ກອງທັບປະຊາຊົນລາວ ປະກອບສ່ວນຮ່ວມສຳພັນສູ້ຮົບໃນບັ້ນຮົບດຽນບຽນຝູ້

ໄຊຊະນະດຽນບຽນຝູ້ ບໍ່ພຽງແຕ່ແມ່ນໄຊຊະນະຂອງກອງທັບ ແລະ ປະຊາຊົນຫວຽດນາມແຕ່ຍັງແມ່ນໄຊຊະນະລວມຂອງປະຊາຊົນລາວ ແລະ ປະຊາຊົນກຳປູເຈຍອ້າຍນ້ອງທີ່ໄດ້ຮ່ວມສຳພັນສູ້ຮົບຮ່ວມຂຸມຄອງຕ້ານກັບສັດຕູໂຕດຽວກັນເພື່ອປົດປ່ອຍຕົນເອງ ຊຶ່ງໄຊຊະນະດັ່ງກ່າວໄດ້ດັບມອດເຈດຈຳນົງການຮຸກຮານຂອງລັດທິລ່າເມືອງຂຶ້ນແບບເກົ່າ ແລະ ບັງຄັບໃຫ້ຍອມເຊັນສັນຍາເຊີແນວກ່ຽວກັບອິນດູຈີນ, ຮັບຮູ້ຄວາມເປັນເອກະລາດແຫ່ງຊາດອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຫວຽດນາມ, ລາວ ແລະກຳປູເຈຍ.
    ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີລັດຖະມົນຕີກະຊວງປ້ອງກັນປະເທດ ໄດ້ໃຫ້ສຳພາດຕໍ່ສື່ມວນຊົນໃນວັນທີ 2 ພຶດສະພາຜ່ານມາທ່ານໄດ້ຍົກໃຫ້ເຫັນໄຊຊະນະດຽນບຽນຝູ້ ກໍຄືການປະກອບສ່ວນຂອງກອງທັບປະຊາຊົນລາວໃນການຮ່ວມສຳພັນສູ້ຮົບໃນບັ້ນຮົບດຽນບຽນຝູ້ຈົນໄດ້ຮັບໄຊສະນະ ຊຶ່ງ ໄຊຊະນະດຽນບຽນຝູ້ໄດ້ບັງຄັບໃຫ້ພວກລ່າເມືອງຂຶ້ນແບບເກົ່າຕ້ອງຍອມຮັບເຊັນສັນຍາເຊີແນວປີ 1954 ກ່ຽວກັບອິນດູຈີນຮັບຮອງຄວາມເປັນເອກະລາດ ແລະ ອະທິປະໄຕຂອງ 3 ຊາດອິນດູຈີນ. ພາຍຫຼັງສັນຍາເຊີແນວບໍ່ໄດ້ເທົ່າໃດປີ, ຈັກກະພັດລ່າເມືອງຂຶ້ນແບບໃໝ່ໄດ້ເຂົ້າມາປ່ຽນແທນພວກລ່າເມືອງຂຶ້ນແບບເກົ່າຮຸກຮານລາວ ແລະ ຫວຽດນາມ ດ້ວຍລັດທິລ່າເມືອງຂຶ້ນແບບໃໝ່ທະຫານອາສາສະໝັກ ແລະ ຊ່ຽວຊານຫວຽດນາມໄດ້ສືບຕໍ່ຄຽງບ່າຄຽງໄຫຼ່ກັບພະນັກງານ-ນັກຮົບກອງທັບປະຊາຊົນລາວ ແລະ ປະຊາຊົນລາວບັນດາເຜົ່າດຳເນີນການຕໍ່ສູ້ຢ່າງເດັດດ່ຽວໜຽວແໜ້ນ ແລະ ອາດຫານຊານໄຊທີ່ສຸດດ້ວຍຈິດໃຈເຂົ້າເມັດຫັກ, ຜັກເສັ້ນໜຶ່ງກໍແບ່ງກັນກິນ ເພື່ອທັບມ້າງຍຸດທະສາດຮຸກຮານຂອງພວກຈັກກະພັດລ່າເມືອງຂຶ້ນແບບໃໝ່ ແລະ ລູກແຫຼ່ງຕີນມືຂາຍຊາດຂອງລັດຖະບານຫຸ່ນວຽງຈັນຍາດເອົາໄຊຊະນະເຊັ່ນ: ບັ້ນຮົບປົດປ່ອຍຫຼວງນໍ້າທາ 1962, ບັ້ນຮົບ 128, ບັ້ນຮົບນໍ້າບາກ 1968, ບັ້ນຮົບເມືອງສຸຍ 1969, ບັ້ນຮົບກູ້ກຽດ, ບັ້ນຮົບທະນົງກຽດ 1969-1970, ບັ້ນຮົບລາມເຊີນ 719 ປີ1971, ບັ້ນຮົບທົ່ງໄຫຫີນຊຽງແຂວງ, ລ້ອງແຈ້ງ, ບັ້ນຮົບສາລາພູຄູນ 1971-1972ແລະ ບັ້ນຮົບອື່ນໆ.
