ງານສະຫຼອງວັນຕັບອັກເສບໂລກ

ທ່ານ ຫວັງນະຄອນ ດິດຕະພົງ ກ່າວວ່າ: ໂຮງໝໍເຊດທາທິຣາດ ແລະ ບໍລິສັດ ວຽງທອງການຢາ ຮ່ວມຈັດງານສະຫຼອງວັນດັ່ງກ່າວ ແມ່ນເພື່ອສົ່ງເສີມການຮັກສາສຸຂະພາບ ໂດຍສະເພາະແມ່ນພະຍາດຕັບອັກເສບ. ອົງການອະນາໄມໂລກ WHO ໄດ້ກຳນົດເອົາວັນທີ 28 ສິງຫາ ຂອງທຸກໆປີ ເປັນວັນຕັບອັກເສບໂລກ (World Hepatiti Day) ສະຖິຕິອົງການອະນາໄມໂລກຕັບອັກເສບເປັນອັນດັບທີ່ສອງຂອງພະຍາດຊຶມເຊື້ອ, ທົ່ວໂລກມີຄົນເຈັບທີ່ຕິດເຊື້ອໄວຣັດຕັບອັກເສບເສຍຊີວິດ 1.3 ລ້ານຄົນຕໍ່ປີ, ຜູ້ຊາຍເສຍຊີວິດຫຼາຍກວ່າຜູ້ຍິງ, ນອກຈາກນີ້ມີຜູ້ຕິດເຊື້ອໃໝ່ 6 ພັນຄົນທຸກໆວັນ ຫຼື ປະມານ 25 ພັນຄົນຕໍ່ປີ. ຄະນະນຳໂຮງໝໍ ແລະ ພະແນກວິຊາການເຫັນວ່າພະຍາດນີ້ ເປັນໄພອັນຕະລາຍຕໍ່ຊີວິດ.

ດັ່ງນັ້ນ, ງານໃນຄັ້ງນີ້ໄດ້ອະທິບາຍຄວາມຮູ້ ແລະ ວິທີການຕິດຕາມປິ່ນປົວໃຫ້ຖືກຕ້ອງ ແລະ ທັນເວລາ, ພະຍາດຕັບອັກເສບເກີດຈາກເຊື້ອໄວຣັດເຂົ້າສູ່ຈຸລັງຕັບ ກໍ່ໃຫ້ເກີດການອັກເສບ ສົ່ງຜົນໃຫ້ມີການທຳລາຍຈຸລັງຕັບ ເຮັດໃຫ້ຈຸລັງຕັບເຮັດໜ້າທີ່ຜິດປົກກະຕິ ຊຶ່ງເຊື້ອໄວຣັດຕັບອັກເສບມີຫຼາຍຊະນິດເຊັ່ນ: A, B ,C, D ແລະ E ແຕ່ລະຊະນິດແມ່ນມີອາການສະແດງ, ການຂະຫຍາຍ, ອາການສົນ ແມ່ນມີຄວາມແຕກຕາງກັນ. ການຕິດເຊື້ອໄວຣັດຕັບອັກເສບຊະນິດ B ແລະ C ຖ້າບໍ່ໄດ້ຮັບການຮັກສາປິ່ນປົວອາດມີຜົນຮ້າຍຕ່າງໆຕໍ່ຕັບເຊັ່ນ :ພະຍາດຕັບແຂງ, ມະເຮັງຕັບ ແລະ ມີໂອກາດແຜ່ເຊື້ອໃຫ້ຄົນອື່ນໄດ້ຈາກການຕິດເຊື້ອຈາກເລືອດ, ນໍ້າເຫຼືອງ ຫຼື ນໍ້າຍ່ອຍຕ່າງໆຈາກຜູ້ຕິດເຊື້ອ, ເພດສຳພັນ ແລະ ແມ່ສູ່ລູກເປັນຕົ້ນ.

