ໂຮງໝໍເມືອງວັງວຽງ ເນັ້ນໜັກວຽກງານສົ່ງເສີມສຸຂະພາບແມ່ ແລະ ເດັກ ເປັນບັນຫາສໍາຄັນ

ທ່ານ ນາງ ຄໍາພັນ ໄຊຍະວົງ ຮອງຜູ້ອໍານວຍການໂຮງໝໍ ເມືອງວັງວຽງ ແຂວງວຽງຈັນ ຮັບຜິດຊອບຊີ້ນໍາວຽກງານບໍລິການ ໄດ້ໃຫ້ສໍາພາດຕໍ່ສື່ມວນຊົນສູນກາງ ແລະ ທ້ອງຖິ່ນເມື່ອບໍ່ດົນມານີ້ວ່າ: ໂຮງໝໍເມືອງວັງວຽງ ເປັນໜຶ່ງໂຮງໝໍ ໂດມມີສາຍຕັ້ງຂຶ້ນກັບພະແນກສາທາລະນະສຸກແຂວງວຽງຈັນ ມີທັງໝົດ 30 ຕຽງ ມີການບໍລິການພະຍາດທົ່ວໄປ. ພ້ອມນັ້ນ, ຍັງສາມາດຜ່າຕັດຄົນເຈັບທີ່ເປັນພະຍາດທົ່ວໄປໄດ້ ແລະ ໂຮງໝໍເມືອງວັງວຽງໄດ້ເອົາໃຈໃສ່ປະຕິບັດຕາມ 5 ດີ 1 ພໍໃຈ ທີ່ກະຊວງສາທາລະນະສຸກວາງອອກເຊັ່ນ: ຕ້ອນຮັບດີ, ສະດວກດີ, ສະອາດດີ, ບົ່ງມະຕິຊັດເຈນດີ ແລະ ປິ່ນປົວດີ; ບໍລິການໜ້າເພິ່ງພໍໃຈ ໂດຍເນັ້ນໜັກໃສ່ໃນການສົ່ງເສີມສຸຂະພາບ, ການສັກຢາປ້ອງກັນພະຍາດ-ໃຫ້ຄວາມຮູ້ດ້ານສຸຂະສຶກສາຕ່າງໆ, ປິ່ນປົວຮັກສາສຸຂະພາບຄົນເຈັບ, ການຟື້ນຟູສຸຂະພາບ (ແມ່ຫຼັງເກີດຢູ່ໂຮງໝໍ ແລະ ຢູ່ບ້ານ); ເນັ້ນໜັກວຽກງານແມ່ ແລະ ເດັກ ໂດຍສະເພາະວຽກງານໄວຈະເລີນພັນ, ສຸຂະພາບເດັກນ້ອຍ ຊຶ່ງໄດ້ເປີດບໍລິການ 5 ມື້ຄື: ຈັນ-ອັງຄານ ແລະ ວັນພະຫັດ ເປີດບໍລິການຝາກທ້ອງ-ໃຫ້ຄໍາປຶກສາແມ່ຍິງຖືພາ, ວັນພຸດສັກຢາເດັກນ້ອຍ, ວັນສຸກເປີດບໍລິການໃນການວາງແຜນຄອບຄົວ. ການຈັດຕັ້ງປະຕິບັດວຽກງານແມ່ ແລະ ເດັກຢູ່ໂຮງໝໍ ຍັງໄດ້ເນັ້ນໜັກໃສ່ວຽກງານໃຫ້ຄໍາປຶກສາກ່ຽວກັບການປະຕິບັດຕົວເວລາຖືພາ, ກ່ອນການຖືພາ, ໃຫ້ຄໍາປຶກສາກ່ອນການແຕ່ງງານ ແລະ ອື່ນໆ. ທີ່ສໍາຄັນທຸກຄັ້ງທີ່ມາຝາກທ້ອງ ຍັງໄດ້ແນະນໍາໃຫ້ຄວາມຮູ້ກ່ຽວກັບການກະກຽມກ່ອນເກີດຄືແນວໃດ, ຫຼັງຈາກເກີດກໍຍັງຕິດຕາມຢູ່ໂຮງໝໍ, ລົງຕິດຕາມຢູ່ບ້ານ ຊຶ່ງວຽກງານດັ່ງກ່າວແມ່ນໄດ້ຮັບການສະໜັບສະໜູນຈາກໂຄງການ Lao 035 ຂອງໂຄງການລັກຊໍາເບີ. ແຕ່ລະມື້ມີແມ່ຍິງເຂົ້າມາໃຫ້ຄໍາປຶກສາ 35-40 ຄົນ. ສໍາລັບການມາຝາກທ້ອງຈະເຮັດໃຫ້ແມ່ຍິງໄດ້ຄວາມຮູ້ໃນການກຽມໂຕ, ກຽມແຮງກາຍ, ຈິດໃຈ ແລະ ເສດຖະກິດຄືແນວໃດ, ຕ້ອງມີຄວາມພ້ອມທີ່ຈະເອົາລູກແທ້ໆ. ໃນການໃຫ້ຄໍາປຶກສາກ່ອນຈະເອົາລູກແມ່ນມີຜົນດີຫຼາຍຈະເຮັດໃຫ້ແມ່ຫຼຸດພົ້ນຕໍ່ຄວາມສ່ຽງໃນການຖືພາຄັນເປັນພິດ, ລຸລູກ, ລູກບໍ່ສົມບູນຕ່າງໆ ແລະ ອື່ນໆ. ຖ້າກວດພົບພະຍາດກໍຈະມີວິທີການປ້ອງກັນເຮັດແນວໃດໃຫ້ແມ່ເກີດຫຼອດ ແລະ ລູກປອດໄພ.

ທ່ານ ນາງ ຄໍາພັນ ໄຊຍະວົງ ໄດ້ຝາກເຖິງປະຊາຊົນ ກໍຄືແມ່ຍິງຖືພາ ທັງຢູ່ໃກ້ ແລະ ໄກຖ້າວ່າພ້ອມທີ່ຈະສ້າງຄອບຄົວ, ຈະເອົາລູກແນະນໍາໃຫ້ເຂົ້າມາໂຮງໝໍ ເພື່ອຈະໄດ້ຮັບຄໍາແນະນໍາ ແລະ ຄວາມຮູ້ຕ່າງໆໃນການຈັດຕັ້ງປະຕິບັດໂຕເອງ ເພື່ອໃຫ້ແມ່ສຸຂະພາບດີ ແລະ ລູກເກີດມາມີຄວາມປອດໄພ, ສຸຂະພາບແຂງແຮງໄດ້ຮັບໂພຊະນາການທີ່ດີ ແລະ ໄດ້ຮັບການບໍລິການສຸຂະພາບອື່ນໆ.