ລະມາມຮັບຮອງເອົາ 13 ບ້ານເປັນຄອບຄົວ ແລະ ບ້ານສາມັກຄີປອງດອງ

ເມື່ອບໍ່ດົນມານີ້, ຢູ່ທີ່ສະໂມສອນໃຫຍ່ເມືອງລະມາມ ແຂວງເຊກອງໄດ້ຈັດພິທີປະກາດຮັບຮອງເອົາ 13 ບ້ານ ເປັນບ້ານສາມັກຄີປອງດອງ. ໂດຍພາຍໃຕ້ການເປັນປະທານຂອງທ່ານ ວົງດາໄລ ທັດບົວລະພາ ຮອງປະທານແນວລາວສ້າງຊາດແຂວງ, ມີທ່ານ ຄຳຜອງ ເຜົ່າລະວີ ຄະນະປະຈຳພັກເມືອງ ປະທານແນວລາວສ້າງຊາດເມືອງ, ພ້ອມດ້ວຍການນຳຂັ້ນແຂວງ, ເມືອງ, ບ້ານເຂົ້າຮ່ວມ.

ໃນພິທີ ທ່ານ ຂັນທະລີ ສີຫາລາດ ເລຂາພັກບ້ານ ນາຍບ້ານບ້ານໂພນຄໍາ ຕາງໜ້າໃຫ້ 13 ບ້ານ ຂື້ນຜ່ານບົດສະຫຼູບການເຄື່ອນໄຫວຂະບວນການສ້າງຄອບຄົວ ແລະ ບ້ານສາມັກຄີປອງດອງ. ໃນ 13 ບ້ານ ລວມມີພົນລະເມືອງທັງໝົດ 12.463 ຄົນ ຍິງ 6.142 ຄົນ, ມີ 2.708 ຄອບຄົວ, ມີ 1.843 ຫຼັງຄາເຮືອນ, ມີຄອບຄົວທຸກຍາກ 52 ຄອບຄົວ. ໃນ 13 ບ້ານ ປະກອບມີ 10 ເຜົ່າຄື: ເຜົ່າຮາຣັກ, ລາວ, ຕຣຽງ, ແຢະ, ຊ່ວຍ, ລະວີ, ຕະໂອ້ຍ, ຢຣຸ, ກຣຽງ ແລະ ເຜົ່າກະຕູ. ຜ່ານການປະເມີນເຫັນວ່າ: ໃນ 13 ບ້ານ ໄດ້ມີຄວາມເຂັ້ມແຂງຍຶດໝັ້ນຕໍ່ການຊີ້ນໍາ-ນໍາພາຂອງພັກ-ລັດໂດຍຖືເອົາວຽກງານຂະບວນການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການສ້າງບ້ານພັດທະນາຕາມທິດ 3 ສ້າງ. ປະຊາຊົນພາຍໃນບ້ານໄດ້ມີຄວາມສາມັກຄີປອງດອງ ມີສະຕິຕໍ່ການຈັດຕັ້ງປະຕິບັດ ລະບຽບກົດໝາຍຂອງບ້ານເມືອງປົກປັກຮັກສາວັດທະນະທຳຮີດຄອງປະເພນີອັນດີງາມຂອງຊາດຂອງ ບັນດາເຜົ່າ ແລະ ເດັກນ້ອຍລູກຫຼານພາຍໃນບ້ານໄດ້ຮັບການສຶກສາຮໍ່າຮຽນປະຊາຊົນພາຍໃນບ້ານຍັງໄດ້ຖືເອົາ ອາຊີບປູກເຂົ້າເປັນຕົ້ນຕໍ, ລ້ຽງສັດພໍແຕ່ກຸ້ມກິນ ແລະ ຄ້າຂາຍເປັນສໍາຮອງ, ໃນ 13 ບ້ານ ມີຈໍານວນຄອບຄົວໄດ້ຮ່ວມການປະເມີນ 2.167 ຄອບຄົວ, ຄອບຄົວບໍ່ໄດ້ຮ່ວມ ການປະເມີນ 179 ຄອບຄົວ, ຈໍານວນຄອບຄົວບໍ່ໄດ້ຮັບຮອງ 162 ຄອບຄົວ ແລະ ມີຈໍານວນຄອບຄົວທີ່ໄດ້ມາດຖານ ແລະ ຮັບຮອງເປັນຄອບຄົວສາມັກຄີປອງດອງໃນປີ 2021 - 2022 ມີ 1.995 ຄອບຄົວ.

(ຂ່າວ: ເຊກອງ)