ສ່ວນການຕິດເຊື້ອໄວຣັດຕັບອັກເສບຊະນິດ A ແລະ E ແມ່ນມີການຕິດຕໍ່ແຜ່ເຊື້ອທາງອາຫານ, ນໍ້າດື່ມທີ່ມີການປົນເປື້ອນເຊື້ອພະຍາດ ຫຼື ຕິດຈາກການສຳຜັດອາຈົມ ສະນັ້ນທາງປ້ອງກັນທີ່ດີຄືຄວນດື່ມນໍ້າສະອາດ ໃຊ້ເຄື່ອງຂອງສ່ວນຕົວ, ບໍລິໂພກອາຫານສຸກ ລ້າງມືໃຫ້ສະອາດຢູ່ສະເໝີ ແລະ ເຊື້ອໄວຣັດຕັບອັກເສບຊະນິດ B, C, D ຕິດເຊື້ອຈາກເພດສຳພັນ ຈາກແມ່ຫາລູກ ຈາກການສຳຜັດເລືອດ.

ທ່ານ ນາງ ອາພອນ ວິຊາເທບ ໃຫ້ຮູ້ວ່າ: ອົງການອະນາໄມໂລກ ໄດ້ກຳນົດເອົາວັນທີ 8 ສິງຫາ ຂອງທຸກໆປີ ເປັນວັນຕັບອັກເສບໂລກຂອງທຸກໆປະເທດ ລວມທັງ ສປປ ລາວ ກໍໄດ້ຖືເອົາວັນດັ່ງກ່າວເປັນວັນທີ່ມີຄວາມໝາຍຄວາມສຳຄັນ ເພື່ອຕໍ່ສູ້ກັບພະຍາດຕັບອັກເສບທີ່ກຳລັງເປັນໄພຂົ່ມຂູ່ ຕໍ່ຊີວິດຂອງປະຊາຊົນ.

ກະຊວງສາທາລະນະສຸກ ໄດ້ໃຫ້ຄວາມສຳຄັນຕໍ່ວຽກງານປ້ອງກັນ, ຮັກສາສຸຂະພາບ ແລະ ເບິ່ງແຍງປິ່ນປົວພະຍາດໃຫ້ປະຊາຊົນບັນດາເຜົ່າ ໂດຍເອົາວຽກງານປ້ອງກັນພະຍາດເປັນຕົ້ນຕໍ ແລະ ການປິ່ນປົວພະຍາດເປັນສຳຄັນສຳລັບການປ້ອງກັນ ແລະ ປິ່ນປົວພະຍາດຕັບອັກເສບ ແລະ ໄດ້ຊີ້ນຳໃຫ້ໂຮງໝໍເອົາໃຈໃສ່ໃນການຕິດຕາມປິ່ນປົວ ໂດຍສະເພາະຜູ້ຍິງຖືພາ ຕ້ອງໄດ້ກວດເລືອດຊອກຫາເຊື້ອໄວຣັດຕັບອັກເສບ, ໄວຣັດ HIV, ເດັກນ້ອຍເກີດໃໝ່ໃຫ້ໄດ້ຮັບວັກຊິນປ້ອງກັນຕັບອັກເສບ B, ຜູ້ຕິດເຊື້ອ ແລະ ເປັນພະຍາດແລ້ວ ໃຫ້ໄດ້ຮັບການເບິ່ງແຍງປິ່ນປົວຖືກວິທີ ແລະ ການດຳລົງຊີວິດທີ່ຖືກຕ້ອງ.

ໃນງານດັ່ງກ່າວຍັງໄດ້ຮັບຟັງການອະທິບາຍ ໃຫ້ຄວາມຮູ້ກ່ຽວກັບວິທີປ້ອງກັນ ແລະ ປິ່ນປົວ ພະຍາດອັກເສບຕັບຈາກເຊື້ອໄວຣັດ ຈາກທີມງານຊ່ຽວຊານ ເພື່ອເຮັດໃຫ້ການຕິດເຊື້ອພະຍາດດັ່ງກ່າວຫຼຸດລົງ.

(ຂ່າວ-ພາບ: ຕຸໄລເພັດ)