VIII;ລາຍງານຜົນສຳເລັດການດໍາເນີນກອງປະຊຸມໃຫຍ່ຊາວໜຸ່ມແຕ່ລະຂັ້ນ; ບົດສະຫຼຸບຕີລາຄາການຈັດຕັ້ງປະຕິບັດແຜນພັດທະນາຊາວໜຸ່ມ-ເຍົາວະຊົນ 5 ປີ ຄັ້ງທີ II; ບົດສຳຫຼວດການນຳພາລວມຂອງຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວສະໄໝທີ VIII (1 ປີຜ່ານມາ) ພ້ອມນັ້ນ, ກອງປະຊຸມຍັງໄດ້ສະເໜີເປົ້າໝາຍເພື່ອຮັບຮອງເອົາຄະນະບໍລິຫານງານ ສຊປລ ສະໄໝທີ VIII ເພີ່ມເຕີມເພື່ອທົດແທນຈໍານວນທີ່ວ່າງລົງ; 
ທ່ານ ມອນໄຊ ລາວມົວຊົ່ງ ຍັງໄດ້ກ່າວຕື່ມວ່າ: ບັນດາເນື້ອໃນທີ່ຈະນໍາມາຄົ້ນຄວ້າຂ້າງເທິງນັ້ນ ແມ່ນເປັນວຽກງານສຳຄັນພື້ນຖານທີ່ພວກເຮົາຈະໄດ້ພ້ອມກັນຕີລາຄາໝາກຜົນໃນການຈັດຕັ້ງປະຕິບັດໃນໄລຍະຜ່ານມາ ແລະ ວາງທິດທາງແຜນການຈຸດສຸມໃນຕໍ່ໜ້າເພື່ອພ້ອມກັນແກ້ໄຂດ້ານຄົງຄ້າງໃຫ້ໄດ້ຮັບຜົນດີຂຶ້ນກວ່າເກົ່າ.ດັ່ງນັ້ນ,ຈຶ່ງຮຽກຮ້ອງມາຍັງບັນດາສະຫາຍຜູ້ແທນກອງປະຊຸມຈົ່ງເຊີດຊູຄວາມຮັບຜິດຊອບໃນການຄົ້ນຄວ້າປະກອບຄຳຄິດຄຳເຫັນໃຫ້ລະອຽດ, ເລິກເຊິ່ງ, ຫຼີກເວັ້ນການປະກອບຄຳເຫັນແບບລວມໆບໍ່ມີເນື້ອໃນຂາດເຫດຜົນ ແລະ ບໍ່ພາວະວິໄສຕ້ອງໃຫ້ສອດຄ່ອງກັບພາລະບົດບາດ, ສິດ ແລະ ໜ້າທີ່ຂອງ ຄຊປລ ແຕ່ລະຂະແໜງການ ແລະ ທ້ອງຖິ່ນຂອງຕົນແນໃສ່ເຮັດໃຫ້ສໍາເລັດຕາມຈຸດປະສົງ, ຄາດໝາຍໃນການດໍາເນີນກອງປະຊຸມສາມັນຄົບຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວໃນຄັ້ງນີ້ໃຫ້ໄດ້ຕາມຄາດໝາຍທີ່ວາງໄວ້.
ຂ່າວ-ພາບ: ບຸນອູ້ມ