 |
ກອງປະຊຸມ ໄດ້ຮັບຟັງການລາຍງານສະຫຼຸບຕີລາຄາສະພາບການສົ່ງເສີມ ແລະ ຄຸ້ມຄອງການລົງທຶນໃນໄລຍະຜ່ານມາ ພ້ອມທັງທິດທາງແຜນການໃນຕໍ່ໜ້າ, ຮັບຟັງຜົນການປະເມີນການຈັດຕັ້ງປະຕິ ບັດດຳລັດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກຳມະການສົ່ງເສີມ ແລະ ຄຸ້ມຄອງການລົງທຶນ ສະບັບເລກທີ 530/ນຍ, ລົງວັນທີ 11 ສິງຫາ 2025; ພ້ອມທັງໄດ້ຮັບຟັງການປະກອບຄຳຄິດຄຳເຫັນຈາກຂະແໜງການກ່ຽວຂ້ອງຂັ້ນສູນກາງ, ທ້ອງຖິ່ນ ແລະ ຕາງໜ້າພາກທຸລະກິດ ຕໍ່ກັບວຽກງານສົ່ງເສີມ ແລະ ຄຸ້ມຄອງການລົງທຶນ.
 |
ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ເນັ້ນໜັກວ່າ: ໃນໄລຍະຜ່ານມາ ພັກ ແລະ ລັດຖະບານ ຍາມໃດກໍຕີລາຄາສູງຕໍ່ບົດບາດຂອງການລົງທຶນພາກເອກະຊົນທັງພາຍໃນ ແລະ ຕ່າງປະ ເທດ. ນັບແຕ່ໄດ້ເປີດກວ້າງການລົງທຶນເປັນຕົ້ນມາ, ລັດຖະບານໄດ້ມີການປັບປຸງນິຕິກຳ ແລະ ນະໂຍ ບາຍຕ່າງໆ ໃຫ້ສອດຄ່ອງກັບເງື່ອນໄຂ ແລະ ຄວາມຮຽກຮ້ອງຕ້ອງການຂອງການພັດທະນາໃນແຕ່ລະໄລຍະ ເພື່ອແນໃສ່ດຶງດູດການລົງທຶນ, ວິຊາການ ແລະ ແຫຼ່ງທຶນສຳຄັນຢ່າງຕໍ່ເນື່ອງ ເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ. ນັບແຕ່ປີ 1989 ຮອດປັດຈຸບັນ ມີການລົງທຶນທັງໝົດ 5,394 ໂຄງການ, ມູນຄ່າລວມ 65.5 ຕື້ໂດລາ. ໃນນັ້ນ, ການລົງທຶນພາຍໃນ (ສະເພາະກິດຈະການຄວບຄຸມ ແລະ ສຳປະທານ) ກວມເອົາປະມານ 23% ຂອງການອະນຸມັດທັງໝົດ, ປະເທດທີ່ລົງທຶນຫຼາຍກວ່າໝູ່: ອັນດັບ 1 ແມ່ນ ສປ ຈີນ (970 ໂຄງການ, ມູນຄ່າ 15 ຕື້ໂດລາ), ອັນດັບ 2 ແມ່ນ ສສ ຫວຽດນາມ (441 ໂຄງການ, ມູນຄ່າ 12.7 ຕື້ໂດລາ) ແລະ ຣາຊະອານາຈັກໄທ (686 ໂຄງການ, ມູນຄ່າ 6.9 ຕື້ໂດລາ), ໃນ 7 ເດືອນຕົ້ນປີ 2026 ໄດ້ອະນຸມັດການລົງທຶນໃນກິດຈະການສຳປະທານ ແລະ ກິດຈະການຄວບຄຸມ ທັງໝົດ 34 ໂຄງການ, ມູນຄ່າ 8.5 ຕື້ໂດລາ, ເພີ່ມຂຶ້ນ 68% ເມື່ອທຽບໃສ່ໄລຍະດຽວກັນຂອງປີ 2025 ແລະ ສາມາດນຳເຂົ້າທຶນຕົວຈິງໄດ້ຫຼາຍກວ່າ 1 ຕື້ໂດລາ.
 |
ທ່ານ ສອນໄຊ ສີພັນດອນ, ໄດ້ໃຫ້ກຽດໂອ້ລົມ ແລະ ມີທິດຊີ້ນຳ ຊຶ່ງເນັ້ນໜັກວ່າ: ກອງປະຊຸມຄັ້ງນີ້ໄຂຂຶ້ນໃນໄລຍະທີ່ທົ່ວພັກ-ລັດ ແລະ ປະຊາຊົນ ພວມຕັ້ງໜ້າແຂ່ງຂັນສ້າງຜົນງານເພື່ອຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XII ຂອງພັກ ພາຍໃຕ້ຄຳຂວັນ: "ຍົກສູງບົດບາດການນໍາພາທີ່ເຂັ້ມແຂງຂອງພັກ, ຕັ້ງໜ້າສ້າງເສດຖະກິດເອກະລາດ ເປັນເຈົ້າຕົນເອງ, ສືບຕໍ່ບູລະນະລະບອບປະຊາທິປະໄຕປະຊາ ຊົນ ໃຫ້ໜັກແໜ້ນ ກ້າວຂຶ້ນສູ່ສັງຄົມນິຍົມ" ກໍຄືການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X (2026-2030).
