ບໍລິຈາກເລືອດສະຫຼອງວັນສ້າງຕັ້ງ ສນຊ

ການຈັດກິດຈະກຳຄັ້ງນີ້, ເພື່ອສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 75 ປີ ຄາດວ່າຈະມີຜູ້ເຂົ້າຮ່ວມ ແລະ ບໍລິຈາກເລືອດເປັນຈຳນວນຫຼາຍຮ້ອຍຄົນ, ການບໍລິຈາກເລືອດເປັນການສ້າງບຸນກຸສົນ, ເປັນການໃຫ້ຄວາມຫວັງແກ່ຄົນເຈັບ, ເປັນການຕໍ່ຊີວິດໃຫ້ເຂົາເຈົ້າເຫຼົ່ານັ້ນ ເຮັດໃຫ້ສັງຄົມມີຄວາມສະຫງົບ, ມີນໍ້າໃຈເອື້ອເຟື້ອເຜື່ອແຜ່, ມີຄວາມສາມັກຄີຮັກແພງຊ່ວຍເຫຼືອຊຶ່ງກັນ ແລະ ກັນ. ດັ່ງນັ້ນ, ຈຶ່ງຂໍເຊີນຊວນບັນດາທ່ານ ທີ່ມີອາຍຸ 17 ປີ ຫາ 65 ປີ ທີ່ມີນໍ້າໜັກ 45 ກິໂລຂຶ້ນໄປ ມີສຸຂະພາບແຂງແຮງ ສາມາດບໍລິຈາກເລືອດໄດ້ ເພື່ອເປັນການຊ່ວຍເຫຼືອມະນຸດສະທຳ ແລະ ຊ່ວຍກອບກູ້ເອົາຊີວິດຂອງຄົນເຈັບທີ່ຕ້ອງການເລືອດໃນແຕ່ລະວັນ ໃນຂອບເຂດທົ່ວປະເທດ.

ປັດຈຸບັນຍັງມີຄົນເຈັບເດັກນ້ອຍທີ່ເປັນພະຍາດເລືອດຈາງຂັ້ນຮ້າຍແຮງ ເນື່ອງຈາກພະຍາດໄຂ້ຍຸງ (Malaria), ໄຂ້ເລືອດອອກ, ພະຍາດມະເຮັງ, ໄຂ່ຫຼັງຊຸດໂຊມ, ຜູ້ໄດ້ຮັບຜົນກະທົບຈາກອຸບັດເຫດ ພາວະສຸກເສີນ ທາງໄພທຳມະຊາດ ລວມເຖິງການຜ່າຕັດຊະນິດຕ່າງໆ ລ້ວນແລ້ວແຕ່ມີຄວາມຈໍາເປັນຕ້ອງການເລືອດເພື່ອໃຫ້ມີຊີວິດຢູ່ລອດ. ເວົ້າໄດ້ວ່າການມີເລືອດເພື່ອຕອບສະໜອງໃຫ້ແກ່ຄົນເຈັບ ຖືວ່າເປັນປັດໃຈໜຶ່ງທີ່ຂາດບໍ່ໄດ້ຢູ່ໃນໂລກຂອງພວກເຮົາ.

ຂ່າວ-ພາບ: ບຸນອູ້ມ