 |
ທ່ານ ຈັນທະລາ ສຸກສາຄອນ, ຫົວໜ້າສະຖາບັນເລືອດແຫ່ງຊາດ, ໄດ້ກ່າວມອບພາຫະນະດັ່ງ ກ່າວ ໂດຍມີທ່ານ ນາງ ຂັນທະລີ ສິມທອງຄຳ, ຫົວໜ້າອົງການກາແດງແຂວງເຊກອງ, ເປັນຜູ້ກ່າວຮັບ. ການມອບພາຫະນະ ແລະ ອຸປະກອນໃນຄັ້ງນີ້ ມີເປົ້າໝາຍເພື່ອເພີ່ມທະວີຂີດຄວາມສາມາດຂອງກາແດງແຂວງ ໃນການອອກປຸກລະດົມຮັບບໍລິຈາກເລືອດຢູ່ພື້ນທີ່ຕ່າງໆພາຍໃນແຂວງໃຫ້ມີປະສິດທິພາບຫຼາຍຂຶ້ນ, ຊຶ່ງເປັນການປະກອບສ່ວນສຳຄັນເພື່ອບັນລຸເປົ້າໝາຍສູ້ຊົນ 750 ຖົງໃນປີ 2025 ນີ້.
 |
ໃນໂອກາດນີ້, ທ່ານປະທານອົງການກາແດງແຫ່ງຊາດລາວ ຍັງໄດ້ໂອ້ລົມ ແລະ ຊີ້ແຈງຕໍ່ພະນັກ ງານກາແດງແຂວງ ໃຫ້ສືບຕໍ່ເອົາໃຈໃສ່ໃນການປະຕິບັດ 9 ວຽກງານຫຼັກຂອງອົງການ, ໂດຍສະເພາະແມ່ນການປຸກລະດົມຂົນຂວາຍການບໍລິຈາກເລືອດຢ່າງປອດໄພ ແລະ ທັນເວລາ, ການໂຄສະນາຂົນ ຂວາຍແຫຼ່ງທຶນດ້ວຍຫຼາຍຮູບແບບເພື່ອສ້າງຄວາມໂປ່ງໃສ, ລວມທັງການຊ່ວຍເຫຼືອບັນເທົາທຸກປະຊາຊົນຜູ້ປະສົບໄພພິບັດ, ຜູ້ທຸກຍາກ ແລະ ຜູ້ດ້ອຍໂອກາດດ້ວຍຄວາມເຕັມໃຈ ແລະ ມີປະສິດທິຜົນ.
ພ້ອມກັນນີ້, ຄະນະນຳຍັງໄດ້ມອບເຄື່ອງຊ່ວຍເຫຼືອບັນເທົາທຸກຈຳນວນໜຶ່ງ ເຊັ່ນ: ເຄື່ອງຊຸດໃຊ້ຄົວເຮືອນ, ຜ້າຫົ່ມ, ອາຫານແຫ້ງ ແລະ ສິ່ງຈຳເປັນອື່ນໆ ເພື່ອໃຫ້ອົງການກາແດງແຂວງເຊກອງ ນຳໄປມອບຕໍ່ໃຫ້ປະຊາຊົນທີ່ປະສົບໄພພິບັດ ແລະ ຜູ້ຂາດເຂີນ. (ຂ່າວ: ອົງການກາແດງແຫ່ງຊາດ)
ຄໍາເຫັນ