 |
ທ່ານນາຍົກລັດຖະມົນຕີ ໄດ້ຊີ້ນຳທິດທາງໃນຕໍ່ໜ້າ ຄື: ບຸກທະລຸດ້ານຈິນຕະນາການໃໝ່: ສ້າງການຫັນປ່ຽນໃນວຽກງານສົ່ງເສີມ ແລະ ຄຸ້ມຄອງການລົງທຶນ ໃຫ້ມີຄວາມວ່ອງໄວ, ທັນການ, ມີຄຸນນະພາບ, ໂປ່ງໃສ ແລະ ເປັນມືອາຊີບ, ຫັນເປັນທັນສະໄໝ: ເອົາໃຈໃສ່ຍົກສູງວຽກງານຄຸ້ມຄອງ ແລະ ກວດກາບັນດາໂຄງການສຳປະທານທີ່ໄດ້ອະນຸມັດຜ່ານມາ ແລະ ໂຄງການໃໝ່ທີ່ຈະອະນຸມັດໃນຕໍ່ໜ້າ ໃຫ້ຮັດກຸມ, ລະອຽດ, ຈະແຈ້ງ ບົນພື້ນຖານນິຕິກຳ ແລະ ລະບຽບກົດໝາຍ, ແກ້ໄຂປະກົດການຫຍໍ້ທໍ້: ເດັດ ຂາດແກ້ໄຂບັນຫາຫຍໍ້ທໍ້ໃນຂະແໜງການລົງທຶນຢ່າງຈິງຈັງ, ເພີ່ມທະວີມາດຕະການທີ່ເຂັ້ມງວດ, ນຳໃຊ້ເຄື່ອງມືທັນສະໄໝ, ເຄັ່ງຄັດຕໍ່ຜູ້ລະເມີດ ແລະ ຍ້ອງຍໍຊົມເຊີຍຜູ້ມີຜົນງານດີເດັ່ນ ທັງພາກລັດ ແລະ ພາກທຸລະກິດ.
ກອງປະຊຸມໄດ້ເປັນເອກະພາບກັນຮັບຮອງເອົາບັນຫາສຳຄັນຕ່າງໆ ໂດຍມອບໃຫ້ທຸກກະຊວງ, ອົງ ການທຽບເທົ່າກະຊວງ ແລະ ອົງການປົກຄອງທ້ອງຖິ່ນ ສືບຕໍ່ປະຕິບັດພາລະບົດບາດຂອງຕົນ ເພື່ອຊຸກຍູ້ການລົງທຶນພາກເອກະຊົນໃຫ້ບັນລຸ 409,470 ຕື້ກີບ (ເທົ່າກັບ 64.4% ຂອງການລົງທຶນທັງໝົດ) ຕາມຄາດໝາຍແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X (2026–2030), ສຸມໃສ່ຂຸດຄົ້ນທ່າແຮງບົ່ມຊ້ອນດ້ານຊັບພະຍາກອນຕາມທິດຍືນຍົງ ແລະ ສີຂຽວ, ສ້າງກົນໄກທີ່ເອື້ອອຳນວຍໃຫ້ທຸລະກິດພາຍໃນສາມາດແຂ່ງຂັນໄດ້ ຕາມທິດເສດຖະກິດເອກະລາດ ເປັນເຈົ້າຕົນເອງ.
 |
ພ້ອມດຽວກັນນັ້ນ, ໄດ້ຊີ້ນຳໃຫ້ເລັ່ງປັບປຸງກົດໝາຍວ່າດ້ວຍການສົ່ງເສີມການລົງທຶນ ສະບັບປີ 2024 ແລະ ກົດໝາຍທີ່ກ່ຽວຂ້ອງ; ເຫັນດີສະເໜີປັບປຸງດຳລັດ ເລກທີ 530/ນຍ, ລົງວັນທີ 11 ສິງຫາ 2025 ເພື່ອໃຫ້ກົງຈັກການຈັດຕັ້ງຂັ້ນສູນກາງ ແລະ ທ້ອງຖິ່ນ ສອດຄ່ອງກັບກົງຈັກດ້ານພັກ ແລະ ຕອບສະໜອງໜ້າທີ່ການເມືອງໄດ້ຢ່າງມີປະສິດທິພາບ. ໃຫ້ ຄລທ ສືບຕໍ່ເປັນໃຈກາງປະສານງານ, ປັບປຸງກົນໄກການພິຈາລະນາອະນຸມັດໂຄງການ (ໂດຍສະເພາະກິດຈະການຄວບຄຸມ ແລະ ສຳປະທານ) ໃຫ້ມີຄວາມສະດວກ, ວ່ອງໄວ ແລະ ໂປ່ງໃສ ເພື່ອດຶງດູດນັກລົງທຶນທີ່ມີຄຸນນະພາບ ແລະ ທຶນຮອນຕົວຈິງ ພ້ອມທັງຈັດຕັ້ງປະຕິບັດການລວມສູນວຽກງານເຊັນບົດບັນທຶກຄວາມເຂົ້າໃຈ (MOU) ແລະ ສັນຍາລົງທຶນ ຢູ່ ຄລທ ແຕ່ລະຂັ້ນ ຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 564/ຫສນຍ, ລົງວັນທີ 5 ພຶດສະພາ 2026 ຢ່າງເຂັ້ມງວດ.
(ຂ່າວ: ແສງຈັນ)
ຄໍາເຫັນ