ການໃຫ້ຄໍາປຶກສາກ່ອນຖືພາ ເປັນບັນຫາສໍາຄັນຫຼາຍ

 ປັດຈຸບັນມີແມ່ຍິງມາໃຫ້ບໍລິການຝາກທ້ອງ ສະເລ່ຍ 1 ເດືອນ ປະມານ 20 ກວ່າຄົນ, ການວາງແຜນຄອບຄົວປະມານ 25 ຄົນ, ມີຜູ້ມາໃຫ້ຄໍາປຶກສາກ່ອນແຕ່ງງານ ປະມານ 20 ກວ່າຄູ່. ສ່ວນຜູ້ທີ່ມາໃຫ້ຄໍາປຶກສາຫຼາຍກວ່າໝູ່ແມ່ນໄລຍະເທດສະການ, ງານດອງ. ພ້ອມນັ້ນ, ມີການໃຫ້ຄໍາປຶກສາທາງອອນລາຍ, ໃນສະຖານທີ່ໃຫ້ບໍລິການ ກ່ຽວກັບສຸຂະພາບໄວໜຸ່ມ-ໄວຈະເລີນພັນ. ສ່ວນຫຼາຍມາປຶກສາເລື່ອງການປ້ອງກັນການຖືພາກ່ອນກໍານົດ, ວິທີການຄຸມກໍາເນີດ, ການນໍາໃຊ້ຖົງຢາງອະນາໄມ ແລະ ອື່ນໆ. ສູນໃຫ້ຄໍາປຶກສາວຽກງານໄວໜຸ່ມຈະເລີນພັນ ພວກເຮົາ ຍັງໄດ້ເນັ້ນລົງໄປເຄື່ອນໄຫວໃຫ້ຄໍາປຶກສາສຸຂະສຶກສາ ຢູ່ພາຍໃນໂຮງຮຽນ ມ ປາຍ. ພ້ອມນັ້ນ, ໄດ້ສ້າງທີມງານອາສາສະໝັກໃຫ້ຄໍາປຶກສາແບບເພື່ອນສອນເພື່ອນໄດ້ທັງໝົດ 10 ຄົນ. ປັດຈຸບັນພະຍາດຕິດຕໍ່ທາງເພດສໍາພັນມີຫຼາຍ ເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວ ໄດ້ຮັບຜົນດີຂຶ້ນ, ເຮັດໃຫ້ຜູ້ຕິດເຊື້ອທາງເພດສໍາພັນມີໜ້ອຍລົງເທື່ອລະກ້າວ. ສະນັ້ນ, ໃນຕໍ່ໜ້າຖ້າໂຄງການ ຫຼື ພະແນກສາທາ ລະນະສຸກມີງົບປະມານໃຫ້ ກໍຢາກຂະຫຍາຍອາສາສະໝັກເພື່ອນສອນເພື່ອນ ໃຫ້ໄດ້ຫຼາຍຂຶ້ນຕື່ມ ເນື່ອງຈາກວ່າເພື່ອນກັບເພື່ອນບອກກັນຕໍ່ໆກັນ ຈະໄດ້ດີກວ່າຜູ້ເປັນໝໍ. ຖ້າຂະຫຍາຍໄປໄດ້ຫຼາຍ ເຊື່ອວ່າໂຕເລກພະຍາດຕິດຕໍ່ ຫຼື ການສົ່ງຄວາມຮູ້ຈະດີຂຶ້ນກວ່າເກົ່າໃນອະນາຄົດ.

ທ່ານ ນາງ ມະນີວອນ ຜາຟອງ ໄດ້ກ່າວຕື່ມວ່າ: ທ່ານໃດ ຫຼື ຄູ່ຜົວເມຍ ກໍາລັງຈະສ້າງຄອບ ຄົວໃໝ່ ສາມາດມາໃຫ້ຄໍາປຶກສານໍາແພດໝໍ ຢູ່ສູນຂອງພວກເຮົາໄດ້ ເນື່ອງຈາກວ່າເລື່ອງສຸຂະພາບແມ່ຍິງ, ເດັກນ້ອຍ ໃນປັດຈຸບັນໜ້າເປັນຫ່ວງຫຼາຍ. ໃນນັ້ນ, ອັດຕາການເສຍຊີວິດຂອງແມ່ຍິງ-ເດັກນ້ອຍ ກໍຍັງສູງ. ຖ້າບໍ່ໄດ້ຮັບການໃຫ້ຄໍາປຶກສາຈາກແພດໝໍ ຍັງຈະສົ່ງຜົນກະທົບຕໍ່ເສດຖະກິດຂອງຄອບຄົວ, ການມີລູກຫຼາຍເກີນ ທີ່ຈະແຕະຕ້ອງເຖິງສຸຂະພາບຂອງແມ່ຕື່ມອີກ.