ເພື່ອຊ່ວຍໃຫ້ສະຫາຍຫວຽດນາມ ເຮັດສຳເລັດພາລະກິດປະຫວັດສາດໃນການປົດປ່ອຍພາກໃຕ້ຫວຽດນາມ, ພັກປະຊາຊົນປະຕິວັດລາວ, ສູນກາງແນວລາວຮັກຊາດ ກໍໄດ້ສ້າງທຸກເງື່ອນໄຂເອື້ອອຳນວຍໄດ້ອະນຸຍາດໃຫ້ເພື່ອນເປີດເສັ້ນທາງໂຮ່ຈິມິນຜ່ານດິນແດນລາວເພື່ອລຳລຽງຂົນສົ່ງກໍາລັງທະຫານ, ພາຫະນະສົງຄາມເປັນເວລາຫຼາຍປີ ປົດປ່ອຍພາກໃຕ້ຫວຽດນາມຢ່າງສົມບູນໃນວັນທີ 30 ເມສາ 1975 ຊຶ່ງເປັນການປະກອບສ່ວນສຳຄັນເຂົ້າໃນໄຊຊະນະລວມຂອງສອງຊາດລາວ-ຫວຽດນາມ ໂດຍປະສານສົມທົບກັບໄຊຊະນະຂອງປະຊາຊົນຫວຽດນາມ, ຢູ່ລາວພວກເຮົາກໍໄດ້ເປີດບັ້ນຮົບປຸກລະດົມການລຸກຮືຂຶ້ນດ້ວຍ 3 ບາດຄ້ອນຍຸດທະສາດ, ກ້າວໄປສູ່ການຢຶດອໍານາດທົ່ວປະເທດໃນວັນທີ 23 ສິງຫາ 1975, ລຶບລ້າງລະບອບເກົ່າລາຊາທິປະໄຕລາດຊະອານາຈັກທີ່ເປັນເມືອງຂຶ້ນຂອງຕ່າງຊາດ, ສະຖາປະນາລະບອບໃໝ່ ສາທາລະນະລັດ ປະຊາທິປະໄຕ ປະຊາຊົນລາວໃນວັນທີ 2 ທັນວາ 1975 ຢ່າງສະຫງ່າງາມ.
    ທ່ານ ພົນເອກ ຈັນສະໝອນ ຈັນຍາລາດ ກ່າວໃຫ້ຮູ້ອີກວ່າ: ໄຊຊະນະດຽນບຽນຝູ້ແມ່ນໄຊຊະນະທີ່ສະຫວ່າງສະໄຫວທີ່ສຸດໃນປະຫວັດສາດການຕໍ່ສູ້ຕ້ານການຮຸກຮານຈາກຈັກກະພັດພາຍນອກຂອງປະຊາຊົນຫວຽດນາມຜູ້ພິລະອາດຫານ ຊຶ່ງໄດ້ບັນທຶກເຂົ້າໃນປະຫວັດສາດຂອງຊາດ ແລະ ຂອງໂລກຢູ່ໃນສະຕະວັດທີ XX ທີ່ໄດ້ທັບມ້າງທີ່ຕັ້ງຂອງລະບົບຫົວເມືອງຂຶ້ນແບບເກົ່າຂອງລັດທິຈັກກະພັດ, ມັນໄດ້ເຮັດໃຫ້ສັດຈະທຳມີຄວາມສະຫວ່າງສະໄຫວຂຶ້ນຢູ່ໃນຊາດເຄິ່ງສັກດີນາທີ່ເຄີຍເປັນຫົວເມືອງຂຶ້ນປະຊາກອນບໍ່ຫຼາຍ, ເສດຖະກິດຫຼ້າຫຼັງ, ກໍາລັງທະຫານ ແລະ ພາຫະນະ-ອາວຸດຍຸດໂທປະກອນມີໜ້ອຍ ແຕ່ດ້ວຍຄວາມສາມັກຄີຢ່າງແໜ້ນແຟ້ນພາຍໃນຊາດ, ການຊີ້ນຳ-ນຳພາຂອງພັກ ແລະ ປະທານໂຮ່ຈິມິນ ຜູ້ນຳທີ່ຍິ່ງໃຫຍ່, ປຸກລະດົມ ແລະ ໝູນໃຊ້ກຳລັງປະກອບອາວຸດປະຕິບັດໜ້າທີ່ປ້ອງກັນປະເທດທົ່ວປວງຊົນເພື່ອເຮັດສົງຄາມປະຊາຊົນ, ຕີເອົາໄຊຊະນະກັບສັດຕູຜູ້ຮຸກຮານ ທີ່ມີພື້ນຖານເສດຖະກິດ ແລະ ການທະຫານເຂັ້ມແຂງ ແລະ ທັນສະໄໝກວ່າຫຼາຍເທົ່າຈົນໄດ້ຮັບໄຊຊະນະ.
ຂ່າວ: ທະນູທອງ, ພາບ: ຂັນໄຊ