ທ່ານ ໄພວັນ ແກ້ວປະເສີດ ໄດ້ກ່າວວ່າ: ວຽກງານສຸຂະພາບຕາ ແມ່ນນອນຢູ່ໃນສາຍແຜນງານ 3 ຂອງວຽກງານປິ່ນປົວ ແລະ ຟື້ນຟູໜ້າທີ່ການ, ມີພາລະບົດບາດຈັດຕັ້ງປະຕິບັດວຽກງານໃຫ້ບໍລິການກວດ, ບົ່ງມະຕິ, ປິ່ນປົວ-ຟື້ນຟູໜ້າທີ່ການ, ຄວບຄຸມພະຍາດ ແລະ ສົ່ງເສີມສຸຂະພາບຕາໃນຂອບເຂດທົ່ວປະເທດ ແລະ ສະມາຄົມແພດ-ພະຍາບານຕາລາວ ກໍແມ່ນໜຶ່ງທີ່ປະຕິບັດໜ້າທີ່ການເມືອງ ເພື່ອຮັບປະກັນໃຫ້ແກ່ການຈັດຕັ້ງແຜນພັດທະນາສາທາລະນະສຸກ 5 ປີ ຄັ້ງທີ IX ຂອງກະຊວງສາທາລະນະສຸກ ແລະ ແຜນຍຸດທະສາດແຫ່ງຊາດ 5 ປີ 2021-2025 ຂອງວຽກງານຮັກສາສຸຂະພາບຕາ ໃຫ້ປະກົດຜົນເປັນຈິງ. ດັ່ງນັ້ນ, ພວກເຮົາຕ້ອງໃດ້ເອົາໃຈໃສ່, ຊອກຫາວິທີທາງແກ້ໄຂໃຫ້ປະສົບຜົນສໍາເລັດ ແລະ ເປັນການວາງແຜນ ເພື່ອການພັດທະນາແນໃສ່ວຽກງານຮັກສາສຸຂະພາບຕາທີ່ເລັ່ງໃສ່ຈຸດສຸມສໍາຄັນທີ່ເປັນບຸລິມະສິດ ທີ່ທາງສູນປິ່ນປົວ ແລະ ຮັກສາສຸຂະພາບຕາ ກໍຄືກະຊວງສາທາລະນະສຸກ ໄດ້ສໍາເລັດໃນການຈັດຕັ້ງປະຕິບັດກາງສະໄໝ ຂອງແຜນຍຸດທະສາດຮັກສາສຸຂະພາບຕາແຫ່ງຊາດ 5 ປີ ໂດຍເລັ່ງໃສ່ 8 ເປົ້າ ໝາຍຂອງແຜນຍຸດທະສາດທີ່ວາງໄວ້ ແລະ ຈຸດສຸມເພື່ອຫຼຸດຜ່ອນພາວະຕາບອດ ຈາກພະຍາດຕາທີ່ເປັນສາເຫດເຮັດຕາບອດເຊັ່ນ: ພະຍາດແກ່ນຕາຂຸ້ນ, ຕາກະດັນ, ບາດແຜແກ້ວຕາ, ອຸບັດເຫດທາງຕາ ແລະ ພະຍາດເບົາຫວານຂຶ້ນຕາ, ພະຍາດຕາເດັກ, ສາຍຕາຜິດປົກກະຕິ ແລະ ສາຍຕາບົກຜ່ອງ ທີ່ຕິດພັນກັບການບໍລິການສຸຂະພາບ ເພື່ອບັນລຸການປະຕິບັດ 5 ດີ 1 ພໍໃຈ ໃຫ້ຍົກສູງການບໍລິການສຸຂະພາບພາຍໃນໂຮງໝໍ ເພື່ອຫຼຸດຜ່ອນຫາງສຽງຈົມວ່າຈາກສັງຄົມຈົມວ່າໃຫ້ໂຮງໝໍຫຼຸດໜ້ອຍຖອຍລົງ. ພ້ອມນັ້ນ, ສູນຂອງພວກເຮົາ ເປັນສູນໜຶ່ງທີ່ຍົກສູງການບໍລິການ ໂດຍສະເພາະການປະຕິບັດ 5 ດີ 1 ພໍໃຈ. ພ້ອມດຽວກັນນັ້ນ, ໄດ້ມີການພັດທະນາໂດຍນຳໃຊ້ເຕັກໂນໂລຊີວິທະຍາສາດ ເຄື່ອງມືອຸປະກອນທີ່ທັນສະໄໝເຂົ້າໃນການຜ່າຕັດສະລາຍແກ່ນຕາຂຸ້ນລະບົບຜ່ານທໍ່ ແລະ ໄດ້ຂະຫຍາຍໄປ 11 ແຂວງ ທີ່ສາມາດຜ່າຕັດໄດ້ ເພື່ອໃຫ້ທ່ວງທັນກັບປະເທດໃກ້ຄຽງ ແລະ ພາກພື້ນ. ທັງນີ້ກໍເພື່ອເປັນການຫຼຸດຜ່ອນຄົນຕາບອດຈາກພະຍາດແກ່ນຕາຂຸ້ນ ໃຫ້ນັບມື້ນັບຫຼຸດໜ້ອຍຖອຍລົງໄປເທື່ອລະກ້າວ. ຈາກນັ້ນ, ຜູ້ເຂົ້າຮ່ວມຍັງໄດ້ຮັບຟັງການລາຍງານຜົນການຈັດຕັ້ງປະຕິບັດແຜນຍຸດທະສາດການຮັກສາສຸຂະພາບຕາແຫ່ງຊາດ ປີ 2021-2024 ແລະ ແຜນການ ປີ 2025 ຕື່ມອີກ.
(ຂ່າວ: ວັນເພັງ, ພາບ: ກະຊວງສາທາລະນະສຸກ)
ຄໍາເຫັນ